Expediente: IN407A 2022/274-4.

Promotora: UFD Distribución Electricidad, S.A.

Denominación: substitución dos apoios A8UMXPD7//21, A8SD5NWO//22 e cambio de cruceta no apoio A8XC9PPI//20 na LMT LES809.

Concello: Cuntis.

Feitos:

Primeiro. O 14 de xuño de 2022, a empresa UFD Distribución Electricidad, S.A. solicitou a autorización administrativa previa, a autorización administrativa de construción e a declaración de utilidade pública da instalación eléctrica denominada substitución dos apoios A8UMXPD7//21, A8SD5NWO//22 e cambio de cruceta no apoio A8XC9PPI//20 na LMT LES809.

Examinado o proxecto de execución, conclúese que ten como finalidade a substitución do apoio A8UMXPD7//21 por un C-2000/14 e do apoio A8SD5NWO//22 por un C-2000/12, a retirada da cruceta actual, a instalación dunha BR-1 e a instalación dunha liña de media tensión aérea de 117 metros desde os apoios proxectados. As actuacións están previstas no lugar da Casa da Cruz, parroquia de Arcos, no municipio de Cuntis (Pontevedra).

Segundo. Esta xefatura territorial solicitou o preceptivo informe ás distintas administracións, organismos ou, de ser o caso, empresas de servizos de interese xeral afectadas, isto é, o Concello de Cuntis e o Servizo de Montes de Pontevedra. A empresa promotora manifestou a súa conformidade co condicionado emitido polo Servizo de Montes de Pontevedra.

O Concello de Cuntis non emitiu condicionado técnico, entendéndose en consecuencia a súa conformidade coa autorización de construción da dita infraestrutura eléctrica, conforme o disposto no artigo 131 do Real decreto 1955/2000, do 1 de decembro, sen prexuízo da autorización que lle corresponda outorgar.

Terceiro. O Anuncio do 3 de agosto de 2022 foi publicado o 19 de agosto de 2022 e o 1 de setembro de 2022 no Diario Oficial de Galicia e no taboleiro de edictos único do Boletín Oficial del Estado, respectivamente, co fin de notificar a afección da única parcela afectada que figura na relación de bens e dereitos achegadas pola empresa promotora.

Cuarto. O proxecto someteuse ao trámite de información pública mediante Resolución do 3 de agosto de 2022 publicada nos seguintes medios:

DOG (Diario Oficial de Galicia): 25 de agosto de 2022.

Xornal Faro de Vigo: 23 de agosto de 2022.

Taboleiro de anuncios do Concello de Cuntis desde o 5 de agosto de 2022 ata o 7 de outubro de 2022, conforme o certificado expedido polo propio Concello.

Durante o mencionado trámite non se recibiron alegacións.

Quinto. O 11 de agosto de 2022, UFD achegou unha nova relación de bens e dereitos na que identifica a persoa titular da única pacela afectada pola declaración de utilidade pública solicitada.

Sexto. Mediante escrito do 22 de agosto de 2022, esta xefatura territorial notificou a solicitude da autorización administrativa previa, a autorización administrativa de construción e a declaración de utilidade pública da referida instalación eléctrica ao titular da única parcela afectadas pola declaración de utilidade pública conforme a relación de bens e dereitos achegada pola empresa promotora.

Non se presentaron alegacións.

Consideracións legais e técnicas.

Primeiro. A Xefatura Territorial de Pontevedra é competente para resolver este expediente con fundamento no Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación (DOG núm. 126, do 4 de xullo) e no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).

Segundo. A lexislación de aplicación ao presente expediente é:

Lei 24/2013, do 26 de decembro, do sector eléctrico.

Lei 39/2015, do 1 de outubro, do procedemento administrativo común das administracións públicas.

Lei 40/2015, do 1 de outubro,de réxime xurídico do sector público.

Lei 3/2007, do 9 de abril, de prevención e defensa contra os incendios forestais de Galicia.

Lei do 16 de decembro de 1954, sobre expropiación forzosa.

Lei 9/2021, do 25 de febreiro, de simplificación administrativa e de apoio á reactivación económica de Galicia.

Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

Real decreto lei 23/2020, do 23 de xuño, polo que se aproban medidas en materia de enerxía e noutros ámbitos para a reactivación económica.

Real decreto 223/2008, do 15 de febreiro, polo que se aproba o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

Decreto do 26 de abril de 1957 polo que se aproba o Regulamento da Lei de expropiación forzosa.

Terceiro. As características técnicas da instalación son as que a seguir se describen:

Substitución dos apoios A8UMXPD7//21 e A8SD5NWO//22 por un apoio de tipo C-2000/16 e outro tipo C-2000/12, respectivamente, no tramo LES8097372 do circuíto aéreo da liña de media tensión LES809. Instalación dunha BR-1 no apoio A8XC9PPI//20. Liña de media tensión aérea (LMTA) a 20 kV con condutor tipo LA-110 de 117 metros de lonxitude, con orixe no apoio proxectado C-2000/14 e final no apoio proxectado C-2000/12. As instalacións están situadas na Casa da Cruz, na parroquia de Arcos, no concello de Cuntis (Pontevedra).

Conforme con todo o indicado,

RESOLVO:

Primeiro. Outorgar á empresa UFD Distribución Electricidad, S.A. as autorizacións administrativas previa e de construción da instalación de distribución de enerxía eléctrica denominada substitución dos apoios A8UMXPD7//21, A8SD5NWO//22 e cambio de cruceta no apoio A8XC9PPI//20 na LMT LES809 (expediente IN407A 2022/274-4), cuxas características se axustarán en todas as súas partes ás que figuran no proxecto de execución, ás condicións técnicas e de seguridade establecidas nos regulamentos de aplicación e ás condicións establecidas nos condicionados dos organismos que constan no expediente.

Segundo. Declarar a utilidade pública, en concreto, da citada instalación eléctrica, o que leva implícito a necesidade de ocupación dos bens ou de adquisición dos dereitos afectados e implica a urxente ocupación para os efectos do artigo 52 da Lei de expropiación forzosa.

A empresa UFD Distribución Electricidad, S.A. asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade. En todo momento deberanse cumprir as normas e directrices vixentes que resulten de aplicación, en particular, canto establece o Real decreto 223/2008, do 15 de febreiro, polo que se aproba o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09 e o Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.

Contra a presente resolución, que non é definitiva en vía administrativa, poderase interpoñer recurso de alzada ante o vicepresidente primeiro e conselleiro de Economía, Industria e Innovación da Xunta de Galicia, no prazo dun mes contado a partir do día seguinte ao da súa notificación ou publicación, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Pontevedra, 1 de decembro de 2022

Tomás Nogueiras Nieto
Xefe territorial de Pontevedra