De conformidade co disposto nos artigos 44 e 46 da Lei 39/2015, do 2 de outubro, do procedemento administrativo común das administracións públicas, notifícaselle a Segismundo Rial Ferradas, mediante a publicación no Boletín Oficial del Estado, apercibimento previo á execución forzosa da retirada da embarcación Faneca Brava da praza de amarre número P3/11A do pantalán recreativo do porto de Bueu, por non ser posible a notificación no domicilio.
Así mesmo, este anuncio publicarase no Diario Oficial de Galicia, ben que a eficacia do acto notificado quedará supeditada á súa publicación no Boletín Oficial del Estado.
A medida de reposición da legalidade coa retirada da embarcación acordouse en virtude de resolución firme na vía administrativa emitida pola Dirección de Portos de Galicia o 20 de xaneiro de 2022, ao abeiro do establecido no artigo 142 da Lei 6/2017, do 12 de decembro, de Portos de Galicia, resolución que foi publicada no Boletín Oficial del Estado número 54, do 4 de marzo de 2022.
Publícase polo exposto o presente apercibimento ao propietario da embarcación, a quen se lle fai saber que Portos de Galicia vai iniciar nas vindeiras datas as actuacións necesarias para retirar de modo forzoso e ao seu cargo a embarcación do amarre que ocupa sen autorización.
Chegado o momento da retirada forzosa, Portos de Galicia non se responsabilizará dos danos que poida sufrir a embarcación durante a retirada e traslado nin dos deméritos que sufra mentres permaneza depositada e ata que sexa retirada novamente.
O lugar onde quedará depositada ou amarrada a embarcación seralle oportunamente notificado.
Mentres non se leve a cabo a retirada forzosa por parte de Portos de Galicia, poderá o propietario facerse cargo dela e realizar a retirada da praza de amarre que ocupa sen autorización.
O presente acto administrativo constitúe un acto de execución derivado dunha resolución firme para todos os efectos contra a cal non cabe a interposición de recurso.
Santiago de Compostela, 17 de outubro de 2022
Roi Fernández Añón
Director xeral de Portos de Galicia