Examinada a solicitude de deslinde formulada polos representantes do MVMC Do Prado, pertencente á CMMVVMC do Prado; e do MVMC Penelas, pertencente á CMMVVMC da Teixugueira, no concello de Cartelle, resultan os seguintes:

Feitos:

Primeiro. O 13.7.2022 tivo entrada no Rexistro da Xefatura Territorial do Medio Rural de Ourense un escrito (núm. 138/RX 1838187, correspondente coa minuta núm. 2022-E-RC-585) do presidente da CMMVVMC do Prado, no cal solicita o cambio de clasificación da parcela denominada Os Outeiriños, actualmente pertencente á CMVMC da Teixugueira.

Coa solicitude achegou a seguinte documentación:

– Acta de deslindamento do 13.5.2022.

– Acta da asemblea realizada o 26.3.2022 pola CMMVVMC do Prado, en que se aprobou o deslindamento.

– Acta de conciliación redactada no Xulgado de Paz de Cartelle.

– Certificación de aprobación, do día 2.4.2022, da CMMVVMC da Teixugueira.

Segundo. O 9.9.2022, o presidente da CMMVMC do Prado presentou un novo escrito (núm. 192/RX 2238931), co cal achegou unha certificación relativa ao acordo de deslindamento adoptado o 26.03.2022 pola CMMVVMC do Prado.

Terceiro. O informe do Servizo de Montes da Xefatura Territorial de Ourense do 20 de setembro de 2022 fai constar que a documentación achegada corresponde ao cambio de titularidade dun predio íntegro que forma parte dun MVMC, a favor doutra comunidade propietaria que non é estremeira coa anterior.

Ao mesmo tempo, concorrería tamén un procedemento de revisión parcial de esbozo na medida en que o predio deslindado queda agora inequivocamente definido en toda a súa lonxitude con base na descrición contida na acta de deslindamento, que identifica o predio coa parcela catastral núm. 359 do pol. 23 e máis coa parte da parcela núm. 9002 do pol. 23 que bordea a anterior polos seus ventos E e N, e que vén delimitada polos pares de coordenadas X: 574.972,84; Y: 4.677.913,72 (no seu estremo SE) e X: 574.624,13; Y: 4.678.277,16 (no seu estremo NO).

A superficie do predio Os Outeiriños, unha vez aprobado o deslindamento e a revisión deste, sería de 5,78 ha; fronte a este dato, a dixitalización do predio que consta na actual carpeta-ficha revela unha superficie de 5,38 ha, o que permite concluír que non habería perda de superficie comunal.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia.

Consideracións legais e técnicas:

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, dite resolución, que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 20 de setembro de 2022, o Xurado Provincial de Clasificación de Montes Veciñais en Man común acordou, por unanimidade, o día 13 de decembro de 2022:

1. Aprobar o acto de conciliación acadado polas xuntas reitoras dos MVMC Do Prado, pertencente á CMMVVMC do Prado, e do MVMC Penelas, pertencente á CMMVVMC da Teixugueira, no concello de Cartelle.

2. Aprobar a proposta de revisión de esbozo do monte veciñal en man común Do Prado, no concello de Cartelle.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 20 de xaneiro de 2023

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense