O artigo 28.2 da Constitución española recoñece, como dereito fundamental da persoa, o dereito á folga. O exercicio deste dereito queda condicionado ao mantemento dos servizos esenciais definidos no artigo 2 do Decreto 155/1988, do 9 de xuño.

Os representantes das centrais sindicais, Confederación Intersindical Galega (CIG), a Unión Xeral de Traballadores (UGT) e Comisións Obreiras (CC.OO.) comunicaron á Consellería de Promoción do Emprego e Igualdade a convocatoria da folga que terá lugar o día 16 de outubro de 2023 desde as 00.00 horas e con carácter indefinido. Para as empresas que teñan quendas, a folga desenvolverase desde as 22.00 horas ou 23.00 horas do día anterior. A folga afectará todas as empresas do sector da limpeza que prestan servizos na provincia de Lugo e todos os centros de traballo en que son adxudicatarias dos servizos de limpeza e, en consecuencia, a todos os/as traballadores/as que prestan servizos para estas, salvo que non apliquen o Convenio colectivo para o sector da limpeza de edificios e locais da provincia de Lugo.

A este respecto, o artigo 10 do Real decreto lei 17/1977, do 4 de marzo, sobre relacións de traballo, establece que, cando a folga se declare en empresas encargadas da prestación de calquera xénero de servizos públicos ou de recoñecida e inaprazable necesidade e concorran circunstancias de especial gravidade, a autoridade gobernativa poderá adoptar as medidas necesarias para asegurar o funcionamento dos servizos.

Deste xeito, a necesaria conciliación entre o exercicio do dereito constitucional de folga e o mantemento dos servizos esenciais obriga a esta Administración autonómica galega, de acordo coa normativa vixente, a fixar uns servizos mínimos indispensables para o funcionamento dos servizos esenciais que se concretan e xustifican nesta orde.

A xurisprudencia do Tribunal Constitucional, entre outras STC 183/2006, do 19 de xuño, vén considerando como servizos esenciais aqueles que satisfán dereitos e intereses dos cidadáns vinculados aos dereitos fundamentais, liberdades públicas e bens constitucionalmente protexidos, como son os dereitos á protección da saúde e o dereito á seguridade e hixiene no traballo, de acordo cos seguintes criterios:

a) Proporcionalidade entre os sacrificios que se impoñan aos folguistas e os que padezan os usuarios dos servizos.

b) Equilibrio entre os dereitos e intereses dos traballadores en folga e dos cidadáns afectados.

c) Suficiencia na realización do traballo necesario que permita a cobertura mínima do servizo, aínda sen alcanzar os niveis normais de prestación.

Neste contexto, estímase necesario o establecemento duns servizos mínimos de limpeza que garantan unhas adecuadas condicións de limpeza para o desenvolvemento dos servizos públicos.

De xeito máis concreto, respecto da Oficina de Turismo de Lugo, propóñense os servizos mínimos indispensables para garantir a salubridade e as condicións de hixiene mínimas, coa limpeza de baños e retirada de lixo, xa que é un lugar de gran afluencia de público.

En canto aos edificios xudiciais, a fixación desta porcentaxe de servizos mínimos nos xulgados da provincia de Lugo vén xustificada pola necesidade de garantir unhas mínimas condicións de hixiene que permitan asegurar diariamente a retirada de lixo, limpeza de baños e outras necesidades urxentes e inaprazables, con especial atención ás zonas de uso común.

Respecto dos centros educativos, garantir o dereito á saúde do alumnado e tamén dos traballadores non afectados pola folga implica fixar uns servizos mínimos que, sen alcanzar os niveis normais de actividade, resultan necesario nun contexto de edificios, os centros educativos, aos cales acoden numerosas persoas todos os días, entre o que se atopa alumnado menor de idade que permanece neses centros durante un tempo prolongado, o que xera un uso intenso das instalacións hixiénico-sanitarias como baños e aseos, tamén residuos orgánicos, cuxa retirada é ineludible para evitar pragas, focos de infección e propagación de xermes. Esta proposta busca atender aquelas necesidades inminentes e concilialas co dereito de folga, sen prexuízo dunha eventual modificación posterior, se as circunstancias o demandasen.

Polo que se refire aos centros dependentes da Consellería de Política Social e Xuventude, a folga afecta empresas adxudicatarias dos servizos de limpeza en diversos centros e unidades da consellería na provincia de Lugo.

O servizo público de asistencia social non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación con este. A paralización dos servizos de limpeza pode provocar nos centros e unidades afectadas graves problemas de salubridade con consecuencias imprevisibles se non se mantén o mínimo de actividade que garanta a prestación dos servizos públicos nos ditos centros e unidades, polo que se establecen os servizos esenciais para a comunidade ao abeiro do Decreto 155/1988, do 9 de xuño.

Todo o persoal cuxa presenza se cuantifica como esencial para o mantemento dos servizos mínimos é absolutamente necesario e indispensable xa que a limpeza constitúe unha das exixencias máis relevantes neses centros e unidades.

En relación cos centros dependentes da Consellería de Promoción do Emprego e Igualdade, centros de formación e oficinas de emprego, propóñense servizos mínimos por tratarse de centros onde deben preservarse as condicións hixiénico-sanitarias axeitadas, tendo en conta que son espazos con grande afluencia diaria de persoas.

A Consellería de Sanidade establece servizos mínimos para o Servizo de Laboratorio de Saúde Pública de Galicia dado o carácter indefinido da folga, tendo en conta o número de traballadores afectados (150) e a presenza de gran cantidade de residuos, que ante unha folga de posible longa duración podería resultar problemática.

Polo que respecta aos centros dependentes da Consellería do Medio Rural, o Laboratorio de Sanidade e Produción Animal de Galicia é un centro aberto ao público no cal traballan 70 persoas, polo que é preciso manter un nivel axeitado de limpeza por hixiene e salubridade das persoas.

Ao tratarse dun laboratorio en que se realizan ensaios microbiolóxicos e se manexan produtos químicos, as condicións hixiénicas do ambiente preservan a integridade das mostras durante as manipulacións, protexen os medios de cultivo e os reactivos de posibles contaminacións e reducen os riscos sanitarios do persoal. Por todo o exposto, están establecidos métodos específicos de limpeza e desinfección de instalacións, equipamentos e superficies, así como procedementos para o tratamento de verteduras accidentais.

Por último, a Consellería do Mar establece servizos mínimos para o centro de traballo situado no edificio de Celeiro-Viveiro, para manter as condición mínimas de hixiene e salubridade, con limpeza de baños e retirada de lixo.

En consecuencia, de acordo coa normativa citada e cos argumentos expostos, en virtude das facultades que me confire o Decreto 117/2022, do 23 de xuño, polo que se establece a estrutura orgánica da Vicepresidencia Segunda e Consellería de Presidencia, Xustiza e Deportes; o Decreto 59/2023, do 14 de xuño, polo que se establece a estrutura orgánica da Xunta de Galicia e oído o Comité de Folga,

DISPOÑO:

Artigo 1

1. A convocatoria de folga efectuada pola Confederación Intersindical Galega (CIG), a Unión Xeral de Traballadores (UGT) e Comisións Obreiras (CC.OO.) desenvolverase con carácter indefinido a partir das 00.00 horas do día 16 de outubro de 2023 e, para as empresas que teñan quendas, desde as 22.00 horas ou 23.00 horas do día anterior.

A folga afectará todas as empresas do sector da limpeza que prestan servizos na provincia de Lugo e todos os centros de traballo en que son adxudicatarias dos servizos de limpeza e, en consecuencia, todos os/as traballadores/as que prestan servizos para estas, salvo que non apliquen o convenio colectivo de limpeza da provincia de Lugo. O seu desenvolvemento deberá entenderse condicionado ao mantemento dos servizos mínimos, segundo os criterios que se establecen na presente orde.

2. Terán a consideración de servizos mínimos os que se relacionan no anexo á presente orde.

Artigo 2

O persoal necesario para a cobertura dos servizos mínimos deberá ser publicado nos taboleiros de anuncios con antelación suficiente. A designación nominal dos efectivos que deben cubrir os servizos mínimos será realizada polos empregadores e notificada ao persoal designado.

Disposición derradeira

Esta orde producirá efectos o mesmo día da súa publicación no Diario Oficial de Galicia.

Santiago de Compostela, 11 de outubro de 2023

Diego Calvo Pouso
Vicepresidente primeiro e conselleiro de Presidencia, Xustiza e Deportes

ANEXO

Proposta servizos mínimos

– Servizos mínimos da Presidencia da Xunta de Galicia.

Centro	Total	Servizos mínimos	Posto	Quenda
Oficina Turismo Lugo (r/do Miño 12, baixo, Lugo)	2 horas diarias	50 %	Limpador/a	Xornada partida

– Servizos mínimos da Vicepresidencia Primeira e Consellería de Presidencia, Xustiza e Deportes.

Centro	Total	Servizos mínimos	Posto	Quenda
Audiencia Provincial Lugo	1	50 %	Limpador/a	Quenda de tarde
Xulgado de Becerreá	1	100 %	Limpador/a	Quenda de tarde
Xulgado de Chantada	1	100 %	Limpador/a	Quenda de tarde
Xulgados de Lugo	2	40 %	Limpador/a	1 quenda de mañá/1 quenda de tarde
Xulgados de Mondoñedo	1	100 %	Limpador/a	Quenda de tarde
Xulgados de Monforte de Lemos	1	100 %	Limpador/a	Quenda de tarde
Xulgado de Sarria	1	100 %	Limpador/a	Quenda de tarde
Xulgados de Vilalba	1	100 %	Limpador/a	Quenda de tarde
Xulgados de Viveiro	1	100 %	Limpador/a	Quenda de tarde
Xulgado de Paz de Ribadeo	1	100 %	Limpador/a	Quenda de tarde

– Servizos mínimos da Vicepresidencia Segunda e Consellería de Medio Ambiente, Territorio e Vivenda.

Centro	Total	Servizos mínimos	Posto	Quenda
Edificio Instituto Galego da Vivenda e Solo. Avda. Ramón Ferreiro, Lugo	2	1 traballador/a	Limpador/a	Tarde (5 horas diarias)

– Servizos mínimos da Consellería de Cultura, Educación, Formación Profesional e Universidades.

Centro	Servizos mínimos	Posto	Quenda
Centros educativos de titularidade pública ou privada	30 % (mínimo 1 traballador/a)	Limpador/a	Limpeza dos baños, aseos e comedores e retirada de residuos orgánicos en días alternos

– Servizos mínimos da Consellería de Política Social e Xuventude.

Centro	Total	Servizos mínimos	Posto	Quenda
Residencia de maiores As Gándaras	11	5	Limpador/a	Mañá
		3	Limpador/a	Tarde
CAPD Sarria	6	3	Limpador/a	Mañá
		2	Limpador/a	Tarde
Residencia de maiores de Monforte de Lemos	4	2	Limpador/a	Mañá
		1	Limpador/a	Tarde
Centro sociocomunitario A Milagrosa de Lugo	2	1	Limpador/a	Mañá
		1	Limpador/a	Tarde
Centro sociocomunitario Ribadeo	2	2	Limpador/a	Mañá
Centro sociocomunitario Vilalba	1	1	Limpador/a	Mañá/tarde
Centro sociocomunitario Mondoñedo	1	1	Limpador/a	Mañá
Residencia de maiores de Burela	1	1	Limpador/a	Mañá
Sección cualificación e valoración de discapacidades Lugo	3	1	Limpador/a	Mañá
		1	Limpador/a	Tarde
Centro Santo Anxo de Rábade	1	1	Limpador/a	Mañá
Espacio xove de Chantada	1	1	Limpador/a	Mañá
Casa do mar de Burela	2	1	Limpador/a	Mañá
Casa do mar de Celeiro	2	1	Limpador/a	Mañá
Escolas infantís da rede pública xestionada polo Consorcio Galego de Servizos de Igualdade e Benestar	1	1	Limpador/a	Tarde

– Servizos mínimos da Consellería de Sanidade.

Centro	Total	Servizos mínimos	Posto	Quenda
Xefatura Territorial da Consllería de Sanidade en Lugo. Servizo do Laboratorio de Saúde pública de Galicia (rúa María Balteira, núm. 1, 27001 Lugo)	4	1 traballador/a (25 %)	Limpador/a	Tarde

– Servizos mínimos da Consellería de Promoción do Emprego e Igualdade.

Centro	Total	Servizos mínimos	Posto	Quenda
Centro Integrado de Formación Profesional de Lugo	3	1	Limpador/a	Tarde
Centro Formación Profesional Ocupacional de Viveiro	1	1 (luns e xoves)	Limpador/a	Tarde
Unidade de Acción Formativa de Monforte	1	1 (luns e xoves)	Limpador/a	Tarde
Oficina de Emprego de Becerrá	1	1 (luns e xoves)	Limpador/a Limpador/a	Tarde Tarde
Oficina de Emprego de Burela	1	1 (luns e xoves)	Limpador/a	Tarde
Oficina de Emprego de Lugo Norte	1	1 (luns e xoves)	Limpador/a	Tarde
Oficina de Emprego de Lugo Sur	1	1 (luns e xoves)	Limpador/a	Tarde
Oficina de Emprego de Mondoñedo	1	1 (luns e xoves)	Limpador/a	Tarde
Oficina de Emprego de Monforte	1	1 (luns e xoves)	Limpador/a Limpador/a	Tarde Tarde
Oficina de Emprego de Ribadeo	1	1 (luns e xoves)	Limpador/a	Tarde
Oficina de Emprego de Sarria	1	1 (luns e xoves)	Limpador/a	Tarde
Oficina de Emprego de Vilalba	1	1 (luns e xoves)	Limpador/a	Tarde
Oficina de Emprego de Vivieiro	1	1 (luns e xoves)	Limpador/a	Tarde

– Servizos mínimos da Consellería do Medio Rural.

Centro	Total	Servizos mínimos	Posto	Quenda
Laboratorio de Sanidade e Produción Animal de Galicia (DXGAIA)	4	1	Limpador/a	Tarde

– Servizos mínimos da Consellería do Mar.

Centro	Total	Servizos mínimos	Posto	Quenda
Edificio Celeiro-Viveiro	1	1 traballador/a	Limpador/a (luns e xoves)	Tarde