Na reunión do 22.6.2023, o Xurado Provincial de Clasificación de Montes Veciñais en Man Común da Coruña aproba a seguinte resolución:

Unha vez examinado o expediente de deslindamento parcial do monte veciñal en man común de Abanqueiro, pertencente á parroquia de San Cristovo de Abanqueiro, no concello de Boiro (A Coruña) e tendo en conta os seguintes antecedentes de feito:

1. O Xurado Provincial de Montes Veciñais en Man Común da Coruña, na Resolución do 12.11.1979, declarou como monte veciñal en man común o monte de Abanqueiro, atribuíndo a súa pertenza á parroquia de San Cristovo de Abanqueiro, no concello do Boiro.

2. O 20.11.2017, a presidenta da Xunta Reitora da Comunidade Veciñal do Monte en Man Común de Abanqueiro solicita que se inicie o procedemento para o deslindamento parcial do monte veciñal con propiedades particulares.

3. Con data do 3.4.2018, o deslindamento provisional antedito recibe o informe favorable da Área Técnica de Montes Veciñais do Servizo de Montes, que fai constar que a información cartográfica remitida permite situalo con precisión no terreo, que se presentan referencias xeográficas dos vértices poligonais en coordenadas UTM e que se inclúen ortofotos das parcelas, así como a certificación catastral descritiva e gráfica das parcelas catastrais que constitúen o monte con relación das parcelas estremeiras.

4. Segundo o disposto no artigo 54 da Lei 7/2012, de montes de Galicia, sobre o procedemento de deslindamento de montes veciñais con propiedades particulares, o 27.2.2020 anúnciase no Diario Oficial de Galicia a apertura do prazo de exposición pública para a presentación de alegacións.

5. Con data do 22.7.2022, a comunidade interesada comunica que non foi presentada ningunha alegación a esta proposta de deslindamento parcial no período legal de reclamacións.

6. As parcelas obxecto do deslindamento coinciden coas referencias catastrais:

Nº parcela	Referencias catastrais	Superficie (m2)
1	1210718NH1211S0001SB	937
2	15011A010008340000XJ	19.754
3	15011A010008350000XE	21.110
4	15011A010012450000XQ	17.239
5	15011A009009480000XS	8.841
6	15011A005005340000XZ	25.362
7	15011A005008160000XJ	1.719
8	15011A005011000000XG	11.713
9	15011A009009890000XB	14.726
10	15011A005011790000XI	39.207
11	15011A006013650000XQ	3.849
12	15011A006011850000XR	66.501

E resulta unha superficie total do deslindamento parcial de 23,10 ha.

De conformidade co disposto no artigo 54.3 da Lei 7/2012, no caso de informe favorable, unha vez ratificado o deslindamento provisional pola Asemblea Xeral, darase traslado ao xurado provincial dos acordos alcanzados e o Xurado Provincial de Montes Veciñais en Man Común ditará a resolución aprobatoria do deslindamento.

O Xurado, na reunión do 22.6.2023, por unanimidade, acorda aprobar o deslindamento e proceder a realizar as oportunas correccións no expediente, de conformidade co informe elaborado polo Servizo de Montes.

O plano que figura no anexo, ao final deste anuncio, corresponde á superficie total do monte veciñal tras o deslindamento aprobado.

Contra este acordo poderá interpoñerse recurso potestativo de reposición ante o Xurado Provincial de Clasificación de Montes Veciñais en Man Común da Coruña no prazo dun mes, contado desde o día seguinte ao da súa publicación no Diario Oficial de Galicia, ou ben directamente recurso contencioso-administrativo ante o Xulgado do Contencioso-Administrativo da Coruña no prazo de dous meses, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e no artigo 46 da Lei 29/1998, do 13 de xullo, da xurisdición contencioso-administrativa.

A Coruña, 26 de setembro de 2023

O presidente do Xurado Provincial de Clasificación
de Montes Veciñais en Man Común da Coruña
P.S. (Resolución do 7.7.2022)
Ofelia Rivas Vázquez
Xefa do Servizo Xurídico-Administrativo da Coruña

ANEXO