Examinada a solicitude de deslindamento formulada polos representantes dos montes veciñais en man común (MVMC) Pradorramisquedo, pertencente á Comunidade de Montes Veciñais en Man Común (CMVMC) de Pradorramisquedo, e mais Devesa da Chanca, pertencente á CMVMC de Penouta, no concello de Viana do Bolo, resultan os seguintes:
Feitos:
Primeiro. O 29.9.2022 a CMVMC de Pradorramisquedo presentou un escrito (Rexel 2022/2392472) en que solicitan a aprobación dun deslindamento coa CMVMC de Penouta.
Coa solicitude achegou a seguinte documentación:
– Acta de deslindamento.
– Certificacións de aprobación das respectivas asembleas xerais.
– Memoria e planos.
– Solicitude de conciliación presentada no Xulgado de Paz de Viana do Bolo.
Segundo. O 25.10.2022 a dita comunidade presentou un novo escrito (Rexel 2022/2607006) co cal achegaban a seguinte documentación:
– Acta de conciliación levantada no Xulgado de Viana do Bolo.
Terceiro. O informe do Servizo de Montes da Xefatura Territorial de Ourense do 27 de xaneiro de 2023 fai constar que a documentación achegada corresponde ao deslindamento do perímetro estremeiro entre o MVMC Pradorramisquedo, pertencente á CMVMC de Pradorramisquedo, e o MVMC Devesa da Chanca, pertencente á CMVMC de Penouta, desde o vértice 0 (o situado máis ao leste) ata o vértice 22 (o situado máis ao oeste).
Logo de analizar os vértices e a súa localización, conclúese que, de conformidade co indicado na propia memoria técnica, o vértice 0 constitúe un punto auxiliar que permite pechar o perímetro contra a estrema dunha terceira comunidade que non participa do acordo (neste caso, Ramilo). Outro tanto acontece co punto 2a, denominado Cruceiro, usado coma referencia para definir o vértice 2, e mais co punto 22a, identificado como Penedo Negro e usado como referencia para definir, no vértice 22, o remate ou peche da estrema.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que lle propón ao Xurado Provincial a súa aprobación entre os vértices 1 e 22 indicados na acta de conciliación, conforme a descrición contida nela, tendo os puntos 0 e 22a a consideración de vértices auxiliares que definen a dirección da liña nos tramos inicial e final da estrema.
Consideracións legais e técnicas:
Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se deberá seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 27 de xaneiro de 2023, o Xurado Provincial de Montes Veciñais en Man Común acordou por unanimidade o día 17 de abril de 2023:
Aprobar o acto de conciliación acadado polas xuntas reitoras dos montes veciñais en man común Pradorramisquedo, pertencente á CMVMC de Pradorramisquedo, e mais Devesa da Chanca, pertencente á CMVMC da Penouta, no concello de Viana do Bolo.
Contra esta resolución, que pon fin á vía administrativa, poderase interpor recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses, contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 16 de outubro de 2023
Luis Jorge Álvarez Ferro
Presidente do Xurado Provincial de Clasificación de Montes Veciñais
en Man Común de Ourense