A presente orde, pola que se establecen as bases reguladoras do procedemento TR302A para o período 2023-2025, ten por obxecto concretar os principios xerais contidos na Lei 9/2007, do 13 de xuño, de subvencións de Galicia, no relativo aos criterios que rexerán a concesión de axudas para impartir as accións formativas do Plan de formación para o emprego dirixido prioritariamente a persoas traballadoras ocupadas.
Ao abeiro das bases reguladoras establecidas na presente orde aprobaranse, de ser o caso, as sucesivas convocatorias para o período indicado.
A Lei 30/2015, do 9 de setembro, pola que se regula o Sistema de formación profesional para o emprego no ámbito laboral, regula a planificación e o financiamento do sistema de formación profesional para o emprego no ámbito laboral, a programación e execución das accións formativas, o control, o seguimento e o réxime sancionador, así como o sistema de información, a avaliación, a calidade e a gobernanza do sistema.
A dita lei estableceu un marco normativo que trata de consolidar no sistema produtivo unha cultura de formación profesional favorecedora da formación de emprego estable e de calidade. Esta lei ten entre os seus obxectivos garantir o exercicio do dereito á formación das persoas traballadoras, ocupadas e desempregadas, e contribuír de maneira efectiva á formación nas empresas de feito que melloren a súa competitividade.
As bases reguladoras e a primeira convocatoria que se regulan nesta norma adaptan os seus contidos ao actual marco regulador da formación para o emprego establecido pola Lei 30/2015; ao Real decreto 694/2017, do 3 de xullo, polo que se desenvolve a Lei 30/2015, do 9 de setembro, pola que se regula o Sistema de formación profesional para o emprego no ámbito laboral, e á Orde TMS/368/2019, do 28 de marzo, pola que se desenvolve o Real decreto 694/2017, do 3 de xullo, polo que se desenvolve a Lei 30/2015, do 9 de setembro, pola que se regula o Sistema de formación profesional para o emprego no ámbito laboral, en relación coa oferta formativa das administracións competentes e o seu financiamento, e se establecen as bases reguladoras para a concesión de subvencións públicas destinadas ao seu financiamento.
A Comunidade Autónoma de Galicia asume as funcións e servizos transferidos pola Administración do Estado en materia de formación profesional ocupacional mediante o Decreto 69/1993, do 10 de marzo.
O Decreto 123/2022, do 23 de xuño, polo que se establece a estrutura orgánica da Consellería de Promoción do Emprego e Igualdade atribúelle á Dirección Xeral de Formación para o Emprego e Orientación as competencias relativas á formación profesional para o emprego.
A Lei 38/2003, do 17 de novembro, xeral de subvencións, regula os requisitos de concesión e xustificación das subvencións concedidas na Administración do Estado, e inclúe aqueles de carácter básico que son de aplicación na normativa desta comunidade autónoma e, en consecuencia, para esta orde.
A Lei 9/2007, do 13 de xuño, de subvencións de Galicia, establece no seu artigo 5.2 que a concesión de axudas e subvencións se axustará aos principios de publicidade, transparencia, concorrencia, obxectividade, igualdade e non-discriminación, aos cales se axusta esta disposición. Tamén será de aplicación o Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia.
O Plan estratéxico de Galicia 2022-2030, aprobado no Consello de Goberno da Xunta de Galicia do 10 de marzo de 2022, ten por obxectivo acadar unha recuperación sostible, competitiva e inclusiva que permita a Galicia configurarse como unha sociedade innovadora e competitiva.
O sistema de formación profesional para o emprego no ámbito laboral debe ser quen de contribuír a facilitar aos diferentes sectores económicos, ás persoas traballadoras, prioritariamente ocupadas pero tamén desempregadas, os coñecementos, capacidades e habilidades necesarios para atender os requirimentos de calidade, servizo e competitividade das empresas e, á vez, satisfacer as aspiracións de promoción profesional e desenvolvemento persoal das persoas traballadoras, capacitándoas para o desempeño do seu labor profesional e para o acceso ou mellora no emprego.
Entre as iniciativas de formación para o emprego que regula a Lei 30/2015 considérase a oferta formativa das administracións competentes para persoas traballadoras ocupadas, que se concreta no ámbito territorial de Galicia por medio destas bases reguladoras da convocatoria de subvencións.
Esta oferta formativa atende ás necesidades non cubertas pola formación programada polas empresas. Na oferta tamén poderán participar persoas desempregadas, ademais das persoas traballadoras ocupadas, dentro dos límites que se sinalan nas bases reguladoras.
A concesión e xustificación das subvencións concedidas realizarase a través do réxime de módulos previsto nos artigos 3 e 14 da Orde TMS/368/2019. Para os efectos de aplicar o dito réxime de módulos, a determinación da contía dos módulos económicos específicos das distintas especialidades formativas para ofertar incluídas no Catálogo de especialidades formativas establecerase na correspondente convocatoria.
O cálculo do importe dos módulos específicos efectuarase conforme criterios obxectivos en atención aos valores medios de mercado dos distintos compoñentes dos custos directos e indirectos da actividade formativa, en función da familia profesional, área profesional ou especialidade formativa, así como da modalidade de impartición.
A primeira convocatoria tramítase ao abeiro do disposto no artigo 25 do Regulamento da Lei de subvencións de Galicia e no artigo 1.1 da Orde da Consellería de Economía e Facenda, do 11 de febreiro de 1998, pola que se regula a tramitación anticipada de expediente de gasto, na redacción dada pola Orde do 27 de novembro de 2000, modificada pola Orde do 25 de outubro de 2001, polo que a concesión das subvencións queda sometida á condición suspensiva de existencia de crédito adecuado e suficiente no momento da resolución.
Consecuentemente con todo o anterior, logo de consultar o Consello Galego de Formación Profesional Continua e o Consello Galego de Relacións Laborais, en exercicio das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Capítulo I
Disposicións xerais
Artigo 1. Obxecto e ámbito de aplicación
1. Esta orde ten por obxecto establecer as bases reguladoras e as condicións polas que se rexerán, no ámbito da Comunidade Autónoma de Galicia, tanto as convocatorias públicas como a execución das accións formativas do Plan de formación para o emprego dirixido a persoas traballadoras ocupadas, xestionadas pola Consellería de Promoción do Emprego e Igualdade (procedemento TR302A).
Tamén poderán participar nas referidas accións formativas reguladas por esta orde aqueles colectivos que para tales efectos se determinan nos artigos 27 e 28.
2. As bases reguladoras terán vixencia temporal para o período 2023-2025.
Así mesmo, coa publicación desta orde realízase a súa primeira convocatoria para o período 2023-2024.
Artigo 2. Finalidade e principios que rexen a concesión das subvencións
1. As subvencións que se concedan ao abeiro do disposto nesta orde de bases reguladoras terán como finalidade o financiamento de programas de formación destinados á cualificación profesional das persoas traballadoras ocupadas, e estarán dirixidos á adquisición e mellora de competencias profesionais relacionadas cos requirimentos de produtividade e competitividade das empresas que teñan os seus centros de traballo na Comunidade Autónoma de Galicia, ás necesidades de adaptación aos cambios operados no posto de traballo e ás aspiracións de promoción profesional e desenvolvemento persoal das persoas traballadoras, de forma que as capacite para o desenvolvemento cualificado da profesión e lles permita mellorar a súa empregabilidade.
2. A concesión das subvencións realizarase en réxime de concorrencia competitiva nos termos establecidos no artigo 19.1 da Lei 9/2007, do 13 de xuño, de subvencións de Galicia, respectando os principios de obxectividade, igualdade, transparencia e publicidade, e de acordo co establecido no artigo 4 da Orde TMS/368/2019, do 28 de marzo, polo que se desenvolve o Real decreto 694/2017, do 3 de xullo.
Artigo 3. Financiamento
Cada convocatoria determinará o importe total do crédito que se destinará á subvención das actividades de formación, con indicación das anualidades en que se distribuirá, as aplicacións orzamentarias a que se imputará, así como o financiamento e as reservas de crédito que, se for o caso, se establezan para determinados programas formativos.
Artigo 4. Programas de formación
1. Será subvencionable a impartición dos programas de formación dirixidos á adquisición de competencias técnicas profesionais que en cada convocatoria se determinen.
2. Cada entidade de formación só poderá presentar unha solicitude de subvención por programa, que incluirá, dentro da capacidade real de execución da entidade e con respecto aos límites e requisitos que se determinen nas bases reguladoras e na correspondente convocatoria, o programa de formación que se vai impartir, con indicación de todas e cada unha das accións formativas e grupos que o configuran, e para os cales solicita subvención.
A solicitude incluirá o número mínimo de accións formativas ou de grupos formativos dunha mesma acción formativa que para cada convocatoria se determinen.
3. O anexo I de cada convocatoria detallará que especialidades poderán impartirse no marco dos programas formativos obxecto de subvención en cada convocatoria.
4. As convocatorias que se publiquen ao abeiro desta orde de bases reguladoras poderán establecer, para cada entidade e/ou censo de formación, límites relativos ao número máximo de edicións que se van impartir dunha especialidade formativa concreta, así como do número máximo de grupos e participantes por acción formativa. Así mesmo, poderán establecerse excepcións aos ditos límites.
5. Cada convocatoria poderá especificar no correspondente anexo as familias e áreas profesionais, ou especialidades formativas, consideradas prioritarias nas correspondentes convocatorias de subvencións.
Artigo 5. Entidades solicitantes
1. Poderán solicitar as subvencións a que se refiren estas bases as entidades que sexan titulares de centros ou entidades de formación inscritos para impartir formación profesional para o emprego no ámbito laboral da Comunidade Autónoma de Galicia naquelas especialidades formativas para as cales soliciten subvención, xa sexa na modalidade presencial, de teleformación ou mixta.
As entidades disporán dun prazo máximo de dez días hábiles desde a data de entrada en vigor da orde de convocatoria para, no caso de non estaren dadas de alta, inscribirse no Rexistro de Centros e Entidades de Formación para o Emprego da Comunidade Autónoma de Galicia para impartir as especialidades formativas solicitadas e pagar, de ser o caso, a correspondente taxa previa á inscrición.
As entidades non inscritas no Rexistro de Centros e Entidades de Formación da Comunidade Autónoma de Galicia para impartir especialidades formativas do Catálogo de especialidades na modalidade de teleformación deberán, con carácter previo á presentación da solicitude de subvención e no prazo máximo de dez días hábiles desde a data de entrada en vigor da orde de convocatoria, achegar a documentación acreditativa da súa inscrición no Registro Estatal, con indicación expresa da data en que esta tivo lugar, á conta de correo electrónico sx.formacionemprego@xunta.gal
2. As entidades solicitantes deberán estar inscritas para impartir a especialidade formativa no Rexistro de Centros e Entidades de Formación da Comunidade Autónoma de Galicia ou, se o caso que a formación se imparte total ou parcialmente na modalidade de teleformación, no Rexistro Estatal de Entidades de Formación, regulado na Orde TMS/369/2019, do 28 de marzo.
3. As entidades deberán dispor, no ámbito territorial da Comunidade Autónoma de Galicia, das instalacións debidamente inscritas que permitan a impartición das actividades presenciais das acciones formativas solicitadas.
De ser o caso, os centros presenciais vinculados a entidades inscritas para impartir especialidades formativas na modalidade de teleformación deberán estar localizados na Comunidade Autónoma de Galicia e inscritos para impartir a correspondente especialidade na data establecida no número 1 deste artigo. Estes centros non se poderán modificar durante o desenvolvemento da acción formativa.
4. As entidades beneficiarias poderán facer uso da aula virtual nos termos establecidos nesta orde e segundo as instrucións que ao respecto publique a Consellería de Promoción do Emprego e Igualdade.
5. O incumprimento por parte da entidade solicitante do requisito de inscrición en prazo para algunha das especialidades formativas incluídas na solicitude dará lugar á exclusión das ditas accións formativas do programa formativo.
6. Non poderán obter a condición de entidades beneficiarias das subvencións previstas nesta orde aquelas nas cales concorran algunhas das circunstancias establecidas no artigo 10 da Lei 9/2007, do 13 de xuño, de subvencións de Galicia, e no artigo 6.7 da Orde TMS/368/2019, do 28 de marzo.
A xustificación por parte das entidades solicitantes de non estar incursas en ningunha das anteditas circunstancias realizarase mediante unha declaración responsable incluída no modelo de solicitude definido no anexo II de cada convocatoria, cuxo contido deberá respectar o que establece o artigo 69 da Lei 39/2015, do 1 de outubro, do procedemento administrativo común das administracións públicas, así como referirse á capacidade suficiente, en termos económicos, técnicos, de recursos humanos, materiais e organizativos, e de aulas, talleres e instalacións en xeral, para asumir a xestión da totalidade dos cursos que solicita, que dispón da documentación que acredita tal cumprimento e que a porá á disposición da Administración cando lle sexa requirida, ademais de que se compromete a manter os ditos requisitos durante todo o período de tempo inherente ao recoñecemento de tal dereito.
Para os efectos de velar pola dispoñibilidade das instalacións necesarias para executar o programa formativo, as solicitudes que presenten as entidades non poderán planificar o uso dunha aula física solapando as datas e horas de impartición de diferentes accións formativas ou de máis dun grupo dunha acción formativa.
7. Unha entidade de formación non poderá solicitar por convocatoria subvencións por importe superior a 1,5 veces a súa capacidade económica e financeira, que virá determinada polo volume anual de facturación e xestión da actividades de formación referido ao ano de maior volume dos tres exercicios anteriores ao do ano de publicación da correspondente convocatoria.
Naqueles casos en que as entidades de formación, pola data da súa constitución, non poidan acreditar o requirido no parágrafo anterior terán como límite de solicitude máximo o equivalente a 1,5 veces o capital social desembolsado.
8. As solicitudes que vaian presentar as entidades e o número de accións formativas incluídas no programa de formación para o cal se solicita subvención deberán aliñar a oferta formativa que se prevé impartir coa demanda de formación do mercado laboral e do potencial alumnado a que van dirixidas.
Capítulo II
Inicio do procedemento.
Presentación e tramitación das solicitudes de subvención
Artigo 6. Forma e lugar de presentación das solicitudes
1. As solicitudes presentaranse obrigatoriamente por medios electrónicos a través do formulario electrónico normalizado dispoñible na aplicación SIFO, anexo II, accesible a través da sede electrónica da Xunta de Galicia no enderezo https://sede.xunta.gal ou no enderezo directo https://emprego.xunta.es/sifo-solicitudes
De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude ou a documentación presencialmente, será requirida para que a emende mediante a súa presentación electrónica. Para estes efectos, considerarase como data de presentación da solicitude aquela en que fose realizada a emenda.
No suposto de que a solicitude non cumpra os requisitos sinalados nas bases reguladoras e/ou a correspondente convocatoria, ou a documentación presentada conteña erros ou sexa insuficiente, requirirase a persoa solicitante para que, nun prazo de 10 días hábiles, emende a falta ou achegue os documentos preceptivos, con indicación de que, se así non o fixer, se considerará desistida da súa solicitude, logo de resolución que así o declare.
No caso de que o requirimento afecte só algunha das accións formativas do programa de formación, entenderanse como desistidas unicamente tales accións, e continuarase a tramitación da solicitude.
Non se admitirán a trámite e, por conseguinte, non existirá a posibilidade de emenda, das solicitudes presentadas fóra de prazo.
2. As solicitudes dirixiranse a Dirección Xeral de Formación para o Emprego e Orientación da Consellería de Promoción do Emprego e Igualdade.
As entidades de formación poderán formular solicitudes de subvención para cada un dos programas formativos que determine a correspondente convocatoria, e incluirán nelas, dentro da súa capacidade real de execución e con respecto aos límites e requisitos que se determinan nas bases reguladoras e na correspondente convocatoria, todas e cada unha das accións formativas e grupos do programa para os cales solicita subvención.
Para o suposto de superación, de ser o caso, do límite do importe de subvención máxima que se vai conceder a un mesmo número de censo ou para o suposto de que o importe da subvención concedida sexa inferior ao importe da subvención solicitada, as accións formativas para as cales se solicita subvención deberán ir ordenadas na solicitude en función da prioridade de impartición que lles outorgue a entidade solicitante, de xeito que os centros e as accións formativas se ordenen segundo criterio de maior a menor priorización, e poderá intercalarse centros no criterio de ordenación.
Non poderán formularse solicitudes de subvencións para impartir accións formativas que teñan previsto comezar nunha data anterior ao prazo ou data que, de ser o caso, se estableza para cada convocatoria.
3. A solicitude deberá presentarse xunto coa documentación complementaria relacionada no artigo 8 desta orde.
Artigo 7. Declaración responsable que forma parte da solicitude
1. Forma parte da solicitude a declaración responsable que se contén nela e na cal se farán constar os aspectos seguintes:
a) Que, en relación con outras axudas concedidas ou solicitadas:
• Non se solicitou nin se concedeu ningunha outra axuda para este mesmo proxecto e conceptos para os cales se solicita esta subvención.
• De se solicitaren e/ou concederen outras axudas para este mesmo proxecto e conceptos para os cales se solicita esta subvención, deberán relacionarse estas.
b) Que todos os datos contidos na solicitude e nos documentos que se xuntan son certos.
c) Que non está incursa en ningunha das circunstancias previstas no número 2 do artigo 13 da Lei 38/2003, do 17 de novembro, xeral de subvencións.
d) Que non está incursa en ningunha clase de inhabilitación para a obtención de axudas previstas nos números 2 e 3 do artigo 10 da Lei 9/2007, do 13 de xuño, de subvencións de Galicia, e no artigo 6.7 da Orde TMS/368/2019, do 28 de marzo.
e) Que está ao día no pagamento de obrigas por reintegro de subvencións, conforme o artigo 10.2.g) da Lei 9/2007, do 13 de xuño, de subvencións de Galicia, e o artigo 9 do Regulamento de subvencións de Galicia, aprobado polo Decreto 11/2009, do 8 de xaneiro.
f) Que os lugares e modalidades de impartición das accións formativas serán aqueles para os cales están inscritas para tal fin, nos termos do artigo 15 da Lei 30/2015, do 9 de setembro, e do artigo 6 da Orde TMS/368/2019, do 28 de marzo, pola que se regula o Sistema de formación profesional para o emprego no ámbito laboral, e que son aptos e cumpren e manterán as condicións e requisitos que exixe a normativa aplicable á correspondente especialidade formativa, concretamente a obriga de impartir a formación nos espazos e cos medios formativos inscritos para tal fin, así como a de manter as exixencias técnico-pedagóxicas, de instalacións, equipamento e medios humanos e tecnolóxicos tidos en conta para a inscrición da especialidade.
g) Que coñece as estipulacións da presente orde, que cumpre cos requisitos sinalados nela e que se compromete a destinar o importe da axuda ao obxecto da subvención indicada.
h) Que naqueles supostos en que nunha aula estea previsto impartir máis dunha especialidade as ditas especialidades poden impartirse cos mesmos medios.
i) Que a entidade conta con capacidade suficiente, en termos económicos, técnicos, de recursos humanos, materiais e organizativos, así como, de ser o caso, de aulas, talleres e instalacións en xeral, para asumir na súa totalidade a execución completa do programa de formación que solicita.
j) Que a entidade dispón da documentación que acredita o cumprimento dos anteriores aspectos e que a porá á disposición da Administración cando lle sexa requirida, ademais de que se compromete a manter os ditos requisitos durante todo o período de tempo inherente ao recoñecemento de tal dereito.
k) Que, de acordo co establecido no artigo 5.7 desta orde, o importe da subvención solicitado non é superior a 1,5 veces a súa capacidade económica e financeira, determinada polo volume anual de facturación e xestión de actividades de formación referido ao ano de maior volume dos tres exercicios anteriores ao do ano de publicación da correspondente convocatoria ou que, se pola data de constitución da entidade non se pode acreditar a dita cifra, o límite do dito importe non supera o equivalente a 1,5 veces o capital social desembolsado.
l) Que, de ser o caso e de acordo co disposto no artigo 21.10 da presente orde, as pegadas dixitais do alumnado e persoal docente rexistradas pola propia entidade formadora para o seguimento e control das actividades formativas presenciais ou daquelas outras actividades en que expresamente se estableza se corresponden coas das persoas que din ser.
2. A presentación dunha declaración responsable que falsee ou oculte circunstancias que impidan ou limiten a concesión da subvención ou o seu pagamento, así como que alteren a puntuación obtida na baremación, terá a consideración dunha infracción moi grave nos termos do artigo 56 da Lei 9/2007, do 13 de xuño, de subvencións de Galicia, coas posibles consecuencias sancionadoras que se recollen na dita norma e no texto refundido da Lei sobre infraccións e sancións na orde social, aprobado polo Real decreto lexislativo 5/2000, do 4 de agosto.
Artigo 8. Documentación complementaria
1. As persoas interesadas deberán achegar coa solicitude, anexo II, a seguinte documentación:
a) Ficha das accións formativas (anexo III).
b) Acreditación da capacidade legal suficiente para asinar a solicitude (escritura notarial de poderes ou calquera outro medio válido en dereito).
c) Copia da documentación de constitución da entidade solicitante ou dos estatutos sociais debidamente legalizados.
d) Acreditación documental de dispor dun sistema de calidade vixente e certificado por entidades acreditadas, norma ISO 9001 ou certificado de calidade e excelencia EFQM, no(s) correspondente(s) centro(s) de formación na data límite de presentación das solicitudes, relativo á súa actividade de formación profesional para o emprego.
e) Acreditación documental de que a entidade dispón dun plan de igualdade, de ser o caso:
• Para as empresas que teñan contratado persoal na Comunidade Autónoma de Galicia nun número inferior a 50 persoas traballadoras de media nos seis meses anteriores ao da data de entrada en vigor desta orde acreditación documental de que a empresa solicitante dispón, de ser o caso, dun plan de igualdade de xénero en vigor e inscrito no correspondente rexistro, ou acreditación de telo presentado e que está pendente de resolución, para a súa inscrición no rexistro na data límite de presentación da solicitude.
• Para as empresas que teñan contratado persoal na Comunidade Autónoma de Galicia nun número igual ou superior a 50 persoas traballadoras de media nos seis meses anteriores ao da data de entrada en vigor desta orde: acreditación de dispor dun plan de igualdade negociado, de acordo co previsto no artigo 5 do Real decreto 901/2020, do 13 de outubro, polo que se regulan os plans de igualdade e o seu rexistro e se modifica o Real decreto 713/2010, do 28 de maio, sobre rexistro e depósito de convenios e acordos colectivos de traballo, e ter implantado, cando menos, o 25 % das medidas previstas nel.
A acreditación do cumprimento da citada porcentaxe realizarase mediante a presentación dunha declaración responsable de ter implantado un mínimo do 25 % das medidas previstas no plan de Igualdade. A declaración estará asinada e deberá acompañarse dunha memoria explicativa en que se detallen as medidas do plan de igualdade xa implantadas e as pendentes de implantación, con indicación expresa da porcentaxe de medidas previstas implantadas en relación co total de medidas que inclúe o plan.
f) Naquelas accións formativas en que estea previsto o uso de aula virtual como medio complementario e adicional para desenvolver o proceso formativo, memoria explicativa detallada que acredite, de acordo co disposto no artigo 25 da presente orde, a viabilidade de impartir mediante aula virtual aqueles contidos do programa formativo que estea previsto realizar utilizando este medio.
A memoria deberá indicar expresamente que contidos se impartirán mediante aula virtual, a súa duración e as datas de realización, así como o calendario de sesións presenciais e de exames que se va realizar.
g) No caso de entidades que soliciten impartir especialidades formativas de fabricantes TIC, documentación que acredite que a entidade dispón da autorización do fabricante para a impartición das súas especialidades e para a acreditación oficial dos participantes da acción formativa.
h) Programa de formación, que conterá a seguinte información e documentación:
• Obxectivos da acción formativa que se vai impartir e demanda detectada.
• Colectivos destinatarios da formación e perfil das persoas participantes de cada acción formativa.
• Criterios de selección das persoas participantes.
• Perfil das persoas formadoras e as persoas titoras-formadoras que intervirán en cada acción formativa.
• Seguimento que se vai realizar, metodoloxía e actuacións de avaliación previstas.
• Mecanismos de difusión das accións formativas.
• Para os efectos de seguimento e control das actividades da acción formativa, naqueles cursos que se van impartir nas modalidades de teleformación ou mixta, deberanse proporcionar as claves e credenciais de acceso á correspondente plataforma web cos perfís de administrador/a, de titor/a-formador/a e de alumno/a.
• Para os supostos de accións formativas que se van impartir na modalidade de teleformación, memoria técnica acreditativa de que a tecnoloxía e/ou aplicación informática que se utilizará para verificar e acreditar a asistencia do persoal docente e titor, así como do alumnado, garante a correcta identificación das persoas e permite efectuar o seguimento do número de horas de conexión, a realización de exercicios prácticos e a realización e superación, de ser o caso, dos controis periódicos.
De conformidade co artigo 28.3 da Lei 39/2015, do 1 de outubro, do procedemento administrativo común das administracións públicas, non será necesario achegar os documentos que xa foran presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán solicitados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.
De forma excepcional, se non se puidesen obter os citados documentos, poderáselle solicitar novamente á persoa interesada a súa achega.
2. A documentación complementaria deberá presentarse electronicamente.
Se algunha das persoas interesadas presenta a documentación complementaria presencialmente, será requirida para que a emende a través da súa presentación electrónica. Para estes efectos, considerarase como data de presentación aquela en que sexa realizada a emenda.
As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o cal poderán requirir a exhibición do documento ou da información orixinal.
3. A documentación complementaria, tanto a presentada na solicitude como noutras fases do procedemento, achegarase electronicamente mediante a presentación do documento orixinal, de se tratar dun documento dixital, ou da imaxe electrónica do documento orixinal, de se tratar dun documento en papel. Neste último caso, a imaxe electrónica adaptarase ao previsto no Real decreto 4/2010, do 8 de xaneiro, polo que se regula o Esquema nacional de interoperabilidade no ámbito da Administración electrónica, e na Resolución do 19 de xullo de 2011, da Secretaría de Estado para a Función Pública, pola que se aproba a Norma técnica de interoperabilidade de dixitalización de documentos.
4. As imaxes electrónicas aplicarán os formatos establecidos para ficheiros de imaxe na Norma técnica de interoperabilidade do catálogo de estándares; o nivel de resolución mínimo para imaxes electrónicas será de 200 píxeles por polgada, tanto para as imaxes obtidas en branco e negro, cor ou gradación de grises; a imaxe electrónica será fiel ao documento orixe (respectará a xeometría do documento orixe en tamaños e proporcións, non conterá caracteres ou gráficos que non figurasen no documento de orixe e a súa xeración realizarase por un medio fotoeléctrico).
As imaxes electrónicas que acheguen as entidades interesadas ao procedemento administrativo terán eficacia, exclusivamente, no ámbito da actividade das administracións públicas.
As imaxes electrónicas presentadas garantirán a fidelidade co orixinal baixo a responsabilidade da persoa solicitante ou representante. A Administración poderá requirir a exhibición do documento orixinal para o cotexo da copia electrónica presentada, segundo o disposto na Lei 39/2015, do 1 de outubro, do procedemento administrativo común das administracións públicas.
Para estes efectos, a entidade interesada deberá conservar o documento orixinal durante o prazo de 5 anos desde a presentación da imaxe electrónica.
No caso de que algún dos documentos que se vaia presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada neste artigo.
A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.
5. Sempre que se realice a presentación de documentos separadamente da solicitude, deberase indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.
Artigo 9. Comprobación de datos
1. Para tramitar este procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:
a) DNI/NIE da persoa representante.
b) NIF da entidade solicitante.
c) Certificado de estar ao día no pagamento de obrigas tributarias coa AEAT.
d) Certificado de estar ao día no pagamento coa Seguridade Social.
e) Certificado de estar ao día no pagamento de obrigas tributarias coa Atriga.
2. No caso de que as persoas interesadas se opoñan a esta consulta, deberán indicalo no recadro habilitado no formulario correspondente e achegar os correspondentes documentos.
Cando así o exixa a normativa aplicable, solicitarase o consentimento expreso da persoa interesada para realizar a consulta.
3. Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas que presenten os documentos correspondentes.
Artigo 10. Trámites posteriores á presentación da solicitude e documentación complementaria
Todos os trámites administrativos que as persoas interesadas deban efectuar tras a presentación da solicitude deberán ser realizados electronicamente a través da aplicación informática SIFO, e deberá adecuarse a presentación da documentación derivada das notificacións efectuadas pola Administración ao disposto no artigo 12.6 da presente orde.
Artigo 11. Prazo de presentación de solicitudes
Cada convocatoria determinará o prazo de presentación de solicitudes, que non poderá ser inferior a un mes.
Se o último día do prazo for inhábil, entenderase prorrogado ao primeiro día hábil seguinte e, se no mes de vencemento non houber día equivalente ao inicial do cómputo, entenderase que o prazo finaliza o último día do mes.
Artigo 12. Réxime das notificacións
1. As notificacións de resolucións e actos administrativos efectuaranse só por medios electrónicos, nos termos previstos na normativa reguladora do procedemento administrativo común.
2. De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas realizaranse mediante a comparecencia na sede electrónica da Xunta de Galicia e a través do Sistema de notificación electrónica de Galicia-Notifica.gal.
Este sistema remitiralles ás persoas interesadas avisos da posta á disposición das notificacións á conta de correo e/ou teléfono móbil que consten na solicitude.
Estes avisos non terán, en ningún caso, efectos de notificación practicada e a súa falta non impedirá que a notificación sexa considerada plenamente válida.
3. De conformidade co artigo 47 da Lei 4/2019, do 17 de xullo, de administración dixital de Galicia, as persoas interesadas deberán crear e manter o seu enderezo electrónico habilitado único a través do Sistema de notificación electrónica de Galicia-Notifica.gal, para todos os procedementos administrativos tramitados pola Administración xeral e as entidades instrumentais do sector público autonómico.
En todo caso, a Administración xeral e as entidades do sector público autonómico de Galicia poderán de oficio, crear o indicado enderezo, para os efectos de asegurar o cumprimento por parte das persoas interesadas da súa obriga de relacionarse por medios electrónicos.
4. As notificacións entenderanse efectuadas no momento en que se produza o acceso ao seu contido, e entenderanse rexeitadas cando transcorran dez días naturais desde a posta á disposición da notificación sen que se acceda ao seu contido.
5. Se o envío da notificación electrónica non for posible por problemas técnicos, a Administración xeral e do sector público autonómico realizará a notificación polos medios previstos na normativa reguladora do procedemento administrativo común.
6. A presentación de documentación derivada das notificacións efectuadas será realizada exclusivamente mediante o programa informático SIFO ou, de ser o caso, a través do programa de notificación xenérico do aplicativo Forman, https://emprego.xunta.es/forman, que disporá dun punto único para efectuar todos os envíos de documentación á Administración.
Unicamente no caso de que non for posible, por problemas técnicos acreditados que imposibilitaren a presentación de documentación polos medios establecidos no parágrafo anterior, a persoa interesada podería realizar a súa presentación por medio dos trámites ordinarios da sede electrónica da Xunta de Galicia, https://sede.xunta.gal, a través do procedemento PR004A.
Artigo 13. Transparencia e bo goberno
1. Deberá darse cumprimento ás obrigas de transparencia contidas no artigo 17 da Lei 1/2016, do 18 de xaneiro, de transparencia e bo goberno, e no artigo 15 da Lei 9/2007, do 13 de xuño, de subvencións de Galicia.
2. En virtude do disposto no artigo 4 da Lei 1/2016, do 18 de xaneiro, de transparencia e bo goberno, as persoas físicas e xurídicas beneficiarias de subvencións están obrigadas a lle subministrar á Administración, ao organismo ou á entidade das previstas no artigo 3.1 da Lei 1/2016, do 18 de xaneiro, a que estean vinculadas, logo de requirimento, toda a información necesaria para o cumprimento por aquela das obrigas previstas no título I da citada lei.
Capítulo III
Instrución e resolución do procedemento
Artigo 14. Procedemento
1. O órgano instrutor do procedemento é a Subdirección Xeral de Formación para o Emprego.
2. O procedemento de concesión das subvencións reguladas nesta orde será o de concorrencia competitiva.
Na instrución dos expedientes será de aplicación o establecido no artigo 21 da Lei 9/2007, do 13 de xuño, de subvencións de Galicia, coas concrecións que se establecen na presente orde.
3. Recibidas as solicitudes, procederase ao seu estudo e revisión.
Serán obxecto de desestimación aquelas solicitudes que non reúnan os requisitos exixidos para a concesión da subvención.
Unha vez analizada a documentación achegada polas entidades solicitantes, os expedientes que cumpran os requisitos para a obtención da subvención remitiraas o órgano instrutor, xunto cun informe sobre o proceso de tramitación e instrución das solicitudes, á Comisión de Valoración, coa finalidade de que poida realizar o seu estudo e cualificación aplicando os criterios de avaliación técnica establecidos no artigo 15 desta orde.
A Comisión de Avaliación, atendendo aos criterios de valoración técnica, emitirá unha acta en que se concrete a prelación das solicitudes como resultado da puntuación obtida no proceso de avaliación, así como a proposta de entidades beneficiarias da subvención.
Esta proposta incluirá a contía da axuda que lles corresponde e os anexos coas puntuacións obtidas polos programas formativos que cumpran cos requisitos para ser avaliados.
4. A Comisión de Avaliación estará composta pola persoa titular da Subdirección Xeral de Formación para o Emprego, que a presidirá, e serán vogais dúas persoas técnicas da Dirección Xeral de Formación para o Emprego e Orientación, das cales unha actuará como secretaria.
A Comisión poderá incorporar persoas asesoras e técnicas expertas na materia que se vai tratar, que non terán a condición de membros da Comisión.
Se, por calquera causa, no momento en que a Comisión de Valoración teña que reunirse algunha das persoas que a compoñen non pode asistir, será substituída pola persoa que para tales efectos designe a persoa titular da Dirección Xeral de Formación para o Emprego e Orientación.
5. No suposto de opoñerse á consulta ou, de ser o caso, de non prestar o consentimento expreso a que se refire o artigo 9 desta orde, as entidades deberán acreditar, tanto antes de ditarse a resolución de concesión como de proceder ao cobramento das subvencións, que están ao día no cumprimento das súas obrigas tributarias e da Seguridade Social e que non teñen pendente de pagamento ningunha débeda, por ningún concepto, coa Administración pública da Comunidade Autónoma de Galicia.
No suposto recollidos, no artigo 11 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, esta obriga poderá ser substituída pola declaración responsable da persoa solicitante de estar ao día no cumprimento das obrigas tributarias ou fronte á Seguridade Social e de non ter pendente de pagamento ningunha débeda coa Administración pública da Comunidade Autónoma de Galicia.
6. Á vista dos expedientes, logo da súa baremación e dos informes preceptivos que se emitan, o órgano instrutor formulará un informe coa proposta de resolución.
A proposta xerarase en función da puntuación obtida como consecuencia do proceso de avaliación técnica.
Esta proposta de resolución irá acompañada dun anexo en que figurarán as anualidades, totais ou parciais, de ser o caso, con indicación do orzamento imputado a cada anualidade, para a realización das actividades formativas, e segundo información achegada pola persoa solicitante.
7. Á vista da proposta de resolución, o órgano competente, de acordo co disposto no artigo 17 desta orde, ditará as resolucións correspondentes.
8. De se produciren dispoñibilidades de crédito como consecuencia da asignación ou da redistribución de fondos para o financiamento dos programas de formación para o emprego, nos supostos e nas condicións previstos nos artigos 30 e 31 do Decreto 11/2009, do 8 de xaneiro, polo que se aproba o Regulamento de subvencións de Galicia, ou como consecuencia de posibles minoracións, renuncias ou modificacións nas subvencións concedidas, o órgano instrutor poderá realizar novas propostas de concesión de proxectos continuando coa orde de prelación fixada pola Comisión de Valoración ata esgotar o novo crédito, de maneira que a subvención se concederá á seguinte solicitude segundo a orde prelación e sempre que se liberase crédito abondo para atendela e que, no momento en que se produza, sexa posible a súa execución de acordo coas condicións da convocatoria e as normas de execución orzamentaria. As subvencións concedidas co crédito liberado deberán ser aceptadas no prazo de 10 días, de acordo co disposto no artigo 17.4 desta orde.
En ningún caso se poderá conceder a subvención a unha solicitude que ocupe un lugar posterior na orde de prelación a outra que non poida atenderse por resultar insuficiente o crédito dispoñible.
9. Nos supostos en que no referido procedemento de selección das accións formativas se esgote o crédito dalgunha anualidade orzamentaria da correspondente convocatoria, entenderase que se poderán seleccionar as accións formativas do programa formativo para seren impartidas noutro exercicio orzamentario diferente do solicitado, salvo que na súa solicitude a entidade manifeste expresamente que non se acepta cambio de anualidade, caso en que se entenderá que desisten da súa solicitude de axuda para a acción formativa afectada, polo que quedará excluída da selección, con independencia da puntuación obtida.
10. Así mesmo, de incluír a convocatoria diferentes tipos de programas de formación e no caso de que non se esgotase o crédito reservado para algún deles, o crédito sobrante agregarase aos outros programas formativos segundo o criterio de repartición que se estableza na propia convocatoria. No caso de que esta non dispoña nada ao respecto, o sistema de repartición será proporcional entre eles.
Artigo 15. Criterios de avaliación técnica
1. A avaliación das solicitudes realizarase de acordo cos seguintes criterios:
a) Pola adecuación da oferta formativa do programa de formación ás familias e áreas profesionais, ou especialidades formativas consideradas prioritarias nas correspondentes convocatorias de subvencións: ata 30 puntos.
A determinación da puntuación será o resultado de aplicar a seguinte formula:
∑ (nº total de persoas participantes en especialidades consideradas prioritarias * 30) / (nº total de persoas participantes no programa formativo).
b) Polo grao de execución das accións formativas: ata 10 puntos.
Outorgarase inicialmente un máximo de 10 puntos a todas as entidades que concorran a cada convocatoria. Esta puntuación inicial reducirase en función do número de grupos impartidos e do número de persoas alumnas participantes, aplicando os criterios de cálculo que a seguir se relacionan:
1. Polo número de grupos efectivamente impartidos: ata 5 puntos.
A determinación da puntuación será o resultado de aplicar a seguinte formula:
5 * (nº de grupos de formación efectivamente impartidos / nº de grupos de formación previstos na solicitude de subvención).
2. Polo número de persoas que participaron na formación: ata 5 puntos.
A determinación da puntuación será o resultado de aplicar a seguinte formula:
5 * (nº de persoas efectivamente participantes / nº de persoas participantes previstas na solicitude de subvención).
A aplicación das fórmulas relacionadas nos números 1 e 2 do punto 1.b) realizarase sobre o total dos programas formativos subvencionados á entidade na correspondente convocatoria ou convocatorias do procedemento TR302A que nas sucesivas convocatorias se determinen.
Non será de aplicación a redución de puntuación establecida neste punto no suposto de que o grao de execución do programa formativo, computado polo número total de persoas alumnas que participaron nel, sexa igual ou superior ao 80 % do alumnado que, segundo o establecido na resolución de concesión de subvención, a entidade se comprometeu a formar.
c) Pola diversificación territorial das persoas participantes na programación formativa: ata 10 puntos.
Para a valoración desta epígrafe terase en conta a distribución territorial das persoas participantes no programa de formación:
• Polo compromiso de que no programa de formación participen persoas traballadoras das catro provincias galegas: 10 puntos.
• Polo compromiso de que no programa de formación participen persoas traballadoras das tres provincias galegas: 7,5 puntos.
• Polo compromiso de que no programa de formación participen persoas traballadoras de dúas provincias galegas: 5 puntos.
• Polo compromiso de que no programa de formación participen persoas traballadoras dunha provincia galega: 2,5 puntos.
As puntuacións que se van asignar por este punto en ningún caso serán acumulativas.
Para estes efectos, entenderase que hai participación de persoas traballadoras dunha provincia cando no programa de formación a porcentaxe de participación de persoas alumnas desa provincia en relación co total do alumnado participante é igual ou superior á porcentaxe que para cada convocatoria se determine.
Para as persoas traballadoras ocupadas, a consideración da provincia de pertenza determinarase en función da localización do seu centro de traballo ou, no caso dos autónomos, do domicilio fiscal. Para as persoas traballadoras desempregadas terase en consideración o seu enderezo de intermediación laboral. No suposto de persoas mozas inscritas no ficheiro do Sistema nacional de garantía xuvenil ás cales non sexan de aplicación os criterios anteriores, a determinación da provincia realizarase en función da provincia en que se localice o seu enderezo habitual.
d) Pola diversificación das accións formativas que configuran o programa formativo co obxecto de evitar a concentración da formación e primar a variedade da oferta formativa: ata 15 puntos, desagregados de acordo cos seguintes criterios:
1. Segundo as especialidades formativas diferentes incluídas na solicitude do programa formativo:
• A solicitude inclúe máis de oito especialidades formativas diferentes: 10 puntos.
• A solicitude inclúe 7 ou 8 especialidades formativas diferentes: 7,5 puntos.
• A solicitude inclúe 5 ou 6 especialidades formativas diferentes: 5 puntos.
• A solicitude inclúe 3 ou 4 especialidades formativas diferentes: 2,5 puntos.
2. Segundo as áreas profesionais diferentes incluídas na solicitude do programa formativo:
• A solicitude inclúe catro ou máis áreas profesionais diferentes: 5 puntos.
• A solicitude inclúe dúas ou tres áreas profesionais diferentes: 2,5 puntos.
e) Polo grao de ruralidade das zonas onde se localicen as instalacións do centro en que se realizará a execución da parte presencial do programa da acción formativa: ata 10 puntos.
O grao de ruralidade das zonas de Galicia será o definido polo Instituto Galego de Estatística en atención á densidade de poboación segundo a clasificación en ZPP, ZIP ou ZDP do grao de urbanización atendendo ao GU 2016.
A puntuación distribuirase segundo a urbanización, do seguinte xeito:
• As entidades que teñan os centros en zonas densamente poboadas (ZDP) definidas como conxunto contiguo de áreas locais (AL) de densidade de poboación superior a 500 hab./km2 e unha poboación total para a zona de, polo menos, 50.000 habitantes: 0 puntos.
Asignarase esta mesma puntuación a aquelas accións formativas que se impartan na modalidade de teleformación.
• As entidades que teñan os centros en zonas intermedias (ZIP), definidas como o conxunto de áreas locais (AL) que non pertencen a unha zona densamente poboada onde cada unha conta cunha densidade de poboación superior a 100 hab./km2 e/ou ben a poboación total da zona é superior a 50.000 habitantes ou ben é adxacente a unha zona densamente poboada: 5 puntos.
• As entidades que teñan os centros en zonas pouco poboadas (ZPP), definidas como grupos de áreas locais (AL) que non pertencen a zonas densamente poboadas ou zonas intermedias: 10 puntos.
Esta información pode ser consultada na seguinte páxina web do Instituto Galego de Estatística: http://www.ige.eu/web/mostrar_paxina.jsp?paxina=003003001&idioma=gl
A determinación da puntuación será o resultado de aplicar a seguinte fórmula:
∑ (nº de grupos zonas ZDP ou teleformación * 0 puntos + nº de grupos zonas ZIP * 5 puntos + nº de grupos zonas ZPP * 10 puntos ) / nº total de grupos.
f) Pola capacidade acreditada da entidade para desenvolver a formación: ata 5 puntos.
Para estes efectos, valorarase a situación de cada un dos centros da entidade de formación na data límite de presentación da solicitude, con respecto á implantación dun sistema ou modelo de calidade, vixente e certificado por entidades certificadoras acreditadas, cuxo alcance inclúa expresamente a xestión da actividade de formación profesional para o emprego, norma ISO 9001 ou certificado de calidade e excelencia EFQM.
A determinación da puntuación será o resultado de aplicar a seguinte fórmula:
∑ (nº total de grupos para impartir en centros que teñen implantado un sistema ou modelo de calidade * 5) / (nº total de grupos do programa formativo).
g) Polo compromiso de participación no programa formativo de colectivos considerados prioritarios, agás persoas con discapacidade: ata 10 puntos.
Para estes efectos, terán a consideración de colectivos prioritarios os seguintes:
• Mulleres.
• Vítimas de violencia de xénero. Para estes efectos, entenderanse por vítimas de violencia de xénero aquelas que teñan tal consideración de acordo co disposto no artigo 1 da Lei 11/2007, do 27 de xullo, galega para a prevención e o tratamento integral da violencia de xénero. Inclúense dentro do concepto de violencia de xénero, en aplicación da Lei 14/2021, do 20 de xullo, e da Lei 15/2021, do 3 de decembro, modificadoras ambas da Lei 11/2007, a violencia vicaria e a violencia dixital.
A acreditación da situación de violencia de xénero, ademais das maneiras previstas no Real decreto 1917/2008, do 21 de novembro, polo que se aproba o programa de inserción sociolaboral para mulleres vítimas de violencia de xénero, poderá acreditarse polas formas previstas no artigo 5 da Lei 11/2007, do 27 de xullo.
• Persoas maiores de 45 anos. Para estes efectos, calcularase a idade desde o día de inicio da acción formativa.
• Mozas e mozos menores de 30 anos. Para estes efectos, calcularase a idade desde o día de inicio da acción formativa.
• Persoas traballadoras con contrato a tempo parcial.
• Persoas emigrantes retornadas. Para estes efectos, terán a condición de persoas emigrantes retornadas as persoas demandantes de emprego con nacionalidade española e inscritas no Servizo Público de Emprego que teñan acreditado ante o dito servizo a estadía no estranxeiro para residir ou traballar por un período mínimo de 3 anos. Esta condición manterase durante os 5 anos seguintes á data do retorno a España.
• Persoas traballadoras inmersas en expedientes de regulación temporal de emprego (ERTE).
A puntuación por este punto asignarase segundo o seguinte criterio e en relación co total de participantes certificados na xustificación do programa formativo:
• Compromiso de participación menor ao 50 %: 0 puntos.
• Compromiso de participación maior ou igual ao 50 % e inferior ao 60 %: 2,5 puntos.
• Compromiso de participación maior ou igual ao 60 % e inferior ao 70 %: 5 puntos.
• Compromiso de participación maior ou igual ao 70 % e inferior ao 80 %: 7,5 puntos.
• Compromiso de participación igual ou superior ao 80 %: 10 puntos.
Se un participante reúne varias características que o encadran en diversos colectivos considerados prioritarios, unicamente se considerará que pertence a un deles.
h) Polo compromiso adquirido de participación de persoas con discapacidade física, psíquica ou sensorial, recoñecida por organismo competente, nas accións formativas incluídas no programa de formación: ata 5 puntos.
A determinación da puntuación será o resultado de aplicar a seguinte fórmula:
(nº de grupos de persoas con discapacidade / nº total de grupos do programa formativo) * 5 puntos).
Os grupos de persoas con discapacidade serán aqueles en que a entidade se compromete a que o 100 % das persoas participantes no grupo sexan persoas con discapacidade física, psíquica ou sensorial recoñecida polo organismo competente.
i) Polo compromiso do uso do idioma galego na impartición das accións formativas do programa formativo: ata 3 puntos, desagregados nas seguintes subepígrafes:
1. Atendendo á modalidade de impartición:
• No caso de que o programa formativo imparta a totalidade das accións formativas na modalidade presencial: polo emprego da lingua galega por parte do persoal docente durante o 100 % das horas lectivas de formación: 1,5 puntos.
• No caso de que o programa formativo imparta a totalidade das accións formativas na modalidade de teleformación: pola dispoñibilidade da interface da plataforma de teleformación e a realización das titorías en lingua galega: 1,5 puntos.
• No caso de que o programa formativo imparta parte das accións formativas na modalidade de teleformación e parte na modalidade presencial: polo emprego na modalidade presencial da lingua galega polo persoal docente durante o 100 % das horas lectivas de formación e pola dispoñibilidade da interface da plataforma de teleformación e a realización das titorías no idioma galego: 1,5 puntos.
2. Independentemente da modalidade de impartición, pola subministración ao alumnado da totalidade dos contidos didácticos, sexa en soporte de papel ou electrónico, en lingua galega: 1,5 puntos.
Para estes efectos, non se entenderán como material de contidos didácticos os folletos informativos ou manuais de instrucións redactados polos fabricantes ou subministradores de equipamento dos cales non exista versión en galego.
j) Por dispor a entidade solicitante dun plan de igualdade: 3 puntos.
Para a obtención desta puntuación deberá acreditarse o cumprimento dalgún dos seguintes requisitos:
• Para as empresas que teñan contratado persoal na Comunidade Autónoma de Galicia nun número inferior de 50 persoas traballadoras de media nos seis meses anteriores ao da data de entrada en vigor da orde dispor dun plan de igualdade de xénero en vigor e inscrito no correspondente rexistro, ou acreditación de telo presentado, e que está pendente de resolución, para a súa inscrición no rexistro na data límite de presentación da solicitude.
• Para as empresas que teñan contratado persoal na Comunidade Autónoma de Galicia nun número igual ou superior a 50 persoas traballadoras de media nos seis meses anteriores ao da data de entrada en vigor da orde: dispor dun plan de igualdade negociado, de acordo co previsto no artigo 5 do Real decreto 901/2020, do 13 de outubro, polo que se regulan os plans de igualdade e o seu rexistro e se modifica o Real decreto 713/2010, do 28 de maio, sobre rexistro e depósito de convenios e acordos colectivos de traballo, e ter implantadas, cando menos, o 25 % das medidas previstas nel.
k) Polo compromiso da entidade ou centro de colaborar na xestión das subvencións en concepto de bolsas e axudas ás cales ten dereito o alumnado desempregado que participe nas accións formativas do programa formativo (procedemento TR301V): 3 puntos.
Este compromiso concrétase nos seguintes apartados:
• Informar adecuadamente o alumnado, en tempo e forma, dos dereitos que posúen en canto á percepción de bolsas e axudas por asistir á actividade formativa, así como dos prazos para presentar a solicitude e da documentación necesaria.
• Formular a solicitude de subvención en concepto de bolsa e axuda en representación da persoa interesada e remitir a documentación complementaria necesaria por medios electrónicos.
• Elixir a opción de notificación por vía electrónica, así como colaborar coa Administración na contestación aos requirimentos de corrección das solicitudes e, de ser o caso, actualizar dilixentemente e antes dos límites establecidos a información para a tramitación e xestión das bolsas e axudas na aplicación informática SIFO.
O compromiso de colaboración da xestión de bolsas e axudas deberá presentarse segundo o modelo que figura no anexo II, modelo de solicitude, de cada convocatoria.
Esta colaboración non substitúe as obrigas que nesta materia, segundo a normativa estatal e a correspondente convocatoria de bolsas e axudas de aplicación, teñen os centros e entidades de formación.
2. En caso de empate na puntuación obtida por diferentes solicitudes, terán preferencia aquelas que teñan mellor puntuación de entre os criterios de avaliación técnica descritos nos números 1.a), 1.b), 1.c) e 1.d) deste artigo e segundo a ordenación en que se relacionan. De persistir o empate, aplicarase como criterio de selección a data e hora de presentación da solicitude.
3. As sucesivas convocatorias publicadas ao abeiro do disposto nesta orde de bases reguladoras poderán incluír valoracións baseadas en medias ponderadas de satisfacción do alumnado en relación cos resultados de convocatorias anteriores, ou na porcentaxe de alumnado formado no programa formativo en relación co alumnado inicialmente previsto na solicitude ou co alumnado participante.
A puntuación máxima que se vai asignar por cada unha destas epígrafes será de 10 puntos.
4. Nas futuras convocatorias poderá ser obxecto de puntuación negativa, ata un máximo de -10 puntos, o incumprimento polas entidades do compromiso de colaboración na xestión das subvencións en concepto de bolsas e axudas do alumnado.
Non será de aplicación este punto cando a entidade comunique que o incumprimento da colaboración está motivado pola negativa das persoas alumnas a recibir o dito apoio na xestión da súa bolsa ou axuda. Para os efectos de acreditar esta negativa, deberá quedar constancia escrita asinada polo alumnado afectado en que se manifeste que rexeita a colaboración ofrecida pola entidade, caso en que non procederá ningunha minoración sobre a puntuación acadada.
Para determinar a puntuación negativa que, de ser o caso, corresponda, aplicarase o seguinte criterio de cálculo sobre a totalidade das accións formativas executadas e para o alumnado que inicia a actividade de formación:
1) Calcúlase a porcentaxe do alumnado respecto do cal se incumpriu o compromiso de colaboración, en relación co número total de persoas participantes no programa formativo con dereito a bolsas e axudas.
2) A porcentaxe de incumprimento do compromiso de colaboración obtida multiplícase pola penalización máxima expresada en puntos e o valor resultante será a puntuación de penalización.
Artigo 16. Determinación da subvención
1. O anexo I de cada convocatoria incluirá os módulos económicos específicos establecidos como límite máximo que se solicitará para cada familia profesional ou especialidade formativa, de acordo co disposto no artigo 3.1 da Orde TMS/368/2019, do 28 de marzo.
Para os efectos do previsto nesta orde, enténdese por módulo económico o custo por participante e hora de formación que poderá ser obxecto de financiamento público.
2. A contía da subvención que se vai conceder por cada acción formativa calcularase en función do número de participantes previstos, do número de horas do programa formativo e dos módulos económicos específicos solicitados por participante e hora de formación recollidos, para cada familia, área profesional e/ou especialidade, segundo estableza a correspondente convocatoria, e en función da modalidade de impartición, anexo I.
Na formación que se vai impartir na modalidade mixta aplicaranse os módulos correspondentes en función do número de horas de cada tipo de modalidade formativa.
Os módulos económicos que se van aplicar na valoración económica dos módulos transversais serán os mesmos que os correspondentes aos contidos específicos da acción formativa para a modalidade de impartición en que os módulos transversais se realicen.
3. As sucesivas convocatorias que se publiquen ao abeiro desta orde de bases poderán establecer límites por entidade e/ou censo de formación respecto á porcentaxe de subvención de que poderán ser beneficiarias en relación co crédito orzamentario dispoñible da convocatoria.
Así mesmo, poderán exixir unha puntuación mínima, consecuencia da valoración técnica da solicitude, para que unha entidade poida ser beneficiaria da subvención.
4. Realizada a acción formativa, a liquidación da subvención realizarase en función do alumnado asistente, segundo a súa consideración de participante, formado ou aprobado, nos termos recollidos no capítulo V desta orde.
En ningún caso a liquidación poderá superar a contía da subvención inicialmente concedida.
Artigo 17. Resolución
1. A resolución dos expedientes de axudas corresponderalle, unha vez fiscalizada a proposta pola intervención competente, á persoa titular da Dirección Xeral de Formación para o Emprego e Orientación, por delegación da persoa titular da consellería.
2. O prazo para resolver e notificar será de tres meses. O dito prazo computarase desde a data de remate do prazo de presentación de solicitudes de subvencións indicado na correspondente convocatoria.
Transcorrido o devandito prazo sen que se dite resolución expresa, entenderase desestimada a solicitude, de acordo co establecido no artigo 23.5 da Lei 9/2007, do 13 de xuño, de subvencións de Galicia, e co disposto no artigo 25 da Lei 39/2015, do 1 de outubro, do procedemento administrativo común das administracións públicas.
3. A resolución dos expedientes comunicaráselle á Comisión Galega de Formación Profesional Continua.
4. Notificada a resolución definitiva polo órgano competente, a entidade proposta como beneficiaria disporá dun prazo de dez días hábiles para a súa aceptación, a través da aplicación informática SIFO; transcorrido este sen que se produciza manifestación expresa, entenderase, de acordo co disposto no artigo 21.5 da Lei 9/2007, do 13 de xuño, de subvencións de Galicia, tacitamente aceptada.
A aceptación da concesión da subvención implica que a entidade interesada recoñece que conta con capacidade suficiente, en termos económicos, técnicos, de recursos humanos, materiais e organizativos, para asumir na súa totalidade a execución completa das accións formativas concedidas incluídas no programa formativo, así como que se compromete a dispor deles ao longo de todo o período de execución da actividade subvencionable.
No suposto de que as entidades beneficiarias decidan renunciar, parcial ou totalmente, de xeito sobrevido con posterioridade á súa aceptación a través do aplicativo SIFO, só se considerarán causas xustificadas as seguintes:
• Imposibilidade acreditada de atopar alumnado suficiente para comezar o curso. Esta imposibilidade xustificarase mediante unha memoria explicativa debidamente documentada das actuacións realizadas e dos medios aplicados para a cobertura das prazas.
• Imposibilidade acreditada de contratar persoal docente que cumpra os requisitos exixidos para impartir a especialidade. Esta imposibilidade xustificarase mediante unha memoria explicativa debidamente documentada das actuacións realizadas e dos medios aplicados para a contratación do persoal docente.
• Por circunstancias de gravidade e excepcionalidade acreditada.
A entidade estará obrigada a comunicar a súa renuncia motivada no prazo cinco días hábiles desde que se produza a circunstancia causante e cunha antelación mínima de tres meses respecto á data de remate do prazo de execución das accións formativas que estableza a convocatoria, e deberá presentarse a través da aplicación informática de notificación xenérica Forman, https://emprego.xunta.es/forman, accedendo ao menú «Documentación -> Remitir documentación», para, tras indicar o expediente, a acción formativa e, de ser o caso, o grupo correspondente, seleccionar no campo «Tipo de anexo» a epígrafe «Solicitude de renuncia a curso».
No caso de non producirse unha renuncia expresa, se a acción formativa non dá comezo na data de inicio prevista, ben inicialmente ou ben nas sucesivas solicitudes de cambio aceptadas pola Administración, transcorridos cinco días hábiles desde que se debería ter iniciado, entenderase feita unha renuncia tácita, polo que o órgano xestor poderá iniciar a tramitación da dita renuncia.
As renuncias presentadas polas entidades con posterioridade á aceptación da subvención non eximirán de posibles minoracións na puntuación da avaliación técnica que se vai asignar ás solicitantes polo grao de execución do programa formativo, se así se establece en sucesivas convocatorias.
A Dirección Xeral de Formación para o Emprego e Orientación deberá ditar resolución expresa sobre a renuncia, nos termos preceptuados pola Lei 39/2015, do 1 de outubro, do procedemento administrativo común das administracións públicas.
5. Tanto nos supostos de rexeitamento expreso como no de renuncias sobrevidas, poderán ditarse novas resolucións nos termos da disposición adicional primeira, coa finalidade de seleccionar outras accións formativas segundo a puntuación obtida. As accións formativas da entidade renunciante serán excluídas na súa totalidade do novo proceso de selección.
6. A resolución da concesión de subvención fixará expresamente a contía total concedida e a puntuación técnica obtida, así como a prohibición de subcontratación, e incorporará o correspondente programa de formación e as condicións, as obrigas e as determinacións accesorias a que deba estar suxeita a entidade beneficiaria.
Calquera modificación posterior referida á modificación de horas que afecte a repartición de orzamento entre diferentes anualidades deberá ser autorizada pola persoa titular da Dirección Xeral de Formación para o Emprego e Orientación e estará suxeita á dispoñibilidade de crédito.
7. Sen prexuízo do disposto no número anterior, as entidades poderán, por unha única vez e por incapacidade acreditada de atopar persoas alumnas para participar nas accións formativas subvencionadas, reconfigurar o programa formativo subvencionado. A reconfiguración, que deberá respectar o obxecto, condicións e finalidade da subvención, poderá solicitarse unha vez transcorrido un mes desde a data de aceptación da subvención e antes de que falten dous meses para o remate do prazo de execución das accións formativas incluídas no programa formativo subvencionado.
A imposibilidade de atopar alumnado xustificarase mediante unha memoria explicativa debidamente documentada das actuacións realizadas para a cobertura das prazas.
A autorización de reconfiguración estará suxeita ao cumprimento dos seguintes criterios:
• Non se poderá incrementar nin diminuír o número de participantes dunha acción formativa respecto aos establecidos na resolución de concesión da subvención.
• Non se poderán engadir accións formativas non incluídas na resolución de subvención, nin modificar a duración, contidos ou modalidade de impartición das concedidas.
• Poderase, tendo en conta as condicións establecidas na resolución, modificar o número de grupos e o número de participantes de cada un deles, previsto para cada acción formativa.
• Non poderán ser obxecto de reconfiguración grupos iniciados ou xa finalizados.
• Deberán respectarse as condicións que determinaron o cálculo da valoración técnica da solicitude e calquera outro límite e condición expresamente indicados na resolución.
8. En aplicación da Orde TES/26/2022, do 20 de xaneiro, pola que se modifica a Orde TMS/368/2019, do 28 de marzo, unha vez ditada a resolución de concesión, a persoa beneficiaria poderá solicitar a súa modificación ou modificacións. Calquera modificación, incluída a ampliación do prazo de execución do programa formativo, poderá solicitarse cando concorran circunstancias de toda índole, excepcionais e alleas á beneficiaria, especialmente por razóns sanitarias, catástrofes naturais ou calquera outra de natureza análoga que se poidan incluír na resolución da convocatoria e que imposibiliten a realización da formación nas condicións establecidas na resolución de concesión.
A petición deberá fundamentarse, mediante memoria xustificativa, en circunstancias sobrevidas tras a resolución e durante o prazo de execución da actividade subvencionada, e deberá formalizarse con carácter inmediato ao seu acaecemento e, en todo caso, antes do remate do citado prazo de execución.
As solicitudes de modificación resolveraas o órgano concedente da subvención. En todo caso, a modificación só poderá autorizarse se non dana dereitos de terceiros e non afecta a valoración técnica obtida pola solicitude presentada pola persoa beneficiaria.
O órgano competente ditará resolución motivada no prazo de dous meses desde a data en que a solicitude teña entrada no rexistro do órgano competente para a súa tramitación. Transcorrido este prazo sen notificarse resolución expresa, a solicitude entenderase como desestimada. As resolucións poderán retrotraer os seus efectos, como máximo, ao momento de presentación da solicitude de modificación.
Artigo 18. Recursos
As resolucións ditadas poñen fin á vía administrativa e contra elas poderá interpoñerse, potestativamente, recurso de reposición ante o órgano que ditou o acto, no prazo dun mes desde a súa notificación, se o acto for expreso, ou en calquera momento a partir do día seguinte a aquel en que se produza o acto presunto, se o acto non for expreso, de conformidade co que preceptúan os artigos 123 e 124 da Lei 39/2015, do 1 de outubro, do procedemento administrativo común das administracións públicas, ou directamente recurso contencioso-administrativo ante o órgano xurisdicional competente, no prazo de dous meses contados desde o día seguinte ao da súa notificación, de conformidade co establecido na Lei 29/1998, do 13 de xullo, reguladora da xurisdición contencioso-administrativa.
Artigo 19. Publicidade das subvencións
1. De acordo co establecido no artigo 14, letra ñ), da Lei 9/2007, do 13 de xuño, de subvencións de Galicia, as entidades beneficiarias quedan informadas da existencia do Rexistro Público de Subvencións e dos aspectos previstos na Lei orgánica 3/2018, do 5 de decembro, de protección de datos persoais e garantía dos dereitos dixitais.
2. Así mesmo, e tal como se recolle no artigo 15.1 da Lei 9/2007, do 13 de xuño, os órganos administrativos concedentes publicarán no Diario Oficial de Galicia as subvencións concedidas, con indicación da convocatoria, programa e crédito orzamentario a que se imputan, persoa beneficiaria, cantidade concedida e finalidade ou finalidades da subvención.
3. Igualmente, publicaranse na páxina web oficial da consellería, nos termos previstos no artigo 17 da Lei 1/2016, do 18 de xaneiro, de transparencia e bo goberno, polo que a presentación da solicitude leva implícita a autorización para o tratamento necesario dos datos das persoas beneficiarias e da súa publicación na citada páxina web.
Capítulo IV
Obrigas, dereitos e deberes
Artigo 20. Información e documentación para a xestión da execución das accións formativas
1. Os datos correspondentes á xestión das accións formativas deberán introducirse en liña a través da aplicación informática SIFO, que a Dirección Xeral de Formación para o Emprego e Orientación pon á disposición das entidades e centros de formación.
2. Como mínimo cinco días hábiles antes do inicio de cada grupo, deberá incorporarse a SIFO a seguinte información:
a) Programa formativo completo, agás naquelas especialidades que teñen programación modular.
b) A relación nominal do alumnado seleccionado, con indicación do seu DNI.
Para un grupo concreto dunha acción formativa, non se poderán compaxinar os perfís de persoa alumna e persoal docente, nin o de persoa alumna co de persoal de apoio da entidade.
c) Os instrumentos de avaliación válidos e fiables que se deberán aplicar, cun sistema de puntuación e corrección obxectivo.
d) A relación de persoal docente, con especificación dos seus DNI, que vai impartir a acción formativa, coa relación dos contidos e/ou módulos que impartirá cada un deles, facendo constar a súa formación metodolóxica e a documentación acreditativa da súa formación e experiencia cando esta non estea en poder da Consellería de Promoción do Emprego e Igualdade.
e) A identificación, con especificación do DNI, do persoal de preparación de clases e titorías para o reforzo formativo e a impartición da docencia.
f) A identificación do persoal, con especificación dos seus DNI, que asuma as tarefas de administración, dirección e apoio estritamente necesarias para a preparación, xestión e execución do grupo formativo.
g) As datas de inicio e remate do grupo, así como, de ser o caso, o horario de impartición.
h) A planificación temporal do grupo que, no caso de especialidades de estrutura modular, deberá detallarse para cada un dos módulos do curso, incluídos os transversais. Indicarase, así mesmo, a previsión de visitas didácticas para realizar ao longo do curso.
i) O seguro de accidentes das persoas participantes.
j) Indicación expresa e coincidente co manifestado na solicitude e ficha da acción formativa (anexos II e III) sobre que contidos e/ou módulos se van impartir en formación presencial, teleformación ou, de ser o caso, a través de aula virtual, con información da súa duración, datas de realización e calendario de sesións presenciais.
k) As chaves de acceso á correspondente plataforma informática de teleformación, se é o caso, para os efectos de seguimento e control do desenvolvemento do curso.
As chaves de acceso á plataforma de teleformación deberán permitir a conexión con perfil de persoa administradora, titora-formadora e/ou persoa alumna.
3. O día de inicio de cada grupo introducirase no sistema informático SIFO a certificación xustificativa do comezo da actividade formativa e, de ser o caso, das modificacións producidas respecto dos datos sinalados no número 2 deste artigo.
4. No momento da incorporación do alumnado á acción formativa requiriráselle a seguinte documentación, que se incluirá no aplicativo SIFO:
a) DNI.
b) Ficha individual.
Para os efectos de posibles notificacións, envío de diplomas ou remisión de certificados emitidos por solicitude da persoa interesada, a ficha individual deberá incluír o enderezo de correo electrónico das persoas participantes na actividade formativa.
c) Autorización asinada para a utilización dos seus datos persoais para o control e seguimento da acción formativa no marco da normativa de protección de datos. A autorización deberá conter a declaración responsable da persoa traballadora de que os documentos que achega son auténticos.
d) Documentación acreditativa do cumprimento dos requisitos de acceso para realizar a formación correspondente.
e) Documentación acreditativa necesaria para a exención dun módulo formativo ou dun módulo transversal, de ser o caso.
f) Documento informativo sobre dereitos e deberes, que se lle entregará ao alumnado debidamente asinado polas persoas participantes.
Así mesmo, de acordo co disposto no artigo 32, deberán comunicarse, nun prazo de tres días hábiles desde que sexan efectivas, as baixas de persoas alumnas e as datas en que estas se produzan.
5. Mensualmente, achegarase a seguinte información:
a) Nas actividades de carácter presencial, partes diarios e mensuais de asistencia no modelo xerado pola aplicación SIFO asinados polo alumnado participante e polo persoal formador ao inicio e ao final de cada xornada, así como da persoa responsable da entidade beneficiaria. Este partes deberán identificar as persoas participantes e expresar as horas realizadas diariamente por cada unha delas, e reflectirán expresamente o número de horas de ausencia.
b) Comunicación das incidencias producidas, de ser o caso.
6. No prazo dun mes desde o remate de cada grupo de formación, deberase:
a) Completar calquera información relativa ao remate da acción formativa no aplicativo SIFO.
b) No caso de accións formativas que se van impartir na modalidade de teleformación ou na modalidade mixta: informe dos controis de teleformación realizados e comunicación do seguintes datos referidos a cada control de aprendizaxe:
• Código que permita identificar a proba e os resultados conseguidos polas persoas participantes na plataforma de teleformación empregada para a execución da acción formativa.
• Indicativo de se a persoa participante realizou ou non a proba. En caso afirmativo, consignarase a data e a hora en que se desenvolveu o control de aprendizaxe, o tempo empregado para o seu desenvolvemento e o resultado obtido, con indicación da cualificación como superado ou non superado.
7. A non comunicación da información ou achega da documentación requirida nos prazos establecidos implicará a aplicación, de ser o caso, das minoracións recollidas no artigo 41 desta orde.
8. Toda persoa que fose validada como formadora por unha unidade administrativa dunha Administración pública competente en materia de formación profesional para o emprego para impartir unha determinada especialidade formativa entenderase que cumpre cos requisitos para impartila, na modalidade para a cal foi validada, en todo o territorio da Comunidade Autónoma de Galicia e durante o período que se determine en cada unha das convocatorias.
9. As persoas responsables da titorización-formación que impartan formación na modalidade de teleformación deberán acreditar o cumprimento dos requisitos específicos requiridos para cada especialidade e contar con formación ou experiencia verificable nesta modalidade.
Para acreditar a formación e/ou a experiencia requirida na modalidade de teleformación e na utilización das tecnoloxías da información e comunicación, exixirase, cando menos, unha formación de 30 horas ou unha experiencia de 60 horas na impartición de accións formativas nesta modalidade.
10. As persoas docentes encargadas da impartición do módulo de formación sobre igualdade de oportunidades entre mulleres e homes e corresponsabilidade familiar e doméstica, establecido no artigo 33 desta orde, deberán acreditar 150 horas de formación en materia de xénero ou de experiencia profesional ou docente en materia de xénero, e seranlles de aplicación os mesmos criterios de equiparación da acreditación no territorio da Comunidade Autónoma de Galicia, aplicables para as persoas docentes que impartan especialidades formativas.
Artigo 21. Obrigas das entidades beneficiarias
As entidades poderán executar as accións formativas do programa formativo no período comprendido entre a data de aceptación da resolución de concesión da subvención e a data límite que para cada convocatoria se determine.
Ademais das obrigas establecidas na Lei 9/2007, do 13 de xuño, de subvencións de Galicia, e das establecidas con carácter xeral para todos os centros e entidades de formación no artigo 7 do Decreto 106/2011, do 19 de maio, e sen prexuízo das determinadas na Lei 30/2015, do 9 de setembro; no Real decreto 694/2017, do 3 de xullo, e no artigo 9 da Orde TMS/368/2019, do 28 de marzo, as entidades beneficiarias estarán obrigadas a cumprir as seguintes condicións:
1. Realizar a execución do programa de formación de acordo coas condicións e requisitos formais e materiais establecidos na orde de bases e na correspondente convocatoria, así como coas condicións de aprobación que serviron de base para determinar a avaliación técnica e a subvención concedida.
A subvención outorgada terá o carácter de importe máximo e destinarase á realización das accións formativas obxecto do programa.
Non poderá comezar ningunha acción formativa que non conte coa validación previa do persoal técnico da unidade administrativa competente a través da aplicación informática SIFO.
2. Comunicarlle á Dirección Xeral de Formación para o Emprego e Orientación a obtención de subvencións ou axudas para esta mesma finalidade procedentes de calquera outra Administración ou ente público.
3. Executar o programa formativo subvencionado sen subcontratar con terceiros a súa execución.
Para estes efectos, a contratación pola entidade beneficiaria de persoal docente para a impartición da formación non se considerará subcontratación. Por contratación de persoal docente enténdese exclusivamente a contratación de persoas físicas.
4. Expor no taboleiro de anuncios do centro e, de ser o caso, na súa páxina web o programa completo da acción formativa, os dereitos e deberes do alumnado, así como a relación do persoal docente, as datas e modalidade de impartición e, de ser o caso, o horario do curso.
No anuncio deberá facerse constar necesariamente o carácter público do financiamento da actividade subvencionada, e incluirase nel o emblema da Xunta de Galicia e o dos organismos que financian.
Esta información deberá estar redactada en lingua galega, sen prexuízo de que, así mesmo, se publique noutros idiomas.
5. Informar o alumnado do alcance e obxectivos da formación.
Así mesmo, deberán ser informadas as persoas participantes dos requisitos necesarios para poder participar na actividade formativa e, naqueles casos en que a realización da formación teña lugar mediante a modalidade de teleformación ou mixta, ou a través de aula virtual, dos medios técnicos necesarios e adecuados para poder asistir con aproveitamento á actividade.
Da comunicación ás persoas asistentes da dita información deberá quedar constancia mediante escrito asinado polo alumnado, que se incorporará ao expediente electrónico recollido na aplicación SIFO.
6. Respectar o carácter gratuíto da formación para o alumnado.
7. Informar as persoas participantes en situación de desemprego das axudas e bolsas que poidan solicitar á Dirección Xeral de Formación para o Emprego e Orientación e facilitarlles apoio para a cobertura telemática da solicitude normalizada a través da sede electrónica da Xunta de Galicia.
Colaborar, nos termos establecidos no artigo 15.1.k) desta orde, na xestión das subvencións en concepto de bolsas e axudas do alumnado que participe nas accións formativas correspondentes.
Para os efectos do pagamento das bolsas e axudas ás persoas alumnas desempregadas que asistan a accións formativas na modalidade de teleformación, os resultados dos controis de teleformación, independentemente de que estes deban realizalos persoas traballadoras desempregadas ou ocupadas, deberán estar dados de alta no aplicativo informático SIFO no prazo máximo de 3 días hábiles desde a data límite a que se refire o artigo 25.8 para que o alumnado realice a correspondente proba.
8. Aboar mensualmente a remuneración do persoal formador a través de transferencia bancaria.
Non exime desta obriga o feito de que o centro ou entidade impartidora non percibise os anticipos previstos nesta orde.
9. Someterse ás actuacións de supervisión, seguimento e control que, en calquera momento, poidan acordar os servizos competentes da Consellería de Promoción do Emprego e Igualdade, tanto no relativo ao desenvolvemento das accións formativas como á súa xestión e tramitación administrativa, e facilitar toda a documentación que para tales efectos se lle requira.
10. As entidades deberán dispor dun sistema de control biométrico para o seguimento e control do alumnado e do persoal docente compatible co sistema establecido polo Servizo Público de Emprego de Galicia.
En función da modalidade en que teña lugar a realización da acción formativa, serán de aplicación os seguintes criterios:
a) Na modalidade presencial e na parte presencial da modalidade de teleformación ou mixta, o control de asistencia realizarase mediante control biométrico e controis de asistencia, que deberán asinar diariamente ao iniciar e ao finalizar a actividade (de ser a acción formativa en horario de mañá ou de tarde), e catro veces ao día, de impartirse a acción formativa en xornada partida: ao inicio e ao fin da xornada de mañá e ao inicio e ao remate da xornada de tarde.
Tanto o conxunto do alumnado como o persoal docente estarán obrigados a efectuar o referido control de presenza, de entrada e saída diaria, mediante o control biométrico e, simultaneamente e con carácter subsidiario, mediante partes de asistencia.
Para os efectos de poder efectuar o devandito control de asistencia, o alumnado participante, tanto o ocupado como o desempregado, e o persoal docente poderán rexistrar a súa pegada dixital na propia entidade formadora, ben con carácter previo ou ben o mesmo día de inicio da acción formativa ou de incorporación do alumnado á actividade. Neste caso, tanto o alumnado como o persoal docente deberán ser informados da necesidade de captar a súa pegada para poder realizar o seguimento e control de asistencia á actividade formativa, así como a finalidade e destino da impresión dixital recollida, e outros aspectos básicos relativos á protección de datos persoais, e deberán asinar o modelo informativo e de autorización de captura da impresión dixital, que está dispoñible para a súa descarga no sistema informático SIFO.
A correspondencia entre as impresións dixitais e a persoa que identifican acreditarase mediante declaración responsable, cuxo contido deberá respectar o disposto no artigo 69 da Lei 39/2015, do 1 de outubro, do procedemento administrativo común das administracións públicas.
Esta declaración responsable deberase presentar a través da aplicación SIFO. A presentación dunha declaración responsable que falsee as condicións requiridas para a concesión da subvención ou oculte as circunstancias que a impedisen ou limitasen terá os efectos recollidos no artigo 7.2 da presente orde.
b) No cursos que se van impartir na modalidade teleformación ou na parte de teleformación da modalidade mixta, o control de asistencia deberá efectuarse a través dos instrumentos previstos na Orde TMS/368/2019, do 28 de marzo, pola que se desenvolve o Real decreto 694/2017, do 3 de xullo, polo que se desenvolve a Lei 30/2015, do 9 de setembro, pola que se regula o Sistema de formación profesional para o Emprego no ámbito laboral, en relación coa oferta formativa das administracións competentes e o seu financiamento, e se establecen as bases reguladoras para a concesión de subvencións públicas destinadas ao seu financiamento, e na Orde TMS/369/2019, do 28 de marzo, pola que se regula o Rexistro Estatal de Entidades de Formación do Sistema de formación profesional para o emprego no ámbito laboral, así como os procesos comúns de acreditación e inscrición das entidades de formación para impartir especialidades formativas incluídas no Catálogo de especialidades formativas no marco do Sistema de formación profesional para o emprego no ámbito laboral.
As entidades deberán dispor da tecnoloxía necesaria para verificar e acreditar a participación ou asistencia do alumnado e do persoal docente, segundo o caso, mediante o uso de control biométrico, DNI electrónico, sinatura dixital ou calquera outro método que garanta a identificación correcta e inequívoca das persoas participantes.
Na modalidade de teleformación será admisible unha declaración responsable, que se presentará a través da aplicación SIFO, na cal se determine a correspondencia entre o código de usuario e a persoa alumna e permita o adecuado seguimento e control da participación do alumnado e persoas titoras-formadoras na acción formativa, o número de horas de conexión, a realización de exercicios prácticos e a superación dos controis periódicos.
Nas sesións de titoría incluídas na modalidade de teleformación, a persoa titora asume o compromiso de dispoñibilidade e presenza durante o tempo de duración dela. Para estes efectos, o tempo de asistencia deberá ser mecanizado pola entidade beneficiaria na aplicación Cobipe, no prazo improrrogable de 3 días hábiles desde a data de realización da titoría a que se refiran.
Así mesmo, e tal como se dispón no artigo 26.1 desta orde, a plataforma de teleformación deberá levar rexistro de actividade das titorías realizadas e das consultas formuladas e respondidas, con indicación de accesos y horas de conexión.
c) Na formación presencial desenvolvida mediante aula virtual, esta deberá impartirse obrigatoriamente a través do campus virtual que, para estes efectos, a Consellería de Promoción do Emprego e Igualdade porá á disposición das entidades de formación.
Os datos de asistencia do alumnado e persoal docente na formación presencial desenvolvida mediante aula virtual deberán ser mecanizados pola entidade beneficiaria na aplicación Cobipe, no prazo improrrogable de 3 días hábiles desde a impartición da sesión a que se refiran. O incumprimento da obriga de mecanización en prazo suporá a perda do dereito a percibir a liquidación correspondente á sesión e para as persoas participantes para as cales non se rexistraron os datos.
Así mesmo, a través do sistema informático SIFO e no momento de solicitar a liquidación, deberán incluír os xustificantes e/ou partes de asistencia para os efectos do oportuno control por parte da unidade administrativa competente.
11. Contratar un seguro de accidentes para o alumnado, para o caso das accións formativas que se van impartir na modalidade presencial, así como para a parte presencial da modalidade de teleformación e/ou mixta, que cubra tanto os riscos que poidan ter durante o desenvolvemento do curso como os do traxecto en concepto de desprazamento ao lugar de impartición das clases teóricas, prácticas, visitas didácticas, titorías e probas presenciais.
A súa duración abranguerá o período do curso, incluíndo expresamente as prácticas en empresas cando estas se realicen, sen que poida admitirse restrición nin exclusión ningunha por razón do medio de transporte utilizado. Non se admitirán pólizas con franquías.
O seguro deberá ter a seguinte cobertura mínima:
a) No caso de morte: 60.000 €.
b) No caso de invalidez permanente: 60.000 €.
c) No caso de asistencia médico-farmacéutica: durante un ano a partir do sinistro.
12. Contratar unha póliza de responsabilidade civil para facer fronte aos riscos que poidan derivar para os bens e as persoas cando se realicen prácticas en empresas ou outras actividades relacionadas co curso. Non se admitirán pólizas con franquías.
13. Poñer á disposición do alumnado os materiais didácticos que se precisen para a axeitada realización da formación, así como os equipamentos necesarios tanto para a realización das prácticas como para a súa protección e seguridade, do cal deberá quedar constancia documental, que se incorporará ao expediente electrónico de SIFO, con sinatura de cada un dos alumnos e alumnas.
Naqueles programas formativos para os cales se asumise este compromiso, os contidos didácticos, sexan en soporte de papel ou electrónico, deberán estar redactados no idioma galego.
14. Comunicarlle á Dirección Xeral de Formación para o Emprego e Orientación calquera circunstancia ou eventualidade que poida afectar substancialmente a execución dos cursos programados. Esta comunicación deberá realizarse no prazo de dous días hábiles desde que se teña coñecemento de que se vai producir ou dun día hábil desde que se produza.
15. Solicitarlle á Dirección Xeral de Formación para o Emprego e Orientación, cun mínimo de cinco días hábiles de antelación, autorización para realizar calquera modificación no desenvolvemento das accións formativas.
16. Comunicarlle á Dirección Xeral de Formación para o Emprego e Orientación, con cinco días hábiles de antelación ao día en que vaian ter lugar, a realización de viaxes ou visitas de carácter didáctico.
Estas actividades só poderán denegarse mediante resolución motivada cando o seu contido non supoña unha achega formativa para o alumnado ou reitere actividades xa realizadas.
17. Facilitar toda a información que lles sexa requirida polo órgano competente da Consellería de Promoción de Emprego e Igualdade, pola Intervención Xeral da Comunidade Autónoma, polo Tribunal de Contas ou polo Consello de Contas, no exercicio das súas funcións de fiscalización e control de destino das axudas, así como someterse a todas as actuacións de comprobación e control previstas no artigo 11.c) da Lei 9/2007, do 13 de xuño, de subvencións de Galicia.
18. Dispor de libros contables, rexistros dilixenciados e demais documentos debidamente auditados nos termos exixidos pola lexislación mercantil e sectorial aplicable á entidade beneficiaria en cada caso, coa identificación en conta separada ou epígrafe específica da súa contabilidade de todos os ingresos e gastos de execución das accións formativas, coa referencia común en todos eles á formación para o emprego, de maneira que exista pista de auditoría adecuada.
19. Para o caso do persoal interno vencellado á impartición da docencia, a entidade deberá crear, documentar e custodiar un sistema con valor probatorio suficiente para acreditar as horas diarias dedicadas por cada persoa a estes labores de preparación e titoría, e as tarefas realizadas, con indicación do seu custo.
20. Dispor de follas de reclamación á disposición de todos os usuarios e usuarias, en aplicación do disposto na Lei 2/2012, do 28 de marzo, galega de protección xeral das persoas consumidoras e usuarias.
21. Realizar, polo menos, dous cuestionarios sobre a valoración da acción formativa por parte do alumnado, que se farán durante o primeiro cuarto da actividade de formación e ao rematar esta.
Para esta finalidade, a Dirección Xeral de Formación para o Emprego e Orientación poderá implementar un sistema telemático para realizar enquisas de avaliación e captura de resultados.
22. Subscribir, con carácter previo á percepción do financiamento público, un compromiso verificable de calidade na xestión, transparencia e eficiencia na utilización de recursos públicos. Este compromiso estará referido ao seguimento da impartición da acción formativa, á satisfacción das persoas participantes, aos seus contidos, aos seus resultados, á calidade do profesorado e ás modalidades de impartición.
23. Verificar que no momento de comezo da acción formativa a especialidade segue en alta no Catálogo de especialidades formativas, no marco do sistema de formación profesional para o emprego no ámbito laboral e que o programa de alta non difire do programa autorizado.
Non serán subvencionadas as accións formativas que no momento do seu inicio non estivesen de alta no Catálogo de especialidades formativas.
24. Verificar o cumprimento dos requisitos de acceso que deberá cumprir o alumnado.
No proceso de liquidación da subvención, non serán obxecto de cómputo na determinación do importe que cumpra liquidar aqueles alumnos ou alumnas que non cumpran os requisitos exixidos para o acceso á acción formativa.
En ningún caso a Consellería de Promoción do Emprego e Igualdade adquirirá ningunha responsabilidade respecto daquelas persoas que puidesen participar na formación sen reunir os requisitos de acceso exixidos para ser persoa destinataria da formación ou os establecidos polas especialidades formativas que se van impartir. Tampouco será responsable no suposto de que a formación se impartise sen cumprir os requisitos exixibles de conformidade coa normativa aplicable e o Catálogo de especialidades formativas, no marco do Sistema de formación profesional para o emprego no ámbito laboral.
Neste sentido, non se expedirán diplomas nin certificados de ningún tipo ás persoas alumnas que participen na formación sen reunir os referidos requisitos, nin se asumirá ningún tipo de responsabilidade económica derivada da súa participación, o que inclúe que non terán dereito a percibir ningún tipo de bolsas e axudas e que non estarán cubertas polos seguros financiados con cargo a esta orde.
As entidades beneficiarias deberán comunicar por escrito os termos deste punto, coas especificidades aplicables á correspondente especialidade formativa, a todas as persoas que participen no proceso de selección do alumnado, do cal deberá quedar constancia escrita asinada polo alumnado, que se incorporará ao expediente electrónico recollido en SIFO.
Artigo 22. Especificacións de control de asistencia por razóns de saúde
1. As entidades beneficiarias que impartan accións formativas subvencionadas no marco desta orde de bases poderán aplicar, de ser o caso, por razóns de saúde e para os efectos de cumprir coas disposicións ditadas polas autoridades competentes limitativas da capacidade de locais como consecuencia da situación e evolución da COVID-19, o establecido neste artigo en materia de controis de asistencia e de horarios.
2. Na modalidade de impartición presencial, así como na parte presencial da modalidade de teleformación ou mixta, poderase seguir empregando o control biométrico de asistencia para persoal docente e alumnado mediante impresión dixital, sempre que se garanta a seguridade e a hixiene suficiente a través do uso de xeles ou composicións hidroalcohólicas e a limpeza dos dispositivos de control conforme as disposicións sanitarias vixentes, pero tamén se poderá substituír total ou parcialmente, para todos os efectos, a través de tarxeta de fichaxe, DNI electrónico ou sinatura electrónica mediante a captura de sinatura dixitalizada con datos biométricos e por outros métodos que permitan reflectir e ter constancia da hora e dos minutos de entrada e saída.
Se a entidade acredita suficientemente que non pode pór en funcionamento algún dos ditos sistemas de control de asistencia con anterioridade ao comezo ou continuación da acción formativa (por desabastecemento do mercado da tecnoloxía necesaria, acreditado documentalmente mediante a certificación de, cando menos, 3 empresas provedoras, ou por imposibilidade de que a Administración competente verifique os datos biométricos), poderá solicitarlle á Dirección Xeral de Formación para o Emprego e Orientación autorización para que o control de asistencia se limite á sinatura manual do parte de asistencias, con indicación exacta de hora e minutos de entrada e saída.
Cando a Dirección Xeral de Formación para o Emprego e Orientación autorice este método de control, a entidade beneficiaria deberá presentar, a través da aplicación SIFO e no momento da solicitude de liquidación, as declaracións responsables individualizadas, asinadas por cada unha das persoas participantes, en que ratifiquen a súa asistencia a todas e cada unha das sesións e nos horarios reflectidos nos partes de asistencia, que deberán anexarse á dita declaración.
Os datos de calquera dos métodos de control de asistencia das persoas participantes a que se refire este número deberán ser mecanizados pola empresa ou entidade beneficiaria na aplicación Cobipe, no prazo improrrogable de 3 días hábiles desde a impartición da sesión a que se refiran. Ademais, a través do sistema informático SIFO, e no momento de solicitar a liquidación, deberán incluír os partes de asistencia e as declaracións responsables escaneadas ou facilitar os medios de acceso ás aplicacións correspondentes, para o correspondente control por parte da unidade administrativa.
O incumprimento dalgunha destas obrigas de mecanización en prazo e a inclusión de documentación na aplicación suporán que se perderá o dereito a percibir a liquidación correspondente á sesión non mecanizada.
Artigo 23. Dereitos e deberes do alumnado
1. A formación será gratuíta para todo o alumnado participante nas accións formativas realizadas ao abeiro desta orde.
2. O alumnado desempregado que cumpra os requisitos establecidos pola correspondente normativa reguladora, terá dereito a percibir as axudas ou bolsas que estableza a Consellería de Promoción do Emprego e Igualdade para as persoas traballadoras desempregadas que participen en accións formativas de formación profesional para o emprego (procedemento TR301V).
3. O alumnado que resulte seleccionado para unha acción formativa poderá asistir simultaneamente ata un máximo de dúas accións formativas desta convocatoria, sempre que exista compatibilidade horaria entre ambas, non se superen os límites de participación da persoa traballadora en accións formativas establecidos no artigo 24 desta orde e non estea participando en cursos doutras convocatorias da programación de formación profesional para o emprego financiada con fondos públicos que non permitan a dita simultaneidade.
As persoas alumnas non poderán causar baixa nun curso financiado dentro desta programación para acceder a outra acción formativa financiada con fondos públicos, salvo autorización expresa previa da persoa titular da Dirección Xeral de Formación para o Emprego e Orientación e por causas excepcionais debidamente xustificadas.
As entidades beneficiarias informarán a todo o alumnado desta incompatibilidade antes do comezo de cada grupo formativo a través dun medio que permita acreditar e deixar constancia de tal comunicación.
4. O alumnado participante terá a obriga de:
• Asistir e seguir con aproveitamento os cursos.
• Rexistrar a súa asistencia e seguimento da acción formativa mediante o uso daqueles sistemas de control autorizados para as distintas modalidades de impartición e establecidos nos artigos 21 e 22 desta orde e que, para tales efectos, aplique a entidade formadora.
• Facilitar, segundo o disposto nos artigos 20 e 21 desta orde, e nos prazos que nela se establecen, a documentación que lle ten que ser requirida pola entidade de formación.
• Responder o formulario da enquisa de avaliación da calidade da acción formativa que se lle remitirá por vía telemática ao seu remate ou, de ser o caso, que se lle entregará en soporte de papel para a súa cobertura.
• De ser o caso, salvagardar o carácter persoal e intransferible das chaves de acceso á plataforma de teleformación que lle proporcione a entidade de formación.
5. Os alumnos e alumnas deberán ser dados de baixa nunha acción formativa cando se dea algunha das seguintes circunstancias:
a) Incumprimento da prohibición de simultanear accións formativas de formación para o emprego nos termos recollidos no artigo 23.3 desta orde. Neste caso, a exclusión aplicarase na acción ou accións formativas en que a persoa alumna se incorporase máis recentemente.
b) Incumprimentos de asistencia na modalidade presencial:
I. Incorrer nun número de faltas de asistencia superior ao 25 % das horas lectivas, sexan xustificadas ou non.
II. Incorrer en sete incumprimentos horarios nun mes sen xustificación.
Entenderase por incumprimento horario cando, sen causa xustificada, a suma dos minutos de atraso na hora de entrada, da saída con antelación e das ausencias durante parte das horas lectivas sexa superior a 15 minutos por cada día lectivo.
A xustificación dos incumprimentos horarios deberá facerse mediante documentos ou calquera outro medio que acredite de modo fidedigno o motivo. As persoas alumnas disporán dun prazo de tres días hábiles para presentar os xustificantes na entidade de formación. Unha vez transcorrido este prazo sen que os presentasen, a falta será considerada como sen xustificar.
III. A impartición da formación mediante aula virtual entenderase como formación presencial.
c) Incumprimentos de seguimento na modalidade mixta:
I. Incorrer nun número de faltas de asistencia superior ao 25 % das horas lectivas presenciais, sexan xustificadas ou non, ou non realizar as probas e avaliacións da acción formativa ou incorrer en incumprimento reiterado na súa realización efectuándoas fóra do prazo establecido para o efecto, sempre e cando o dito incumprimento supere o 25 % do número de controis programados.
d) Incumprimentos de seguimento na modalidade de teleformación:
I. Non realizar as probas e avaliacións da acción formativa ou incorrer en incumprimento reiterado na súa realización efectuándoas fóra do prazo establecido para o efecto, sempre e cando o dito incumprimento supere o 25 % do número de controis programados ou, de ser o caso, incorrer nun número de faltas de asistencia, sexan xustificadas ou non, superior ao 25 % das horas lectivas presenciais.
6. Serán motivos de exclusión por causas disciplinarias os seguintes:
I. Atentar contra os dereitos das persoas alumnas, do persoal docente ou da entidade formadora.
II. Falta de aproveitamento da acción formativa ou mostrar un comportamento indebido que dificulte o seu normal desenvolvemento.
III. Negarse a efectuar os controis biométricos de asistencia ou os que procedan segundo a modalidade de impartición.
IV. Non entregar a documentación necesaria para dar cumprimento á normativa aplicable requirida pola entidade formadora ou a unidade administrativa correspondente.
V. Non cumprir nin respectar as medidas de seguridade e saúde establecidas polas autoridades competentes para facer fronte á COVID-19, así como as debidas normas de hixiene e salubridade.
O procedemento que se deberá seguir para dilucidar se procede a exclusión por causas disciplinarias será o seguinte:
• O proceso iniciarase mediante solicitude debidamente motivada presentada pola entidade formadora.
• No prazo de 5 días hábiles desde a presentación da solicitude, a persoa proposta para exclusión será obxecto de audiencia por parte do órgano instrutor, a Subdirección Xeral de Formación para o Emprego, logo da cal esta unidade formulará a súa proposta de resolución.
• A resolución corresponderalle á persoa titular da Dirección Xeral de Formación para o Emprego e Orientación.
• Durante a tramitación do procedemento a persoa alumna que o motiva poderá ser suspendida de asistencia á acción formativa ata a notificación da resolución definitiva, que non pon fin á vía administrativa, contra a cal poderán interpor recurso de alzada as persoas interesadas.
Capítulo V
Execución dos programas de formación
Artigo 24. Accións formativas
1. Para os efectos desta norma, enténdese por acción formativa a dirixida á adquisición e mellora das competencias e cualificacións profesionais das persoas traballadoras.
A acción formativa está constituída polo contido específico das especialidades formativas incluídas no Catálogo de especialidades formativas no marco do sistema de formación profesional para o emprego no ámbito laboral, e polos módulos transversais a que se refire esta orde.
Para estes efectos, poderán ser obxecto de financiamento aquelas especialidades formativas que se determinen no anexo I de cada convocatoria, así como os módulos transversais e complementarios que se impartan asociados a estas.
Unha acción formativa poderá impartirse nun ou varios grupos e de acordo cos límites de participantes por acción formativa que en cada convocatoria se establezan.
De ser o caso, e independentemente do número de grupos en que se desagregue unha acción formativa, as sesións de formación e avaliación presencial da acción formativa deberán efectuarse nun único centro presencial.
2. As accións formativas poderán impartirse en calquera das modalidades de formación e de acordo cos criterios previstos no artigo 25.
3. A execución do programa de formación será realizada pola entidade beneficiaria e non está permitido subcontratar con terceiros a súa execución.
Durante a execución do programa de formación non se poderán incorporar accións formativas non aprobadas na resolución de concesión da subvención nin modificar a súa duración ou modalidade.
4. A participación da persoa traballadora en accións formativas de formación para o emprego que se vaian impartir na modalidade presencial ou na parte presencial da modalidade mixta non será superior a 8 horas diarias e 40 semanais, e non está permitida a súa realización en horario nocturno.
Para os efectos desta orde, enténdese como horario nocturno o período de tempo comprendido entre as 22.00 e as 6.00 horas.
Con carácter excepcional e logo de solicitude da entidade beneficiaria debidamente xustificada mediante memoria explicativa, a Dirección Xeral de Formación para o Emprego e Orientación poderá autorizar a realización de accións formativas que total ou parcialmente se impartan dentro do horario nocturno establecido no anterior parágrafo.
Esta restrición horaria por día e semana tamén será de aplicación a aqueles contidos da especialidade formativa que se impartan mediante aula virtual.
Na modalidade de teleformación, o límite máximo de horas de formación que se van programar por mes será de 120. Este número de horas reducirase proporcionalmente no caso de que a formación non se imparta a mes completo. Para os efectos de realizar este axuste, consideraranse meses de 30 días.
5. Logo de solicitude da entidade beneficiaria presentada cunha antelación mínima de 3 días hábiles en relación coa data en que serán de aplicación os cambios solicitados, a modificación das datas e horarios das accións formativas respecto do indicado no anexo II ou, de ser o caso, do autorizado posteriormente como consecuencia doutras solicitudes de cambio presentadas requirirá autorización da Subdirección Xeral de Formación para o Emprego outorgada a través da aplicación informática SIFO.
6. Logo de petición da entidade beneficiaria debidamente motivada, a Dirección Xeral de Formación para o Emprego e Orientación poderá autorizar o cambio do lugar de impartición dunha acción formativa.
Non se autorizará a petición cando concorra algunha das seguintes circunstancias:
• Se o cambio implica unha diminución da puntuación obtida na avaliación técnica.
• Se a acción formativa está iniciada ou se xa existen persoas seleccionadas para participar nalgún dos grupos que configuran a acción formativa.
• Se o cambio de localidade supón, de ser o caso e de acordo co establecido no artigo 15.1.e) desta orde, a modificación do grao de ruralidade da zona onde se localicen as instalacións do centro en que se realizará a execución da parte presencial do programa da acción formativa.
A solicitude da entidade deberá presentarse cunha antelación mínima de quince días hábiles en relación coa data de inicio do primeiro grupo de formación da acción formativa.
7. As convocatorias que se realicen ao abeiro das presentes bases reguladoras establecerán o intervalo de datas autorizado para o comezo e remate das accións formativas.
Artigo 25. Modalidades de impartición
1. A formación profesional para o emprego obxecto de financiamento por esta orde poderá efectuarse, de acordo co que para tal efecto estableza e autorice o correspondente programa formativo da especialidade que se vai impartir, nas modalidades presencial, mixta ou de teleformación.
O tipo de modalidade de impartición estará definido pola modalidade en que se imparta o contido específico da acción formativa a que se refire o artigo 24.1 desta orde.
2. Considérase, salvo supostos específicos en que a normativa estipule outra porcentaxe, que a acción formativa se imparte na modalidade de teleformación cando a parte presencial do contido específico da especialidade formativa sexa igual ou inferior ao 20 % da súa duración total.
Enténdese por modalidade mixta aquela que combine para unha mesma acción formativa as modalidades presencial e de teleformación. En cada acción formativa que se imparta en modalidade mixta, o número de horas de teleformación do contido específico será inferior ao 80 % das horas da acción formativa. Nesta porcentaxe incluirase o número de horas de docencia e de titorías correspondentes a teleformación.
As accións formativas non poderán impartirse naquelas modalidades que non estean expresamente permitidas pola normativa reguladora e os programas formativos vixentes para cada especialidade. O anexo I da convocatoria determinará en que especialidades e en que número de horas está permitida a modalidade de teleformación.
Non poderán ser obxecto de subvención aquelas accións formativas solicitadas polas entidades de formación que incumpran o requisito establecido no parágrafo anterior.
3. As sesións de formación e avaliación presencial da formación que se desenvolvan na modalidade de teleformación deberán realizarse en centros presenciais localizados na Comunidade Autónoma de Galicia e homologados pola Administración pública competente para impartir a correspondente especialidade formativa de formación profesional para o emprego no ámbito laboral da Comunidade Autónoma.
Os contidos presenciais que se van impartir nas modalidades de teleformación ou mixta de cada acción formativa realizaranse nun único centro presencial que, para os efectos de cumprir os requisitos de capacidade, poderá desagregarse en varios grupos.
A impartición deberá contar cunha metodoloxía apropiada para esta modalidade, complementada con asistencia titorial, e realizarse a través dunha plataforma virtual de aprendizaxe que posibilite a interactividade do alumnado, persoal de titoría e recursos, e que garanta a xestión dos contidos, un proceso de aprendizaxe sistematizado para as persoas participantes, o seu seguimento continuo e a avaliación de todo o proceso.
4. Na solicitude de subvención deberá especificarse expresamente a modalidade pola cal se opta e, de ser mixta ou de teleformación, indicarase o número de horas presenciais e o número de horas de teleformación, así como a porcentaxe que representan cada unha delas sobre o total de horas de acordo co programa formativo que a regule.
As horas de aprendizaxe presencial calcularanse sobre as horas de formación, excluídas, para estes efectos, as horas de prácticas profesionais en centros de traballo.
5. As entidades beneficiarias poderán facer uso da aula virtual como medio complementario e adicional para desenvolver o proceso formativo utilizando o campus virtual que, para estes efectos, a Consellería de Promoción do Emprego e Igualdade porá á disposición das entidades de formación, sen que a impartición da totalidade dunha especialidade formativa do Catálogo de especialidades formativas poida realizarse a través de aula virtual.
De acordo co establecido na disposición adicional cuarta da Orde TMS/369/2019, do 28 de marzo, considérase aula virtual a contorna de aprendizaxe onde a persoa titora-formadora e o alumnado interactúan, de forma concorrente e en tempo real, a través dun sistema de comunicación telemático de carácter síncrono.
A impartición da formación mediante aula virtual estruturarase e organizarase de modo que se garanta en todo momento que existe conectividade sincronizada entre as persoas formadoras e o alumnado participante, así como bidireccionalidade nas comunicacións.
A totalidade das persoas participantes deberá dispor dos medios técnicos necesarios e adecuados para poder asistir con aproveitamento á actividade. Para estes efectos e para unha óptima interacción entre o persoal formador e o alumnado, todas as persoas participantes deberán dispor de micrófono e cámara web, cámara que deberá estar acesa e en uso durante todo o tempo de duración da sesión formativa.
Non poderá utilizarse unha aula virtual para realizar aquelas sesións que precisen presenza física do alumnado e/ou requiran a utilización de espazos, instalacións ou equipamentos para a adquisición de destrezas prácticas.
Así mesmo, na modalidade presencial ou na parte presencial da modalidade mixta, os exames finais e as probas de aptitude de carácter oficial non poderán realizarse a través de aula virtual.
Para a autorización do uso da aula virtual serán de aplicación os seguintes criterios:
• Naquelas especialidades formativas para as cales o deseño e o contido do seu programa formativo permiten que se impartan tanto na modalidade presencial como na de teleformación poderá utilizarse a aula virtual para realizar aquelas sesións que, na modalidade de teleformación, non precisen presenza física do alumnado.
• Naquelas especialidades formativas para as cales o deseño e o contido do seu programa formativo soamente admitan a presencial como modalidade de impartición, permitirase o uso da aula virtual para aqueles contidos en que resulte acreditado que non requiren o uso de espazos, instalacións e/ou equipamentos para a adquisición de habilidades ou destrezas prácticas, e cun límite máximo de horas de formación mediante aula virtual que non poderá superar o 50 % do total de horas do programa formativo.
Para os efectos de garantir o cumprimento do disposto neste punto poderase, na fase de instrución da solicitude, requirirlles ás entidades de formación toda aquela información e/ou documentación acreditativa da viabilidade de impartir mediante aula virtual a totalidade ou parte dos contidos solicitados. No caso de que a información e/ou documentación solicitada non se achegue ou se achegue parcialmente, se presente fóra de prazo ou non se acredite a viabilidade de impartir a formación mediante aula virtual, esta deberá efectuarse, logo de notificación á entidade interesada, presencialmente.
6. Se unha vez concedida e aceptada unha solicitude de subvención a entidade desexa modificar a impartición presencial de determinados contidos da acción formativa para realizalos a través de aula virtual, deberá solicitarlle á Subdirección Xeral de Formación para o Emprego cun mínimo de dez días hábiles de antelación en relación coa data proposta para o comezo da impartición da formación por este medio virtual, e necesitará en todo caso a autorización previa do persoal técnico da dita unidade.
A solicitude deberá incluír unha memoria detallada da petición, con indicación expresa dos contidos que se impartirán mediante aula virtual, a súa duración e as datas de realización, así como o calendario de sesións presenciais e de exames que se deberán realizar.
No caso de que a acción formativa estivese iniciada no momento de realizar a solicitude, ou xa se realizase a selección do alumnado que vai participar nela, deberá presentarse a documentación acreditativa de que todas e cada unha das persoas alumnas da acción formativa foron debidamente informadas das consecuencias de participar mediante aula virtual, incluída, de ser o caso, a perda do dereito para beneficiarse de determinadas bolsas e axudas, e que mostran o seu acordo expreso ao cambio.
7. Logo de comunicación á Dirección Xeral de Formación para o Emprego e Orientación, as empresas beneficiarias poderán, excepcionalmente, facer uso da aula virtual para posibilitar o seguimento da acción formativa por parte do alumnado que non poida asistir á actividade por causas sobrevidas como consecuencia da COVID-19.
O uso da aula virtual será individual para cada persoa alumna, abranguerá o tempo indispensable necesario para garantir o respecto ás medidas de seguridade e saúde establecidas polas autoridades competentes e estará suxeito ao cumprimento dos requisitos establecidos nos números 4 e 5 deste artigo e nas instrucións que, de ser o caso, para tal efecto estableza e publique a Dirección Xeral de Formación para o Emprego e Orientación.
Para os efectos exclusivos do disposto nesta epígrafe, as empresas poderán facer uso de medios virtuais propios sen necesidade de utilizar o campus virtual.
8. En todas as modalidades de impartición deberanse incluír as evidencias necesarias para comprobar os resultados da aprendizaxe.
Para estes efectos, e sen prexuízo dun maior número de controis que para tales efectos pode establecer o programa de formación de cada especialidade, na modalidade presencial deberá realizarse, finalizada a impartición dos contidos específicos da especialidade formativa, un control de valoración dos resultados obtidos polo alumnado participantes. As entidades poderán, se así o consideren pertinente para unha mellor avaliación continua das persoas participantes, incluír outros controis a maiores do que debe realizarse ao rematar a actividade.
Na modalidade de teleformación e na teleformación incluída na formación mixta, programarase un control periódico de aprendizaxe cada 20 horas de formación ou fracción, entendendo como fracción cada unidade inferior ou igual a 20 horas. Para os efectos de consideralo realizado, este control deberá realizalo o alumnado no prazo máximo de 5 días desde a data da súa activación na plataforma e sen que en ningún caso o prazo para realizalo poida superar a data prevista de remate da acción formativa.
Na formación mixta deberán realizarse os controis exixidos para cada unha das modalidades que a compoñan.
Para ser avaliado positivamente, o alumnado deberá superar todos os controis programados e acadar un mínimo de 5 puntos sobre 10 en cada un deles.
Artigo 26. Funcións das persoas titoras-formadoras que impartan formación na modalidade de teleformación
1. Nas accións formativas que se van impartir na modalidade de teleformación deberá haber, como mínimo, unha persoa titora por cada 80 participantes cando a súa dedicación sexa de 40 horas semanais. Para xornadas inferiores, o tempo de dedicación da persoa titora reducirase proporcionalmente ao número máximo de persoas alumnas, de xeito que o mínimo de dedicación do titor equivalla a 10 horas semanais por cada 20 alumnos/as.
A persoa titora non poderá compaxinar o seu labor en máis dun grupo ou dunha acción formativa no mesmo período de tempo. Para estes efectos, as quendas de mañá e tarde consideraranse como períodos diferentes.
2. Para garantir o seguimento e calidade da formación na modalidade de teleformación, a persoa titora deberá dedicar un mínimo de 10 horas semanais por cada 20 persoas alumnas ou fracción na planificación da acción formativa. Para estes efectos, a plataforma de formación deberá levar rexistro de actividade das titorías realizadas e das consultas formuladas e respondidas, con indicación de accesos e horas de conexión.
3. En aplicación do disposto no artigo 17.2 da Orde TMS/368/2019, serán funcións das persoas titoras-formadoras as seguintes:
• Desenvolver o plan de acollida do alumnado do grupo de formación segundo as características específicas da acción formativa.
• Orientar e guiar o alumnado na realización das actividades, uso dos materiais e utilización das ferramentas da plataforma virtual de aprendizaxe.
• Fomentar a participación do alumnado propoñendo actividades e debates e organizando tarefas individuais e en equipo.
• Realizar o seguimento e valoración das actividades realizadas polas persoas participantes, resolvendo dúbidas e solucionando problemas e incidencias a través da plataforma virtual de aprendizaxe, axustándose á planificación prevista.
• Avaliar o alumnado de acordo cos criterios establecidos, así como participar na organización e desenvolvemento das probas de avaliación que procedan.
• Participar en todas aquelas actividades que impliquen coordinación co resto do equipo responsable da organización, xestión e desenvolvemento das accións formativas.
4. As persoas titoras-formadoras atenderán as peticións e dúbidas do alumnado e realizarán a actividade titorial a través das ferramentas de comunicación da plataforma (videconferencia, chat, foro e similares). De toda esta actividade deberá quedar rexistro na plataforma para a súa comprobación por parte dos órganos de control e seguimento.
5. Unha persoa titora non poderá compaxinar as funcións de titoría para accións formativas ou grupos que teñan horarios de titoría parcial ou totalmente coincidentes.
Artigo 27. Persoas destinatarias da formación e definición de persoa alumna
1. As accións formativas obxecto de financiamento dirixiranse prioritariamente ás persoas traballadoras ocupadas.
A consideración de persoa traballadora ocupada virá determinada pola situación laboral en que estea na data de comezo da formación. As persoas traballadoras ocupadas que accedan á situación de desemprego cando se encontren en período formativo poderán seguir participando na acción formativa que están cursando.
Terán a consideración de persoas traballadoras ocupadas tanto as persoas traballadoras ou socias de empresas de economía social que acheguen actividade económica como as persoas traballadoras autónomas ou as persoas socias traballadoras, ou de traballo, dunha sociedade cooperativa ou dunha sociedade laboral.
Será requisito necesario para a participación dos colectivos de traballadores relacionados neste punto 1 que o seu centro de traballo, ou o domicilio fiscal no caso dos autónomos, se localice na Comunidade Autónoma de Galicia.
2. Para os efectos desta orde, terán a consideración de persoas traballadoras ocupadas as que resulten afectadas por medidas temporais de suspensión de contrato como consecuencia da aplicación dun expediente de regulación temporal de emprego (ERTE), ou dun expediente de regulación de emprego (ERE), motivadas por causas económicas, técnicas, organizativas, de produción ou de forza maior.
Neste senso, será de aplicación o disposto na Orde TES/1109/2020, do 25 de novembro, pola que se modifica a Orde TMS/368/2019, do 28 de marzo, que inclúe unha nova disposición adicional sétima relativa á participación das persoas afectadas por expedientes de regulación temporal de emprego en accións de formación profesional para o emprego e na cal, de acordo co establecido na disposición adicional terceira do Real decreto lei 30/2020, do 29 de setembro, de medidas sociais en defensa do emprego, así como no artigo 47.4 do texto refundido da Lei do Estatuto dos traballadores, aprobado polo Real decreto lexislativo 2/2015, do 23 de outubro, as persoas traballadoras afectadas por expedientes de regulación temporal de emprego, suspensións dos contratos de traballo ou as reducións de xornada, por causas económicas, técnicas, organizativas ou de produción ou derivadas de forza maior, poderán participar na oferta formativa para persoas traballadoras ocupadas en calquera programa de formación, con independencia do tipo e ámbito sectorial deste.
As persoas traballadoras a que se fai referencia neste punto non terán a consideración de desempregadas para os efectos do límite de participación destas, previsto no artigo 5.1.b), parágrafo segundo, do Real decreto 694/2017, do 3 de xullo, ao manter vixente a súa relación laboral coa empresa, aínda que estean en situación de suspensión de contrato de traballo ou de redución de xornada.
Así mesmo, de acordo co disposto no número 1 da disposición adicional terceira do Real decreto lei 30/2020, do 28 de setembro, as persoas traballadoras que se encontren en situación de suspensión de contrato ou de redución de xornada como consecuencia dun expediente de regulación temporal de emprego dos referidos na dita norma terán a consideración de colectivo prioritario para o acceso ás iniciativas de formación do sistema de formación profesional para o emprego no ámbito laboral.
3. Así mesmo, poderán solicitar participar nas accións formativas dos programas de formación previstos no artigo 4 da presente orde as persoas pertencentes aos colectivos que a seguir se relacionan:
a) As persoas traballadoras asalariadas que prestan os seus servizos en empresas ou en entidades públicas non incluídas no ámbito de aplicación dos acordos de formación nas administracións públicas e cotizan á Seguridade Social en concepto de formación profesional.
b) As persoas traballadoras fixas descontinuas nos períodos de non ocupación.
c) As persoas traballadoras ou socias das cooperativas, sociedades laborais e entidades de economía social e outras persoas socias das devanditas entidades, sempre que acheguen actividade económica.
d) As persoas traballadoras ocupadas adscritas ao sistema especial para traballadores/as por conta allea agrarios/as incluídos no réxime xeral da Seguridade Social durante os períodos de inactividade, ao réxime especial de traballadores/as autónomos/as, ao do mar e a outros Seguridade Social que non coticen por formación profesional.
Inclúense neste punto as persoas traballadoras dos colectivos cuxo réxime de cotización aínda non prevexa o pagamento da cota polo concepto de formación profesional.
e) As persoas desempregadas, nos termos previstos nos artigos 28 e 31 desta orde.
f) O persoal ao servizo das administracións públicas, ata o límite dun 10 % do total de participantes certificados na xustificación do programa.
4. O persoal pertencente ás persoas beneficiarias e fornecedoras de formación poderá participar nos programas de formación previstos nesta convocatoria, cun límite máximo dun 10 % do total de participantes certificados na xustificación do programa e de acordo co disposto no artigo 20.2.b) desta orde.
5. Terán a condición de persoas alumnas as que cumpran os requisitos de acceso á acción formativa correspondente e fosen seleccionadas a través dun procedemento realizado de conformidade co establecido na presente orde.
Artigo 28. Participación de persoas traballadoras desempregadas
En virtude do disposto no número 4 do artigo 18 da Orde TMS/368/2019, do 28 de marzo, poderán participar nas referidas accións formativas as persoas traballadoras desempregadas, ata un límite do 30 % do número de participantes programados.
A consideración de persoa desempregada virá determinada pola súa inscrición como demandante no Servizo Público de Emprego de Galicia e a súa situación laboral como non ocupada, na data da súa incorporación á acción formativa.
Non será precisa a inscrición como demandante de emprego cando unha norma específica así o determine e, en particular, no suposto de persoas mozas inscritas no ficheiro do Sistema nacional de garantía xuvenil.
Se durante o desenvolvemento dun curso algunha persoa alumna desempregada pasa á situación laboral de ocupada, poderá continuar asistindo á acción formativa sempre que para o seguimento das actividades presenciais haxa compatibilidade entre o horario formativo e o laboral, de maneira que lle permita cumprir os requisitos de asistencia e, independentemente da modalidade de impartición, rematar con aproveitamento o curso.
Será requisito necesario para a participación do colectivo de persoas traballadoras que o seu enderezo de intermediación se localice na Comunidade Autónoma de Galicia.
Poderán participar nas accións formativas as persoas demandantes de servizos previos ao emprego.
As persoas traballadoras desempregadas poderán ser beneficiarias das bolsas e axudas dirixidas ás persoas deste colectivo que participen en accións formativas de formación profesional para o emprego.
Artigo 29. Convocatorias públicas para a selección de alumnado
Dentro das actividades de difusión e promoción das accións formativas para a selección do alumnado, as entidades beneficiarias poderán realizar convocatorias públicas naqueles medios e canles que consideren convenientes.
Nestes anuncios deberá facerse constar necesariamente o carácter público do financiamento da actividade subvencionada, e incluirase neles o emblema da Xunta de Galicia e o dos organismos que financian a formación.
No anuncio, que deberá estar redactado en lingua galega, sen prexuízo de que, así mesmo, se publique noutros idiomas, deberá especificarse, como mínimo:
• A institución ou centro ofertante.
• As vacantes existentes.
• A acción formativa de que se trata, con indicación do código e denominación da especialidade formativa, e as súas datas de inicio e fin.
• O perfil requirido do alumnado.
• A modalidade de impartición.
• O enderezo e o teléfono do lugar de realización das probas de selección, así como a data e a hora en que estas terán lugar.
Artigo 30. Selección do alumnado
1. A selección do alumnado participante nas accións formativas será realizada pola entidade beneficiaria entre as persoas traballadoras que soliciten a súa participación en cada acción formativa e que pertenzan aos colectivos a que se refire esta orde.
As solicitudes de participación custodiaranas as entidades beneficiarias das subvencións e estarán á disposición dos órganos de seguimento e control da Administración.
2. As entidades priorizarán nos correspondentes procesos de selección:
• Os colectivos que para estes efectos figuran relacionados no artigo 27 desta orde.
• As persoas que exerzan o seu dereito de elección de centro a través da páxina web https://emprego.xunta.es/diplos, con preinscrición directa ante a entidade ou centro de formación correspondente, ou por outros medios que determine a Dirección Xeral de Formación para o Emprego e Orientación a través da correspondente instrución ou circular.
3. Cando inicien unha acción formativa persoas que non cumpren os requisitos exixibles, deberá procederse á súa inmediata baixa como alumnas da acción formativa correspondente.
4. As persoas que realizasen unha acción formativa e teñan dereito a diploma non poderán volver realizar a mesma acción formativa. No caso de detectarse esta circunstancia, deberán ser dadas de baixa.
Exceptúanse do anterior aqueles supostos en que exista normativa específica que obrigue á reciclaxe formativa dun determinado colectivo e así o acredite a entidade ou centro de formación.
As persoas candidatas a asistir á formación deberán ser informadas do disposto neste punto no momento de realización do proceso de selección, e debe quedar constancia documental de que recibiron esta información.
5. A entidade beneficiaria deberá dar a coñecer as accións formativas correspondentes entre as empresas e as persoas traballadoras do ámbito a que dirixe o seu programa formativo, co fin de que poidan exercer o seu dereito á formación, nos termos da Orde TMS/368/2018, do 28 de marzo, e sen prexuízo da participación das organizacións empresariais e sindicais máis representativas no correspondente ámbito de actuación e sector na difusión das accións formativas, de acordo co establecido no artigo 10.2 da Lei 30/2015, do 9 de setembro.
Artigo 31. Selección de persoas traballadoras desempregadas
1. As entidades beneficiarias poderán empregar para a selección das persoas traballadoras desempregadas o método de selección directa ou o método de selección a través de oficina de emprego.
Ambos os métodos poderán aplicarse de xeito sucesivo pero non simultáneo.
2. As entidades beneficiarias que se acollan ao seu dereito de selección directa do alumnado desempregado deberán remitir a acta de selección á oficina de emprego competente, para que poida validala no que se refire a este colectivo. No proceso de selección directa deberán participar as persoas candidatas que solicitaron a acción formativa nalgunha oficina de emprego ou no portal web de emprego, garantindo así o seu dereito á elección de centro.
A validación da acta polas oficinas de emprego, no prazo máximo de 5 días naturais desde a recepción do documento, será requisito previo imprescindible para que poida comezar a acción formativa.
3. Cando as entidades beneficiarias non apliquen o procedemento de selección directa do alumnado deberán seguir, ante as oficinas de emprego correspondentes, o procedemento que se estableza para estes supostos na orde vixente que regule o plan de formación para o emprego das persoas traballadoras desempregadas de Galicia (procedemento TR301K).
Artigo 32. Capacidade, incorporacións e suspensións
1. Cada convocatoria establecerá o número máximo de participantes que, en función da modalidade de impartición, poderá participar nunha acción formativa.
Na modalidade de teleformación ou mixta, para a regulación da capacidade das aulas nas actividades presenciais serán de aplicación os límites establecidos para a modalidade presencial.
2. En ningún caso o número de alumnas e alumnos participantes nunha acción formativa poderá ser superior ao do alumnado orzado.
3. As entidades beneficiarias poderán incorporar alumnado dentro do primeiro cuarto de duración da acción formativa. Para estes efectos, poderase incluír como suplentes na relación de persoas participantes ata un 20 % máis do previsto, que poderán cubrir posibles baixas ao inicio da acción formativa e estarán identificados na comunicación de maneira diferenciada.
Cada nova alta ou baixa de alumnado que se produza na acción formativa deberá ser actualizada no sistema informático SIFO no prazo de tres días hábiles desde que esta teña lugar. Se a dita alta ou baixa corresponde a participantes desempregados deberá, así mesmo, comunicarse á oficina de emprego correspondente no prazo máximo de 3 días hábiles desde que se produza.
Artigo 33. Módulo formativo transversal
1. De conformidade co establecido no artigo 26 do Decreto lexislativo 2/2015, do 12 de febreiro, polo que se aproba o texto refundido das disposicións legais da Comunidade Autónoma en materia de igualdade, impartirase un módulo formativo sobre igualdade de oportunidades entre mulleres e homes e sobre corresponsabilidade familiar e doméstica, cunha duración de 5 horas nas accións formativas de duración menor ou igual a 50 horas (FCOXXX21), e de 10 horas naquelas outras cunha duración superior a 50 horas (FCOXXX22).
2. A documentación de referencia dos devanditos módulos poderase consultar na epígrafe de módulos transversais da páxina web https://empregoeigualdade.xunta.gal/formacion/modulos-transversais
3. O alumnado que estea en posesión dun diploma oficial que acredite formación en materia de igualdade de duración igual ou superior ás horas destes módulos, ou que xa teña cursado o módulo que correspondese á duración da acción formativa en que estea participando, non poderá realizalo de novo.
Informarase a todo o alumnado desta circunstancia de xeito que quede constancia, ademais de que, nestes supostos, non terá dereito a percibir bolsas e axudas por este concepto. As entidades e os centros de formación tampouco terán dereito a ser financiadas na parte proporcional ao alumnado en que concorran estas circunstancias.
4. A impartición dos módulos formativos transversais poderá realizarse en calquera momento dentro do intervalo de datas da acción formativa.
Non poderá simultanearse a impartición dos contidos específicos da especialidade formativa cos contidos propios do módulo transversal.
5. De acordo co disposto no artigo 25.1 desta orde, independentemente da modalidade de impartición en que se desenvolva a parte específica da acción formativa, os módulos transversais poderán impartirse na modalidade de teleformación.
A valoración económica dos módulos transversais será a mesma ca a dos módulos económicos establecidos no anexo I para os contidos específicos da acción formativa, e de acordo coa modalidade de impartición en que se realicen.
Artigo 34. Seguimento e control das accións formativas
1. Para verificar o cumprimento do disposto nesta orde, as xefaturas territoriais ou as unidades administrativas que para tales efectos determine a Consellería de Promoción do Emprego e Igualdade aplicarán un sistema de seguimento e control, que poderá implicar, entre outras actuacións, visitas presenciais para aqueles cursos que se desenvolvan total ou parcialmente na modalidade presencial.
Durante as visitas poderá solicitárselles ás entidades as evidencias físicas relativas á actividade formativa que se consideren oportunas, recoller testemuñas do alumnado sobre o desenvolvemento da acción formativa e tomar imaxes fotográficas do material, equipamento e instalacións necesarios para impartir a formación.
De ser o caso, as citadas actuacións de seguimento e control poderán se realizadas por unha entidade, pública ou privada, se así se lle encomenda a través do instrumento xurídico correspondente.
2. Nas accións formativas que se vaian impartir na modalidade de teleformación ou na parte de teleformación da modalidade mixta, o seguimento poderá implicar o acceso á correspondente plataforma informática para verificar a evolución do desenvolvemento da actividade formativa a través do uso das chaves de acceso con perfil de administrador/a, titor/a-formador/a ou alumno/a que, para tales efectos, deberá facilitar a entidade beneficiaria.
Se así se determina, este seguimento poderá complementarse con chamadas telefónicas mediante mostraxe para realizar ás persoas participantes na actividade e, de ser o caso, visitas de seguimento ás sesións presenciais.
3. Cando a acción formativa se desenvolva a través de aula virtual, poderán efectuarse conexións durante o tempo de impartición da formación por parte dos órganos de control, para os efectos de realizar aquelas actuacións de seguimento que procedan. O persoal de seguimento poderá solicitar a desconexión do docente e do persoal da entidade beneficiaria para os efectos de realizar aquelas comprobacións e consultas que así o requiran.
De acordo co disposto no artigo 25.5 desta orde, todas as persoas participantes deberán dispor de micrófono e cámara web, cámara que deberá estar acesa e en uso durante todo o tempo de duración das sesións formativas. O incumprimento desta obriga dará lugar, para a sesión en que tivo lugar o incumprimento e salvo incidencia técnica debidamente notificada, á consideración de que a persoa que incumpre non asistiu á actividade formativa.
Durante o tempo de conexión, o persoal de seguimento deberá ter contacto visual e sonoro cos participantes e poderá interactuar co persoal formador e o alumnado mediante chat ou facendo uso de calquera outra ferramenta que proporcione o campus.
4. As entidades impartidoras deberán pór a disposición das xefaturas territoriais ou, de ser o caso, da unidade administrativa ou da entidade pública ou privada que corresponda, xunto co resto da documentación exixida nesta orde e utilizando para tales efectos o aplicativo informático SIFO, a folla de control de asistencia debidamente asinada polas persoas técnicas de seguimento que efectúen visitas presenciais para comprobar o normal desenvolvemento da actividade.
No caso de que non coincida a folla de control de asistencia que conste en poder das persoas técnicas coa remitida posteriormente polas entidades, presumirase a veracidade da primeira.
5. As persoas encargadas do seguimento e control verificarán a realización da actividade e realizarán as comprobacións encamiñadas a garantir a correcta realización do proxecto ou acción obxecto da axuda, de maneira que a entidade beneficiaria deberá colaborar con estas actuacións de xeito dilixente e achegando, para tal efecto, canta documentación fose requirida.
6. Posibilitaráselle á entidade beneficiaria que asine o informe ou acta durante a visita de control, para acreditar a súa presenza, así como de engadir as observacións que considere oportunas.
7. Cando nunha acción formativa, ou nun ou máis grupos dunha acción formativa, se detecte a existencia de irregularidades ou deficiencias que non poidan ser emendadas no prazo concedido para o efecto, e que impidan o normal desenvolvemento da actividade ou incidan negativamente na súa calidade docente, poderá procederse á súa cancelación logo de resolución motivada do órgano competente para a súa concesión.
Artigo 35. Diplomas
1. Rematado un grupo dunha acción formativa, dados de alta en SIFO os resultados individuais obtidos polo alumnado nos diferentes controis e probas de avaliación, e logo de solicitude da entidade autorizada, a Dirección Xeral de Formación para o Emprego e Orientación emitirá os correspondentes diplomas de acordo cos criterios establecidos nesta orde.
A solicitude dos diplomas, que se realizará no prazo máximo dun mes desde o remate de cada grupo da acción formativa a través do sistema informático SIFO, incluirá unha declaración da entidade solicitante de que lle requiriu a cada persoa alumna a acreditación do cumprimento dos requisitos de acceso establecidos no programa formativo.
2. Para ter dereito a diploma, o alumnado deberá cumprir os requisitos de acceso exixidos para asistir á acción formativa e, de acordo co disposto no artigo 25.8 desta orde, rematar o curso con aproveitamento e avaliación positiva, ademais de cumprir as seguintes condicións:
a) Modalidade presencial: asistir ao 75 % da especialidade formativa incluída na acción formativa e superar a totalidade dos controis programados.
b) Modalidade mixta: ademais de cumprirse os criterios anteriores en relación coas horas presenciais, deberán realizarse en prazo e superar con aproveitamento a totalidade dos controis programados, tanto para a parte de teleformación como, de ser o caso, para a parte presencial.
No caso de que o número de sesións presenciais sexa menor de catro, a porcentaxe de asistencia obrigada reducirase ao 66 % se hai tres sesións, ou ao 50 % se hai dúas. En todo caso, nunha acción formativa mixta o alumnado deberá asistir polo menos a unha sesión presencial.
c) Modalidade de teleformación: realizar en prazo e superar con aproveitamento a totalidade dos controis programados.
Para os efectos do dereito a diploma, as porcentaxes do aproveitamento non precisarán computar, para o seu cálculo, as horas dos módulos transversais e/ou complementarios.
2. A Dirección Xeral de Formación para o Emprego e Orientación determinará o modelo do diploma que se deberá. Nel debería constar en todo caso:
a) Nome, apelidos e DNI da alumna ou alumno.
b) A denominación da acción formativa.
c) As horas de impartición, con especificación das horas presenciais e/ou de teleformación.
d) O lugar e as datas de realización.
e) O programa da acción formativa.
f) Os logotipos da Consellería da Xunta de Galicia e dos organismos que financien as accións formativas.
g) Os módulos de formación transversal impartidos, con indicación da súa duración en horas, no caso de terse realizado.
3. O alumnado que non teña dereito a diploma recibirá, se a solicita, unha certificación polas horas asistidas e, de ser o caso, módulos transversais que superase.
4. Tanto a emisión dos diplomas como, de ser o caso, a expedición de certificados polas horas e módulos realizados efectuarase en soporte electrónico.
Artigo 36. Avaliación da calidade das accións formativas
1. As entidades beneficiarias responsables da execución dos programas de formación realizarán e presentarán coa xustificación da subvención, e a través do aplicativo SIFO, un informe final de avaliación da calidade da totalidade do programa formativo impartido, que incluirá a súa desagregación por acción formativa e grupo.
2. Asi mesmo, deberán facer un seguimento continuo que permita a identificación de áreas de mellora e a elaboración de plans de mellora, detectando debilidades que poidan ser emendadas dentro do período de realización do curso, e quedarán reflectidas as actuacións levadas a cabo para tal fin na memoria final.
En todas estas intervencións deberá quedar constancia, de ser o caso, da mostra representativa sobre a cal se realizaron as actuacións.
3. As entidades de formación deberán realizar o seguimento da participación do alumnado, da súa aprendizaxe e avaliación. Da dita actividade darán conta na memoria final de avaliación, que incluirá obrigatoriamente información dos seguintes criterios e indicadores básicos:
• Número total de cuestionarios de avaliación de satisfacción de calidade cubertos polo alumnado e porcentaxe respecto ao número total de persoas participantes.
• Número total de cuestionarios de avaliación de satisfacción de calidade cubertos polo alumnado e porcentaxe respecto do total de persoas participantes finalizados.
• Resultados da avaliación da aprendizaxe do alumnado: número e porcentaxe de aptos e non aptos sobre o total de persoas participantes formadas.
• Resultados doutras actuacións de avaliación desenvolvidas no programa de formación.
Os indicadores relacionados neste punto deberán estar referidos tanto á totalidade do programa formativo como desagregados por acción formativa e grupo.
4. De conformidade co establecido nos artigos 24 e 25 da Orde TMS/368/2019, do 28 de marzo, a Consellería de Promoción do Emprego e Igualdade velará pola calidade da formación profesional para o emprego e as entidades e centros de formación colaborarán na avaliación da formación que executen, seguindo as instrucións que para tal fin poderá ditar a Dirección Xeral de Formación para o Emprego e Orientación, nas cales concretará os criterios e posibles indicadores da avaliación e o tamaño da mostra representativa para avaliar os grupos de formación.
Artigo 37. Prácticas non laborais en empresas
1. As prácticas incluídas no programa formativo poderán desenvolverse en empresas, consonte o artigo 19 da Orde TMS/368/2019, do 28 de marzo, logo de subscrición dun acordo entre a empresa e a entidade de formación, que deberá ser posto en coñecemento da persoa que realiza as prácticas, e de acordo cos requisitos do programa e respectando a súa duración.
Poderanse realizar en calquera especialidade e a súa externalización terá carácter voluntario para as entidades impartidoras e obrigatorio para o alumnado no caso de que a entidade opte pola súa realización.
2. Con dez días hábiles de antelación á data prevista para a realización das prácticas, o centro impartidor presentará a correspondente comunicación á Dirección Xeral de Formación para o Emprego e Orientación, a través do aplicativo SIFO, e deberá xuntar a seguinte documentación:
a) Convenio ou acordo subscrito coa empresa ou empresas en que realizará o módulo de prácticas profesionais non laborais en empresas.
b) Sistema de titorías para o seu seguimento e avaliación.
c) Datas, lugar de realización, horario e duración.
d) Documento que acredite a vixencia do seguro de accidentes do alumnado que cubra os riscos da acción formativa. Deberá incluír os riscos do traxecto ao lugar de realización das prácticas e contraerase estritamente durante o período de duración das prácticas.
e) Documento que acredite a contratación por parte da entidade impartidora dunha póliza de responsabilidade civil para facer fronte aos riscos que para os bens e as persoas poidan derivar da realización das prácticas en empresas. Non se admitirán pólizas con franquías.
f) Declaración responsable da persoa representante legal en que se indique:
• Que se dispón de comunicación previa ou licenza municipal de apertura da actividade de que se trate ou, na súa falta, que faga constar a idoneidade dos locais de impartición onde se van desenvolver as prácticas no caso de empresas, ou calquera outro documento acreditativo da idoneidade dos locais para a realización das prácticas.
• Que a empresa en que se realizarán as prácticas cumpre coa normativa de prevención de riscos laborais.
3. A entidade beneficiaria deberá introducir no SIFO os datos relativos ao alumnado que realice as prácticas.
4. As empresas onde teñan lugar as prácticas deberán reunir os requisitos establecidos no programa da especialidade da cal se van realizar as prácticas e estaren localizadas na Comunidade Autónoma de Galicia.
5. A realización das prácticas non implica relación laboral coa empresa nin supón compensación económica ás persoas participantes pola súa formación práctica, salvo no previsto sobre bolsas e axudas para persoas traballadoras desempregadas que participen en accións formativas de formación profesional para o emprego.
6. No caso de persoas traballadoras ocupadas, cando o módulo de formación práctica en centros de traballo se poida realizar na mesma empresa da persoa traballadora e non teña relación co posto de traballo que desempeña, non formará parte do horario laboral, salvo que se estableza no ámbito da negociación colectiva.
7. A duración das prácticas non pode exceder en ningún caso a duración da parte práctica que se fixa no programa formativo e non poderán rematar con posterioridade á finalización da actividade formativa.
8. Antes do comezo das prácticas a entidade beneficiaria da subvención porá en coñecemento da Inspección de Traballo unha relación do alumnado que vai realizar as prácticas, os nomes da empresa ou empresas en que terán lugar, así como as localidades, datas e horario de realización.
9. As empresas en que se realicen as prácticas comunicaranlles aos representantes legais das persoas traballadoras na empresa unha relación do alumnado que vai realizar as prácticas, as datas e o horario de realización.
10. Unha vez comunicadas as prácticas, os centros e entidades deberanlle comunicar ao órgano competente calquera incidencia que se produza no seu desenvolvemento.
Capítulo VI
Pagamento, xustificación e reintegros
Artigo 38. Pagamento da subvención
1. Ditada e notificada a resolución de concesión, e unha vez comprobado que a entidade beneficiaria está ao día das súas obrigas tributarias e coa Seguridade Social e que non é debedora por resolución de procedencia de reintegro, as entidades, unha vez que conste a aceptación tácita ou expresa da subvención, poderán solicitar o pagamento dun anticipo con carácter previo ao inicio da actividade por importe do 25 % da subvención concedida.
2. Por solicitude da entidade beneficiaria e unha vez acreditado o inicio da actividade formativa do programa de formación, procederase ao pagamento dun segundo anticipo do 35 % da subvención concedida.
Entenderase iniciada unha actividade formativa unha vez que se produza, tras a correspondente validación previa do persoal técnico a que se refire o artigo 21.1 desta orde, a comunicación á Dirección Xeral de Formación para o Emprego e Orientación do inicio da execución do primeiro grupo formativo das accións formativas aprobadas.
3. No caso de non existir a solicitude de anticipo do 25 % previa ao comezo da actividade, unha vez acreditado o inicio do primeiro grupo formativo poderase solicitar de maneira conxunta un anticipo de ata o máximo do 60 % do importe concedido para a acción formativa.
4. Os anticipos deberán solicitarse a través do aplicativo informático SIFO.
5. Nos termos do artigo 12.2 da Orde TMS/368/2019, do 28 de marzo, pola que se desenvolve o Real decreto 694/2017, do 3 de xullo, polo que se desenvolve a Lei 30/2015, do 9 de setembro, a contía do importe dos referidos anticipos calcularase sobre a base do importe concedido para o total do programa formativo, entendido este como o conxunto das accións formativas obxecto da subvención.
6. Nos termos do artigo 63 do Decreto 11/2009, do 8 de xaneiro, polo que se aproba o Regulamento da Lei 9/2007, os anticipos non poderán superar a anualidade prevista en cada exercicio orzamentario e, polo tanto, o pagamento poderá ser dividido en dúas anualidades para respectar este límite, para o cal se adoptarán as correspondentes medidas de xestión orzamentaria que permitan a percepción do importe total do anticipo ou suma de anticipos a que se teña dereito.
O importe aboado no ano inicial poderá ser inferior cando se estime, en función da data de inicio efectiva e, se for o caso, das previsións achegadas polas entidades beneficiarias, que o gasto realizado nese ano vai ser inferior ao importe do pagamento máximo do anticipo. Neste caso, a cantidade non aboada poderá ser pagada no exercicio seguinte tamén en concepto de anticipo.
No caso de que o gasto realizado sexa superior ao importe concedido na primeira anualidade, o exceso de gasto realizado pola entidade beneficiaria entre o 1 de outubro e o 31 de decembro da primeira anualidade poderá ser xustificado e aboado con cargo ao orzamento da segunda anualidade da subvención concedida.
7. Os pagamentos dos anticipos faranse efectivos no prazo máximo de tres meses, contado desde a presentación polo beneficiario da documentación requirida para solicitar o dito anticipo.
8. Conforme o previsto no artigo 65.4, sobre réxime xeral de garantías, do Decreto 11/2009, do 8 de xaneiro, polo que se aproba o Regulamento da Lei 9/2007, do 13 xuño, de subvencións de Galicia, as institucións sen ánimo de lucro están exoneradas de constituír garantía para a realización dos anticipos.
Así mesmo, en aplicación do artigo 67.4 do antedito Decreto 11/2009, sobre a obriga de constituír garantías en pagamentos anticipados e á conta, as entidades con ánimo de lucro quedan eximidas da obriga de constituír garantías para a realización dos anticipos.
9. Os gastos realizados con cargo aos anticipos deberán referirse á anualidade orzamentaria para a cal foron concedidos e deberán xustificarse dentro do prazo que se sinale na correspondente convocatoria e, en calquera caso, non poderán sinalar para tal efecto unha data posterior ao 31 de marzo do ano natural seguinte á anualidade orzamentaria con cargo á cal foran outorgados.
10. O resto do importe concedido farase efectivo unha vez finalizado o programa formativo subvencionado e xustificados os gastos efectuados por anualidade orzamentaria.
Para o cálculo do importe que se deberán aboar terase en consideración a xustificación presentada.
O prazo para realizar o pagamento a que se refire este punto será de seis meses, computable desde a data de presentación da correspondente solicitude, acompañada da documentación acreditativa requirida.
Artigo 39. Xustificación da subvención
1. As entidades beneficiarias quedarán obrigadas a xustificar a realización da actividade formativa subvencionada, o destino dos fondos recibidos e o cumprimento das condicións establecidas na resolución de concesión da subvención.
2. A xustificación da subvención deberá realizarse dentro do prazo de dous meses desde o remate da última acción formativa do programa de formación.
A dita xustificación deberá realizarse a través da aplicación informática SIFO.
3. O órgano competente para tramitar a documentación xustificativa das subvencións e a súa comprobación técnico-económica será o Servizo de Xestión Administrativa da Formación para o Emprego.
4. Para os efectos desta comprobación, a entidade de formación deberá presentar a seguinte documentación:
I. Memoria de actuación xustificativa, asinada pola persoa responsable da entidade beneficiaria, do cumprimento das condicións e obrigas impostas na resolución de concesión da subvención e na normativa de aplicación, con indicación das actividades realizadas, o programa completo da formación impartida con detalle da planificación temporal e do profesorado que o impartiu, os resultados obtidos e as competencias adquiridas polo alumnado ao remate da formación.
A memoria incluirá a certificación de finalización do programa de formación, a certificación de execución de cada acción formativa e, de ser o caso, dos diferentes grupos en que se imparte, con indicación dos distintos colectivos de persoas participantes axustados aos compromisos asumidos pola entidade, aos topes porcentuais e demais criterios establecidos nesta orde.
Así mesmo, deberá incluír a relación das actuacións de avaliación e seguimento do alumnado desenvolvidas, con indicación das probas e controis realizados, e a acta asinada das avaliacións efectuadas cos resultados obtidos.
Ademais da achega documental da acta, os resultados das probas e controis de aprendizaxe deberán estar mecanizados no aplicativo SIFO.
Igualmente, formará parte desta memoria a documentación que a seguir se relaciona:
• Cuestionarios realizados polo alumnado durante a realización da actividade formativa.
• Informe de avaliación e control da calidade da acción formativa e documentación relativa ás actuacións de avaliación e control da calidade da formación levadas a cabo a que se refire o artigo 36 da presente orde.
II. Memoria económica xustificativa do custo das actividades formativas, asinada pola persoa responsable da entidade beneficiaria, que incluirá, como mínimo, as seguintes epígrafes:
a) Cadro resumo por acción formativa e grupo de cada persoa alumna, que inclúa o número de horas lectivas efectivamente realizadas, o número de horas relativas ás faltas de asistencia debidamente xustificadas e o número de horas relativas ás faltas de asistencia sen xustificar e dentro dos límites establecidos no artigo 23.
Na información deberá identificarse o alumnado segundo a categoría de participante, formado e aprobado, definida de acordo co seguinte criterio:
• Alumnado participante. Persoas alumnas que inician a acción formativa. Incluiranse nesta epígrafe aquelas persoas que se incorporen á acción formativa con posterioridade ao seu inicio e de conformidade co disposto no artigo 32 desta orde.
• Alumnado formado. Persoas participantes que, na modalidade presencial, cumpriron cos requisitos de asistencia presencial ou que, na modalidade de teleformación, realizaron cando menos o 75 % dos controis periódicos de seguimento da súa aprendizaxe e, de ser o caso, asistisen ás sesións presenciais de asistencia obrigada establecidas na orde.
• Alumnado aprobado: persoas participantes que superan a acción formativa coa consideración de aptas.
Documentación explicativa dos abandonos producidos. No caso de abandono por colocación, deberá achegarse a documentación xustificativa da colocación.
b) Cálculo da contía global da subvención xustificada que corresponda en aplicación dos módulos económicos establecidos e os criterios previstos nesta orde.
No caso de que fose concedida unha subvención complementaria para custos derivados da adaptación da acción formativa para a participación de persoas con discapacidade, deberá engadirse o cálculo correspondente ao financiamento adicional recoñecido.
c) No caso de opoñerse á consulta por parte da Consellería de Promoción do Emprego e Igualdade ou no suposto de non prestar o consentimento a que se refire o artigo 9 desta orde, deberán presentar certificado de estar ao día no cumprimento das obrigas tributarias e coa Seguridade Social, e que non teñen pendente de pagamento ningunha débeda, por ningún concepto, coa Administración pública da Comunidade Autónoma de Galicia, e de que están ao día no pagamento de obrigas por reintegro, de acordo co disposto no artigo 9 do Decreto 11/2009, polo que se aproba o Regulamento da Lei 9/2007, de subvencións de Galicia.
A obriga de achegar un certificado de cumprimento das obrigas sinaladas no parágrafo anterior poderá substituírse, para os casos que se recollen no artigo 11 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, por unha declaración responsable da entidade de estar ao día no cumprimento das obrigas tributarias ou fronte á Seguridade Social e de non ter pendente de pagamento ningunha outra débeda coa Administración pública da Comunidade Autónoma.
d) Declaración complementaria do conxunto de todas as axudas solicitadas (aprobadas, concedidas ou pendentes de resolución) para impartir o mesmo programa formativo ás distintas administracións públicas competentes ou a calquera dos seus organismos, entes ou sociedades, así como doutros ingresos que financiasen a actividade subvencionada, con indicación do seu importe e procedencia.
e) Declaración responsable de que todos os gastos realizados con cargo á subvención están debidamente contabilizados e foron efectivamente pagados con anterioridade á presentación da xustificación, incluíndo a totalidade dos salarios e/ou facturas do persoal vencellado á docencia, con indicación expresa de que os importes aboados cumpren coa normativa vixente, así como, de ser o caso, cos convenios colectivos que sexan de aplicación.
f) Na modalidade presencial ou na parte presencial da modalidade de teleformación ou mixta, no caso de se teren producido incidencias no sistema de control biométrico de asistencia debidamente acreditadas perante o equipo de soporte, partes diarios de asistencia no modelo xerado pola aplicación SIFO asinados polo alumnado participante e o persoal formador ao inicio e ao final de cada xornada, así como da persoa responsable da entidade beneficiaria. Nos ditos partes deberanse identificar de maneira veraz as persoas participantes e expresar as horas realizadas diariamente por cada unha delas; reflectirase expresamente o número de horas e minutos de ausencia.
g) Nos cursos que se impartan na modalidade de teleformación ou na parte de teleformación da modalidade mixta, e naqueles casos en que a formación se desenvolva mediante aula virtual, documentación acreditativa da participación do alumnado e do persoal docente de acordo co disposto no artigo 21.10 da presente orde.
h) Relación nominal do cadro de persoal vinculado á docencia que participou nas accións formativas, con indicación expresa de se se trata de persoal asalariado mediante contrato mercantil, persoa socia da beneficiaria, persoa autónoma ou persoal interno da entidade formadora contratado para a formación.
Incluiranse nesta relación as persoas formadoras, persoas titoras-formadoras internas e externas, así como o persoal que, non tendo o carácter de persoa formadora ou titora-formadora da acción formativa, realizou tarefas relacionadas directamente co seguimento do proceso de aprendizaxe, asesoramento e orientación ao alumnado.
i) Inventario do material entregado ao alumnado que inclúa a sinatura de recepción individualizada.
5. Se como resultado da comprobación técnico-económica da documentación a unidade administrativa competente comproba que o importe liquidable da acción formativa foi inferior á subvención concedida, aboarase unicamente o importe efectivamente xustificado.
6. Transcorrido o prazo establecido para a xustificación sen que esta se presentase ante a Dirección Xeral de Formación para o Emprego e Orientación, requirirase a entidade beneficiaria para que a presente no prazo improrrogable de dez días hábiles. A falla de presentación da xustificación, transcorrido este novo prazo, dará lugar ao inicio do procedemento de reintegro.
A Dirección Xeral de Formación para o Emprego e Orientación, logo de solicitude da entidade beneficiaria, poderá autorizar unha ampliación do prazo establecido para a presentación da xustificación, que non poderá exceder a metade deste e sempre que non se prexudiquen dereitos de terceiros.
Se a documentación presentada é insuficiente para considerar correctamente xustificada a subvención concedida, poranse en coñecemento da persoa beneficiaria as insuficiencias observadas para que no prazo de dez días sexan emendadas.
7. No caso de concesión de anticipos, os gastos realizados con cargo a estes estarán suxeitos ao disposto no artigo 38 desta orde.
8. Unha vez examinada e comprobada a documentación presentada, ditarase a resolución de liquidación final, que lles será notificada ás entidades beneficiarias.
Para determinar a liquidación final teranse en conta, de ser o caso, as minoracións que correspondan como consecuencia do incumprimento dos compromisos asumidos que deron lugar á puntuación da valoración técnica.
No caso de que a liquidación efectuada for inferior á cantidade anticipada, tramitarase o correspondente expediente de reintegro.
9. Os beneficiarios estarán obrigados a conservar, durante o prazo de 4 anos, considerando, se é o caso, a interrupción do prazo de prescrición do dereito da Administración a recoñecer ou liquidar o reintegro da subvención concedida, contado desde a liquidación final da subvención, os xustificantes da realización da actividade que fundamenta a súa concesión e a aplicación dos fondos recibidos, para os efectos das actuacións de comprobación e control, así como de calquera outra obriga legal que así o exixa.
10. A aplicación da xustificación a través dos módulos económicos non exime as entidades beneficiarias do deber de cumprir a lexislación vixente en materia financeira, fiscal, contable e laboral, especialmente no referente á contabilidade dos gastos, aboamento de salarios ao persoal, ingresos das cotizacións á Seguridade Social, facturación e subcontratación.
Artigo 40. Liquidación da subvención
1. A liquidación das axudas realizarase en función das persoas participantes que realizasen as accións formativas, atendendo ás horas lectivas ou aos controis periódicos realizados segundo a modalidade de impartición, e de acordo cos módulos económicos establecidos.
En ningún caso a liquidación resultante poderá superar a contía da subvención inicialmente concedida.
Para determinar o número de horas computables, unicamente se terán en conta as efectivamente realizadas polo alumnado e que consten debidamente acreditadas a través dos diferentes medios de control de asistencia admitidos establecidos nesta orde. No caso de existir discrepancia entre as acreditacións achegadas, utilizarase para determinar o custo o número de horas que resulte inferior.
Na modalidade presencial ou na parte presencial das modalidades de teleformación ou mixta, á suma das horas computables indicadas no parágrafo anterior, sumaranse as faltas de asistencia xustificadas ata un máximo do 25 % do total de horas da acción formativa.
Para estes efectos, consideraranse xustificadas as seguintes causas:
• Enfermidade ou accidente acreditados.
• Consulta médica propia ou de familiares ata o primeiro grao ou persoas ao seu cargo.
• Nacemento de fillo ou filla e supostos de acollemento ou adopción.
• Falecemento, accidente ou enfermidade grave dun familiar ata o segundo grao: ata 2 días hábiles na mesma localidade e 3 días hábiles en distinta localidade.
• Asistencia a exames finais e outras probas de aptitude, de carácter oficial.
• Citación administrativa ou xudicial.
• Permiso por violencia de xénero.
• As actividades vinculadas coa conciliación familiar por coidado de filllos/as e/ou persoas acollidas menores de 12 anos ou de familiares dependentes ata o segundo grao ao cargo da persoa alumna, sempre que resulte acreditada debidamente tanto a causa como o vínculo familiar nos termos da normativa aplicable.
• Entrevista de traballo, polo tempo indispensable para a súa realización.
A xustificación das ausencias deberá facerse mediante documentos ou calquera outro medio que acredite de modo fidedigno o motivo.
Para os efectos de cómputo do referido 25 % do total de horas da acción formativa, teranse en conta para o cálculo da subvención as faltas de asistencia sen xustificar que se produzan dentro dos límites establecidos no artigo 23.5 desta orde.
2. Nas accións presenciais, para os efectos de determinar a subvención unha vez executada a formación, considerarase que unha persoa rematou a formación cando asistise, polo menos, ao 75 % do tempo de impartición da acción formativa, incluídas, de ser o caso, as prácticas non laborais.
Nas accións formativas impartidas mediante a modalidade de teleformación considerarase, para os efectos de determinación da subvención, que remataron a acción formativa aquelas persoas que realizasen, cando menos, o 75 % dos controis periódicos de seguimento da súa aprendizaxe que se establezan na guía didáctica ou no proxecto formativo, con independencia das horas de conexión e que, de ser o caso, asistisen ás sesións presenciais de asistencia obrigada.
No caso de que unha persoa alumna non poida asistir a algunha titoría presencial de carácter obrigatorio establecida no programa da especialidade formativa que se vai impartir, a dita titoría poderá, con anterioridade á data de remate da acción formativa, impartirse nunha segunda ocasión, sempre que resulte acreditada que a ausencia da persoa interesada se deba a algunha das causas xustificadas establecidas no artigo 40.1 desta orde.
Para acadar as porcentaxes establecidas neste punto non se terán en conta as horas relativas aos módulos transversais, ben que serán computables para o cálculo do custo subvencionable.
No suposto de persoas traballadoras desempregadas, considerarase que rematou a acción formativa quen tivese que abandonala por atopar emprego. Así mesmo, terán esta consideración aquelas persoas participantes que causasen baixa por enfermidade ou accidente acreditado, sempre que en calquera dos supostos relacionados tivesen realizado un mínimo do 10 % da acción formativa de acordo cos criterios establecidos neste punto para cada modalidade.
Con independencia do indicado nos anteriores parágrafos deste punto, para os efectos do cálculo da liquidación sempre que un alumno ou alumna, de acordo cos criterios establecido, no artigo 35 desta orde, teña dereito ao diploma, será subvencionable.
3. Para os efectos de determinar o módulo económico que se deberá aplicar, a impartición da formación que se realice mediante aula virtual terá a consideración de presencial.
4. No caso de accións formativas que teñan un mínimo dunha persoa alumna con certificación de discapacidade e logo de solicitude expresa da entidade beneficiaria, poderase incrementar o importe da subvención inicialmente aprobado, sempre que se xustifique axeitadamente e que se destine exclusivamente a contratación do apoio necesario para a adecuada participación na acción formativa das persoas con discapacidade.
A memoria explicativa das necesidades que haxa que cubrir deberá presentarse unha vez realizada a selección do alumnado e no prazo máximo de 15 días naturais desde a incorporación á acción formativa da persoa con discapacidade.
Para financiar estes custos adicionais ditarase unha resolución complementaria co importe total dos gastos autorizados polos conceptos de persoal de apoio e adaptación curricular ou do material didáctico. O importe adicional calcularase en función do custo unitario por cada hora lectiva da acción formativa en que deba participar a persoa ou persoas con discapacidade, independentemente do número de persoas alumnas con discapacidade.
Para os custos adicionais de adaptación da acción formativa á participación do alumnado con discapacidade, cada convocatoria establecerá un custo unitario por hora lectiva.
5. De se produciren abandonos que dean lugar a baixas non computables nin xustificadas, con posterioridade á impartición do 25 % das horas de formación, poderase admitir unha desviación do 15 % con respecto ao número de participantes que tivesen comezado as accións formativas, excluídos aqueles que incumprisen os requisitos e condicións da convocatoria, nos termos sinalados polo artigo 10.3 da Orde TMS/368/2019, do 28 de marzo, de maneira que eses abandonos se teñan en conta para o cálculo do custo subvencionable, co límite desa desviación e co mesmo criterio que se se tratase dun abandono por colocación.
6. Para os efectos do cálculo da liquidación, non se terán en conta aquelas persoas participantes que tivesen que abandonar a formación por incumprimento das condicións da convocatoria ou por non cumpriren os requisitos exixidos para poder participar na acción formativa.
7. O cálculo da liquidación realizarase multiplicando o módulo económico da especialidade aplicable segundo a modalidade de impartición, presencial ou teleformación, polo número de persoas alumnas computables e polas horas de formación computables de cada persoa alumna.
Na modalidade mixta a liquidación realizarase nos termos establecidos no parágrafo anterior aplicando o módulo económico correspondente á modalidade presencial e de teleformación na parte correspondente a cada unha delas.
8. Consonte o previsto no artigo 17 da Lei de subvencións de Galicia, o importe das subvencións en ningún caso poderá ser de tal contía que, illadamente ou en concorrencia con outras subvencións, axudas, ingresos ou recursos, supere o custo da actividade subvencionada.
Segundo o previsto no artigo 29 da devandita lei e no artigo 42 do seu regulamento, na xestión da subvención deberase ter en conta que se consideran gastos subvencionables os realizados no prazo establecido polas convocatorias e considerarase gasto realizado o que foi efectivamente pagado con anterioridade á finalización do período de xustificación.
As subvencións previstas nesta orde son incompatibles coa percepción doutras subvencións, axudas, ingresos ou recursos para a mesma acción formativa procedentes de calquera persoa, Administración ou entes públicos ou privados, estatais, da Unión Europea ou de organismos internacionais.
9. Sen prexuízo do disposto no artigo 41, sobre incumprimento de obrigas e reintegro, no momento da liquidación garantirase a percepción dun mínimo do 70 % do importe inicialmente concedido por cada acción formativa impartida, se esta remata cun número de persoas alumnas equivalente, cando menos, ao 50 % do número de prazas inicialmente programadas.
Para os efectos de aplicar este criterio, do número de prazas inicialmente programadas restarase o número de persoas que abandonaron a acción formativa durante a súa impartición por acceder a un emprego.
Artigo 41. Incumprimento de obrigas e reintegro
1. O incumprimento das obrigas establecidas na presente orde e demais normas aplicables, así como das condicións que se estableceren na correspondente resolución de concesión, dará lugar á perda total ou parcial do dereito ao cobramento da subvención ou, logo do oportuno procedemento de reintegro, á obriga de devolver total ou parcialmente a subvención percibida e os xuros de demora correspondentes.
2. De conformidade co artigo 14.1.n) da Lei 9/2007, de subvencións de Galicia, e co artigo 15 da Orde TMS/368/2019, o importe da perda do dereito ao cobramento da subvención ou do reintegro determinarase de acordo cos seguintes criterios de gradación dos posibles incumprimentos das condicións impostas con motivo da concesión das subvencións:
I. Supostos de incumprimento total:
a) Polo incumprimento das condicións exixidas á entidade beneficiaria para a concesión da subvención: perda ou reintegro do 100 % sobre o gasto subvencionado.
b) Polo feito de non realizar a actividade obxecto de subvención ou incumprir os fins que a fundamentan: perda ou reintegro do 100 % sobre o gasto subvencionado.
c) Polo incumprimento das obrigas de presentación da documentación exixida para a xustificación das accións formativas: no caso de que non se presente ningunha documentación, procederase á perda ou ao reintegro do 100 % da subvención.
d) Polo incumprimento da obriga de comunicar a obtención doutras axudas ou subvencións para a mesma finalidade: reintegro total da axuda percibida, máis os xuros de demora, sen prexuízo da incoación de expediente sancionador e demais responsabilidades en que poida incorrer a beneficiaria.
e) Igualmente, considerarase que concorre o incumprimento total se a realización da actividade subvencionada do programa formativo non acada o 25 % dos seus obxectivos, medidos co indicador do número de horas de formación multiplicado polo número de alumnas e alumnos finalizados.
Para estes efectos, incluiranse tamén as horas de ausencia que resulten computables por falta xustificada ou por colocación.
II. Supostos de incumprimento parcial:
a) O incumprimento da obriga de comunicarlle ao órgano que concede a subvención a solicitude doutras axudas ou subvencións para a mesma finalidade dará lugar á perda ou reintegro do 2 % da axuda total xustificada aceptada.
b) O incumprimento das obrigas en materia de publicidade, información e comunicación establecidas nesta orde e pola normativa aplicable dará lugar á perda ou reintegro do 2 % sobre a subvención xustificada aceptada para a acción formativa en que se incumpriu a obriga.
c) No caso de impartir formación a alumnos ou alumnas que non cumpren os requisitos necesarios para o acceso á formación, minorarase a subvención na parte correspondente aos ditos alumnos e alumnas en relación coa subvención xustificada aceptada.
d) No suposto de demoras ou falta de presentación en prazo da documentación exixida no artigo 20 desta orde, aplicarase unha minoración gradual en virtude do grao de incumprimento, que non poderá superar o 5 % sobre a subvención xustificada aceptada.
Para os efectos de determinar o grao de incumprimento, terase en consideración o tempo de demora e os grupos da acción ou accións formativas para os cales non se realizou en prazo a presentación da documentación.
e) De ser o caso, o incumprimento do compromiso de diversificación territorial da oferta formativa a que se refire o artigo 15.1.c) desta orde dará lugar á perda ou reintegro de ata o 1,5 % da subvención xustificada aceptada para o programa formativo. A porcentaxe que se vai aplicar determinarase de acordo co seguinte criterio:
• No caso de que o compromiso de participación só se incumpra nunha provincia, aplicarase unha porcentaxe do 0,5 %.
• No caso de que o compromiso de participación se incumpra para dúas provincias, aplicarase unha porcentaxe do 1 %.
• No caso de que o compromiso de participación se incumpra para tres provincias, aplicarase unha porcentaxe do 1,5 %.
f) De ser o caso, o incumprimento do compromiso adquirido de participación de colectivos considerados prioritarios no programa de formación a que se refire o artigo 15.1.g) desta orde dará lugar a unha perda ou reintegro da subvención xustificada aceptada de ata un máximo do 2,5 %.
O cálculo da porcentaxe que se vai minorar efectuarase de acordo co seguinte criterio:
Porcentaxe para aplicar = (puntos asignados por este criterio na avaliación técnica – puntos que corresponderían en función da porcentaxe real de participación de persoas de colectivos prioritarios) / 4
g) De ser o caso, o incumprimento do compromiso adquirido de participación nas accións formativas do programa de formación a que se refire o artigo 15.1.h) desta orde, de persoas con discapacidade física, psíquica ou sensorial recoñecida por organismo competente, dará lugar á perda ou reintegro de ata o 5 % da subvención xustificada aceptada para o programa formativo, calculada en relación coas persoas participantes nos grupos en que se asumiu o dito compromiso.
Porcentaxe para aplicar = 5 * (nº de participantes nos grupos comprometidos sen discapacidade acreditada / nº total de participantes nos grupos comprometidos)
h) De ser o caso, o incumprimento do compromiso do emprego do idioma galego ou da subministración ao alumnado dos contidos didácticos en lingua galega, a que se refire o artigo 15.1.i) desta orde, dará lugar ao reintegro do 2 % da subvención xustificada e aceptada para o programa formativo.
i) No suposto de incumprimento das obrigas establecidas no artigo 21 aplicarase, naqueles supostos non regulados expresamente nas anteriores epígrafes deste artigo, unha minoración gradual en virtude do grao de incumprimento, que non poderá superar o 10 % sobre o total do gasto subvencionado xustificado e aceptado do programa formativo.
Para estes efectos, as renuncias parciais ou totais producidas con posterioridade á aceptación expresa ou tácita da subvención terán a consideración de incumprimento das condicións de aprobación da resolución. Para os efectos de gradación da minoración, terase en consideración se a renuncia se presentou de forma expresa e en prazo.
Artigo 42. Infraccións e sancións
1. Conforme o previsto no artigo 19 da Lei 30/2015, do 9 de setembro, polo que se regula o sistema de formación profesional para o emprego no ámbito laboral, o réxime de infraccións e sancións aplicables no ámbito da formación profesional para o emprego será o regulado polo texto refundido da Lei sobre infraccións e sancións na orde social, aprobado polo Real decreto lexislativo 5/2000, do 4 de agosto.
No non previsto no réxime de infraccións e sancións establecido no parágrafo anterior observarase o contido da Lei 9/2007, do 13 de xuño, de subvencións de Galicia.
2. As infraccións poderán ser cualificadas como leves, graves ou moi graves e levarán aparelladas as sancións que en cada caso correspondan de acordo coa normativa vixente.
3. As sancións impostas polas infraccións graves e moi graves en materia de formación profesional para o emprego que dean lugar a que a subvención sexa declarada indebida polo órgano concedente, unha vez firmes, incluiranse na Base de datos nacional de subvencións (BDNS).
4. A obriga de reintegro establecida no artigo 41 desta orde entenderase sen prexuízo do previsto na Lei 9/2007, do 13 de xuño, de subvencións de Galicia, se concorresen as accións e omisións tipificadas na antedita lei.
Artigo 43. Devolución voluntaria das subvencións
1. A acreditación de ter ingresado o importe correspondente á diferenza entre a cantidade xustificada e a recibida en concepto de anticipo, de ser o caso, terá a consideración de devolución voluntaria, de acordo co establecido no artigo 90 do Regulamento da Lei xeral de subvencións.
2. De acordo co establecido no artigo 64 do Regulamento da Lei 9/2007, do 13 de xuño, de subvencións de Galicia, aprobado polo Decreto 11/2009, do 8 de xaneiro, as persoas ou entidades beneficiarias poderán realizar, sen o requirimento previo da Administración, a devolución total ou parcial da subvención concedida, mediante o seu ingreso na conta IBAN ES82 2080 0300 8731 1006 3172 en concepto de devolución voluntaria da subvención.
O importe da devolución incluirá os xuros de demora, de acordo co previsto no artigo 34 da Lei 9/2007, do 13 de xuño, de subvencións de Galicia, ata o momento en que se produciu a devolución efectiva por parte da beneficiaria.
O ingreso realizarase segundo o disposto na normativa reguladora do procedemento de recadación.
3. En todo caso, a persoa ou entidade beneficiaria deberá presentar ante o órgano concedente copia xustificativa da devolución voluntaria realizadan que conste a data do ingreso, o seu importe e o número do expediente e denominación da subvención concedida.
Capítulo VII
Primeira convocatoria
Artigo 44. Programas de formación subvencionables na primeira convocatoria
Será subvencionable a impartición dos seguintes programas de formación dirixidos á adquisición de competencias técnicas profesionais:
a) Programa I, de formación transversal: integrado por accións formativas dirixidas á obtención de competencias transversais a varios sectores da actividade económica.
b) Programa II, de formación vencellada á Axenda galega das capacidades: dirixido á impartición das especialidades formativas incluídas na Axenda galega das capacidades, no marco do sistema de formación profesional para o emprego no ámbito laboral non conducentes á obtención de certificados de profesionalidade ou á realización de competencias clave.
Artigo 45. Financiamento
1. Destínase a esta primeira convocatoria un crédito por importe total de 7.772.334 €, distribuído en dúas anualidades, que se imputarán con cargo ás aplicacións 2023 11.50.323B.471.0 e 2023 11.50.323B.481.0, ou a aquelas que as substitúan de conformidade coa normativa orzamentaria aplicable, con código de proxecto 2013 00493.
Aplicación orzamentaria |
Anualidade 2023 |
Anualidade 2024 |
Importe total |
2023 11.50.323B.471.0 |
2.844.092 € |
2.137.114 € |
4.981.206 € |
2023 11.50.323B.481.0 |
928.242 € |
1.862.886 € |
2.791.128 € |
Total |
3.772.334 € |
4.000.000 € |
7.772.334 € |
Estes créditos orzamentarios están recollidos no proxecto de Lei de orzamentos xerais da Comunidade Autónoma de Galicia para o ano 2023, aprobado polo Consello da Xunta de Galicia na súa reunión do día 18 de outubro de 2022.
Esta convocatoria, dado o seu carácter de tramitación anticipada, queda sometida á condición suspensiva da existencia de crédito adecuado e suficiente no momento da resolución de concesión.
2. Para cada programa de formación, a repartición dos anteditos importes realizarase en atención ás seguintes porcentaxes:
Programa de formación |
Porcentaxe |
Programa I-obtención de competencias transversais |
40 % |
Programa II-especialidades incluídas na Axenda galega das capacidades |
60 % |
3. Os créditos orzamentarios a que se refire este artigo poderán ser obxecto de modificacións como consecuencia da asignación ou da redistribución de fondos para o financiamento dos programas de formación para o emprego.
Poderá ampliarse a contía máxima dos créditos dispoñibles para esta convocatoria. O incremento de crédito estará condicionado á declaración de dispoñibilidade do crédito como consecuencia dunha xeración, ampliación, incorporación de crédito ou da existencia de remanentes doutras convocatorias financiadas con cargo ao mesmo crédito ou créditos incluídos no mesmo programa ou en programas do mesmo servizo.
Calquera modificación ou ampliación dos créditos dispoñibles estará condicionada ao cumprimento dos supostos e das condicións previstos nos artigos 30 e 31 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia.
4. O módulo económico €/hora por persoa alumna aplicable a esta convocatoria de subvencións será o establecido, para cada especialidade formativa e modalidade de impartición, no anexo I.
5. Para os custos adicionais de adaptación da acción formativa á participación do alumnado con discapacidade establécese un custo unitario de 16 € por hora lectiva.
Artigo 46. Solicitudes e prazos de presentación da primeira convocatoria
1. A presentación das solicitudes deberá axustarse ao disposto nos artigos 6, 7 e 8 da presente orde.
2. O prazo de presentación de solicitudes será dun mes, contado desde o día da entrada en vigor da orde, de conformidade co disposto na disposición derradeira segunda.
Se o último día do prazo for inhábil, entenderase prorrogado ao primeiro día hábil seguinte e, se no mes de vencemento non houber día equivalente ao inicial do cómputo, entenderase que o prazo finaliza o último día do mes.
Artigo 47. Límites na solicitude do programa formativo
1. Cada entidade de formación poderá presentar unha única solicitude por cada programa de formación incluído na convocatoria.
A solicitude incluirá un mínimo de dúas accións formativas diferentes ou dous grupos formativos dunha mesma acción formativa.
Este límite tamén será de aplicación para autorizar posibles reconfiguracións do programa formativo.
2. Unha entidade de formación non poderá ser beneficiaria, para cada programa de formación, dunha subvención que supere o 4 % do crédito orzamentario destinado ao dito programa.
Este límite porcentual non será de aplicación cando a subvención concedida ás solicitudes presentadas non esgote o orzamento previsto da convocatoria.
3. O número máximo de accións formativas dunha especialidade formativa concreta que poderá impartir un censo de formación será de 2.
4. O número máximo de participantes por acción formativa impartida será de 80 persoas.
5. Na modalidade de teleformación non poderá comezar ningún grupo dunha acción formativa se non reúne un mínimo de 8 persoas alumnas. A acreditación da existencia deste número mínimo de persoas alumnas realizarase polo acceso á plataforma de teleformación das persoas participantes durante os cinco primeiros días de impartición da actividade.
Para os efectos, de ser o caso, de cumprir os requisitos de capacidade das actividades presenciais previstas, a acción formativa poderá desagregarse en grupos, que deberán cumprir os requisitos de capacidade establecidos para este tipo de actividades.
6. Na formación que se imparta na modalidade presencial, unha acción formativa poderá desagregarse en grupos, que, para os casos en que as instalacións cumpran os requisitos que posibiliten esta capacidade, poderán constituírse cun mínimo de 8 e cun máximo de 25 participantes cada un deles.
Non poderá iniciarse ningún grupo dunha acción formativa impartida na modalidade presencial se non reúne un mínimo de 8 persoas alumnas o día de inicio da actividade.
7. Só poderán ser obxecto de financiamento aquelas solicitudes que obtivesen unha puntuación igual ou superior a 25 puntos na valoración técnica.
Artigo 48. Criterios particulares para aplicar na avaliación técnica das solicitudes da primeira convocatoria
1. Para determinar o grao de execución dos programas formativos, serán de aplicación os resultados obtidos na convocatoria do Plan de formación para o emprego (persoas traballadoras ocupadas), procedemento TR302A, regulada pola Orde do 9 de febreiro de 2021 para os exercicios 2021 e 2022.
2. Para os efectos de valoración da epígrafe de diversificación territorial da oferta formativa, entenderase que hai participación de persoas traballadoras dunha provincia cando a porcentaxe de participación, referida aos datos totais do programa formativo, de persoas alumnas desa provincia en relación co total do alumnado participante é igual ou superior ao 15 %.
Artigo 49. Prazos de realización das accións formativas da primeira convocatoria
As accións formativas correspondentes á primeira convocatoria non poderán comezar antes do 1 de xuño de 2023, polo que non se admitirá ningunha solicitude que inclúa datas anteriores.
A data límite para o remate das accións formativas que se desenvolvan exclusivamente durante a anualidade 2023 será o 20 de decembro de 2023.
Para as accións formativas que se desenvolvan durante as anualidades 2023 e 2024 ou exclusivamente durante a anualidade 2024, a data límite para a súa finalización será o 30 de setembro de 2024.
Non poderá inciarse ningunha acción formativa sen a validación previa, a través da aplicación informática SIFO, do cumprimento dos requisitos e das condicións por parte de persoal técnico da unidade administrativa competente.
Artigo 50. Prazos de xustificación das accións formativas da primeira convocatoria
1. Consonte o disposto no artigo 39 desta orde, a xustificación das accións formativas deberá realizarse a través da aplicación informática SIFO, dentro do prazo máximo de dous meses desde o remate da última acción formativa do programa de formación e de acordo cos seguinte límites:
a) Nos programas formativos que rematen ata o 30 de novembro de 2023, a data límite para a presentación da xustificación final das accións formativas será o 15 de decembro de 2023.
b) Nos programas formativos que rematen despois do 30 de novembro de 2023, a data límite para a presentación da xustificación final do programa formativo será o 31 de outubro de 2024.
2. Se a documentación presentada for insuficiente para considerar correctamente xustificada a subvención concedida, a Dirección Xeral de Formación para o Emprego e Orientación porá en coñecemento da entidade beneficiaria afectada as insuficiencias detectadas para a súa emenda no prazo de 10 días hábiles.
3. No caso de concesión de anticipos, os gastos realizados con cargo a eles deberán referirse á anualidade orzamentaria para a cal foron concedidos e deberán xustificarse na data límite do 31 de marzo de 2024, para o caso de anticipos concedidos con cargo a 2023, e do 31 de outubro de 2024, para o caso de anticipos concedidos con cargo a 2024.
Artigo 51. Anexos
Son anexos desta orde os seguintes:
• Anexo I: especialidades formativas que para cada programa formativo poden ser obxecto de subvención na convocatoria, con indicación das que teñen a consideración de prioritarias, da súa duración en horas e do importe dos módulos económicos por hora e alumno/a correspondentes a cada unha delas nas modalidades presencial e de teleformación.
• Anexo II: modelo de solicitude.
• Anexo III: ficha do curso.
Disposición adicional primeira. Resolucións adicionais
Poderán ditarse resolucións adicionais cando existan fondos provenientes de renuncias de subvencións inicialmente concedidas, da asignación ou redistribución de fondos ou de incrementos das cantidades asignadas á Comunidade Autónoma pola Administración do Estado.
Neste caso, agás que se acuda a unha convocatoria complementaria, non poderán terse en conta outras solicitudes nin outras inscricións distintas ás tidas en conta para a resolución inicial, e as novas concesións de subvencións outorgaranse de acordo coa prelación determinada pola puntuación obtida na avaliación técnica.
Disposición adicional segunda. Modificación da resolución no caso de alteración das condicións
Toda alteración das condicións tidas en conta para a concesión da subvención, e, en todo caso, a obtención concorrente de subvencións ou axudas outorgadas por outras administracións ou entes públicos ou privados, estatais, da Unión Europea ou internacionais, poderá dar lugar á modificación ou revogación da resolución de concesión e ao reintegro da subvención percibida.
Disposición adicional terceira. Delegación de atribucións
Apróbase a delegación de atribucións da persoa titular da Consellería de Promoción do Emprego e Igualdade na persoa titular da Dirección Xeral de Formación para o Emprego e Orientación, para tramitar e resolver os expedientes de redistribución dos créditos necesarios para o financiamento desta orde, para resolver a concesión, denegación, modificación e reintegro das subvencións, así como para a autorización, disposición, recoñecemento da obriga e proposta de pagamento ou outras incidencias das subvencións reguladas nesta orde.
Disposición adicional cuarta. Normativa de aplicación supletoria
En todo o non disposto nesta orde será de aplicación o establecido na Lei 9/2007, do 13 de xuño, de subvencións de Galicia; no Decreto 11/2009, do 8 de xaneiro, polo que se aproba o Regulamento da Lei 9/2007; na Lei 38/2003, do 17 de novembro, xeral de subvencións, no que sexa de aplicación, e no Real decreto 887/2006, do 21 de xullo, que a desenvolve.
Será igualmente de aplicación o establecido na Lei 30/2015, do 9 de setembro, pola que se regula o sistema de formación profesional para o emprego no ámbito laboral, e no Real decreto 694/2017, do 3 de xullo, que a desenvolve. Ademais, resultará de aplicación a Orde TMS/368/2019, do 28 de marzo, pola que se desenvolve o Real decreto 694/2017, do 3 de xullo, polo que se desenvolve a Lei 30/2015, do 9 de setembro, pola que se regula o Sistema de formación profesional para o emprego no ámbito laboral, en relación coa oferta formativa das administracións competentes e o seu financiamento, e se establecen as bases reguladoras para a concesión de subvencións públicas destinadas ao seu financiamento, así como o resto da normativa regulamentaria que desenvolve as ditas normas.
Disposición adicional quinta. Información sobre a xestión de subvencións
1. En cumprimento do disposto no artigo 20 da Lei 38/2003, do 17 de novembro, xeral de subvencións, o texto de cada convocatoria pública efectuada no marco destas bases e a información requirida no ordinal oitavo do devandito artigo serán os comunicados á Base de datos nacional de subvencións (BDNS), nos termos do Real decreto 130/2019, do 8 de marzo, polo que se regula a Base de datos nacional de subvencións e a publicidade das subvencións e demais axudas públicas.
A BDNS dará traslado ao Diario Oficial de Galicia do extracto da correspondente convocatoria para a súa publicación.
2. De acordo co establecido no artigo 14, letra ñ), da Lei 9/2007, do 13 de xuño, de subvencións de Galicia, as entidades beneficiarias quedan informadas da existencia do Rexistro Público de Subvencións e dos aspectos previstos na Lei orgánica 3/2018, do 5 de decembro, de protección de datos persoais e garantía dos dereitos dixitais.
Disposición derradeira primeira. Autorización para ditar resolucións e instrucións
Autorízase a persoa titular da Dirección Xeral de Formación para o Emprego e Orientación para ditar, no ámbito das súas competencias, as resolucións e instrucións necesarias para o desenvolvemento e execución desta disposición.
Disposición derradeira segunda. Entrada en vigor
Esta orde entrará en vigor o día hábil seguinte ao da súa publicación no Diario Oficial de Galicia.
Santiago de Compostela, 3 de xaneiro de 2023
María Jesús Lorenzana Somoza
Conselleira de Promoción do Emprego e Igualdade