Examinada a solicitude de deslinde formulada polos representantes do MVMC de Soutelo, pertencente á CMMVVMC de Soutelo e do MVMC de San Mamede, pertencente á CMMVVMC de San Mamede de Hedrada, no concello de Vilariño de Conso, resultan os seguintes
Feitos:
Primeiro. O 23.10.2019 a CMMVVMC de Soutelo presentou dous escritos (Rexel núm. 2019/2152393 e 2019/2152406) cos que solicitaba aprobar un deslindamento entre o MVMC de Soutelo (pertencente á CMMVVMC solicitante) e mais o MVMC de San Mamede (pertencente á CMMVVMC de San Mamede de Hedrada).
Non obstante, a dita comunidade presentara ao mesmo tempo ata catro solicitudes de deslindamento con outras tantas comunidades veciñas, as cales presentaban unha serie de deficiencias, polo que se considerou oportuno agardar a que todas as propostas fosen viables para así deixar o MVMC de Soutelo e as súas veciñanzas perfectamente definidas á vez.
Segundo. O 1 de agosto de 2022 a CMMVVMC de Soutelo presentou un novo escrito (2022/1983802), en que se propón un novo tramo que resulta ser contiguo ao solicitado inicialmente en 2019, e que é coherente con outra proposta de deslindamento (neste caso, Soutelo-Aceveda) presentada tamén en datas recentes.
Coa solicitude achegou a seguinte documentación:
– Acta de deslindamento do 20.6.2022.
– Memoria descritiva e planos.
– Acta de conciliación levantada no Xulgado de Paz de Vilariño de Conso.
– Certificacións de aprobación das dúas comunidades.
Terceiro. O informe do Servizo de Montes da Xefatura Territorial de Ourense de data 18 de outubro de 2022 fai constar que a documentación achegada corresponde ao deslindamento do perímetro estremeiro entre o MVMC de Soutelo, pertencente á CMVMC de Soutelo, e o MVMC de San Mamede, pertencente á CMVMC de San Mamede de Hedrada, desde o punto situado máis ao S que sería o punto 2 (Campo Romeo) da solicitude do 23.10.2019 ata o situado máis ao N que sería o punto 2 (Paioanes 2) da solicitude do 1.8.2022. Entre ambos puntos, o linde vén definido por un 3º punto que sería Cabeza de Paioanes, localizado na cota máis alta do monte e identificado coma punto 1 en ambas as dúas solicitudes.
En relación con este 3º punto (Cabeza de Paioanes), existe unha pequena incongruencia entre os dous escritos de deslindamento presentados, por canto o de 2019 o localiza na coordenada X: 646.375 mentres que o de 2022 faino na coordenada X: 646.376. Logo de comprobar os arquivos dixitais vectoriais de ambas as solicitudes, compróbase que a coordenada exacta dese punto é X: 646.375,5227; polo tanto, considerando o redondeo por exceso, a coordenada a ter en conta finalmente será X: 646.376 (completada coa Y: 4.669.567).
Por outra banda, o punto Paioanes 2 afectaríalle tamén ao MVMC Aceveda ou Coto Castiñeira pertencente á CMMVVMC de Aceveda. A este respecto, a CMMVVMC de Soutelo presentou unha solicitude de deslindamento con Aceveda que, formalmente e de forma recíproca, tamén lle afectaría a CMMVVMC de San Mamede. Porén, ambas as propostas (Soutelo-San Mamede e Soutelo-Aceveda) son coherentes entre si e, en conxunto, recollen a conformidade de todas as comunidades cos tramos acordados bilateralmente en cada unha delas (tal como se informou o 11.10.2022 ao respecto da proposta Soutelo-Aceveda), polo que a proposta Soutelo-San Mamede considérase validamente conciliada.
O citado informe considera que a solicitude se axusta ao establecido no artigo 53 da Lei 7/2012, de 28 de xuño, de montes de Galicia.
Consideracións legais e técnicas:
Primeiro. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento a seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditara resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 18 de outubro de 2022, o Xurado Provincial de Clasificación de Montes Veciñais en Man Común acordou por unanimidade o día 13 de decembro de 2022:
Aprobar o acto de conciliación acadado polas xuntas reitoras dos MVMC de Soutelo, pertencente á CMMVVMC de Soutelo; e do MVMC de San Mamede, pertencente á CMMVVMC de San Mamede de Hedrada, no Concello de Vilariño de Conso.
Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 20 de xaneiro de 2023
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense