Logo da aprobación do texto inicial e unha vez finalizado o trámite de información pública (DOG núm. 21, do 2 de febreiro de 2021), na sesión ordinaria do 21 de maio de 2021, a Corporación municipal en Pleno acordou ratificar o texto definitivo do convenio urbanístico de planeamento e para a súa execución, referido ao sector de solo urbanizable SU-8.
En cumprimento do punto terceiro do acordo plenario procédese á publicación do texto íntegro do convenio.
Sanxenxo, 15 de xuño de 2021
Telmo Martín González
Alcalde presidente
ANEXO
Texto definitivo de convenio urbanístico de planeamiento e para a súa execución, referido ao sector de solo urbanizable SU-8 do Plan xeral de ordenación
municipal de Sanxenxo (Pontevedra)
Sanxenxo, 3 de xuño de 2021
REUNIDOS:
Telmo Martín González, con DNI * e domicilio para os efectos de notificacións na rúa de Madrid, nº 1, CP 36960, de Sanxenxo, Pontevedra.
Verónica Cernadas Capelán, con DNI * e domicilio para os efectos de notificacións na praza Mestre Mateo, 5, 3º B, CP 15004, da Coruña.
INTERVEÑEN:
Telmo Martín González, na súa condición de alcalde presidente do Concello de Sanxenxo e na súa representación.
Verónica Cernadas Capelán, en nome e representación da Xunta de Compensación do Sector de Solo Urbanizable SU-8 do Plan xeral de ordenación municipal de Sanxenxo (no sucesivo, e de forma indistinta, Xunta de Compensación ou a Propiedade). Está especialmente facultada para este acto en virtude de acordo adoptado pola asemblea xeral da Xunta de Compensación de data 20 de outubro de 2020. Acompáñase como anexo I certificación do Acordo da Asemblea Xeral de data 20 de outubro de 2020 en virtude do cal se aproba o presente convenio e se faculta ao seu presidente para a súa formalización.
Tendo e recoñecéndose, segundo concorren, a capacidade legal necesaria para contratar e obrigarse, formalizan o presente convenio urbanístico, a cuxo fin,
Expoñen:
I. O Plan xeral de ordenación municipal (en diante, PXOM) de Sanxenxo foi aprobado definitivamente polo Pleno municipal na sesión celebrada o día 27 de febreiro de 2003.
Nel delimitáronse trinta sectores de solo urbanizable delimitado, indicando as características, parámetros urbanísticos e condicións de desenvolvemento de cada un deles.
II. Na actualidade, catro sectores de solo urbanizable (o SU-3, o SU-7, o SU-15 e o SU-28) concluíron o seu desenvolvemento urbanístico, tendo alcanzado a condición de solo urbano consolidado e sendo recibidas as obras de urbanización dos respectivos ámbitos.
Outros sectores atópanse nun avanzado estado de execución das súas obras de urbanización, entre eles o sector SU-8.
III. Non obstante, desde a aprobación do vixente PXOM de Sanxenxo (ano 2003), a normativa urbanística aplicable sufriu non poucas alteracións, dando como resultado que o vixente Plan xeral de Sanxenxo non se atopa actualmente adaptado a ela.
Un dos documentos normativos que tivo maior repercusión sobre o PXOM de Sanxenxo foi o Plan de ordenación del litoral (en diante, POL), aprobado en virtude do Decreto 20/2011, do 10 de febreiro, da Consellería de Medio Ambiente, Territorio e Infraestruturas da Xunta de Galicia, publicado no Diario Oficial de Galicia do 23 de febreiro de 2011.
IV. O Concello de Sanxenxo iniciou os trámites para a modificación do PXOM, que se tramita como a modificación puntual nº 9 (no sucesivo, modificación puntual nº 9 PXOM), co obxectivo, tal como indica o documento de borrador de modificación puntual sometido a avaliación ambiental estratéxica, de «adaptar os solos urbanizables incluídos dentro da área de mellora ambiental e paisaxística do POL aos seus criterios e aos establecidos na presente modificación puntual.
Estas modificacións irán dirixidas a rebaixar a densidade e a aumentar a compacidade de as ordenacións, liberar solo, ben como espazo público ou privado, e adaptar as construcións e urbanización ao relevo coa finalidade de preservar a paisaxe litoral e mellorar a imaxe de bordo costeiro».
V. O POL, ao regular o seu ámbito de aplicación, dispón –artigo 3.2– que non será de aplicación a aqueles solos «que á entrada en vigor deste Plan finalizaran a tramitación do instrumento de xestión». Engade o mesmo precepto no seu punto 3 que «non obstante, en virtude de expedientes de primeira formulación, modificación ou revisión do planeamento urbanístico, si será aplicable aos solos que este clasifique de núcleo rural e que se atopen incluídos nas áreas de recualificación identificadas no POL, así como naquelas que, de ser o caso, determine o planeamento urbanístico».
O proxecto de compensación do SU-8 foi aprobado definitivamente antes da entrada en vigor do POL, polo que, de acordo coas previsións sinaladas, o SU-8 quedou excluído do seu ámbito de aplicación. De conformidade cos informes emitidos polo organismo competente na materia durante a tramitación ambiental da modificación puntual nº 9 do PXOM, serán aplicables aqueles criterios de ordenación do POL que resulten viables en función do grao de execución e desenvolvemento de cada ámbito e na medida e co alcance con que o dispoña a modificación puntual nº 9 en tramitación.
En consecuencia, a adaptación do SU-8 ao POL debe ser coherente co grao de execución alcanzado, tendo en consideración que, como se sinalou, é o de realización de gran parte das obras de urbanización, o que significa que se trata dun ámbito próximo a obter a condición de solo urbano consolidado.
VI. En coherencia con este marco legal, o documento de avance da modificación puntual xa dispón que «dado o proceso de transformación ao que está sendo sometido xa nestes momentos a zona de mellora ambiental e paisaxística do POL, enténdese que a mellor maneira de acadar os obxectivos fixados é mediante acordos cos propietarios que xa iniciaron o desenvolvementos dos solos, de xeito que os documentos aprobados se modifiquen e se adapten ás novas condicións aquí plasmadas».
O documento de modificación puntual precisa o grao de definición dos seus propios obxectivos e determinacións para poder facilitar estes acordos cos propietarios dos solos en execución. E faino nos seguintes termos: «De cara a poder chegar a acordos cos xestores do solo que nestes momentos iniciaron xa o proceso de transformación, as condicións de desenvolvemento impostas no presente documento de avance non pretenden ser pechadas sobre todo no que se refire á diminución da densidade, fixando intervalos de movemento desta variable, de cara a poder axustar o número definitivo no momento en que se acorde unha ordenación pormenorizada para cada ámbito que, independentemente do número de vivendas, cumpra cos criterios de mellor integración paisaxística e menor impacto ambiental, dentro do lóxico equilibrio de ingresos e custos».
VII. O sector de solo urbanizable nº 8 é un ámbito especialmente complexo por mor da súa situación e orografía, estando executadas na súa meirande parte as obras de urbanización, circunstancias que condicionan as posibilidades de modificación da súa ordenación urbanística.
Así mesmo, no desenvolvemento do ámbito sucedéronse unha serie de actuacións que deben terse en consideración na modificación da ordenación vixente:
• Mediante Convenio asinado o día 29 de setembro de 2006 entre o Concello de Sanxenxo e a Xunta de Compensación do SU-8 procedeuse á monetarización do 10 % do aproveitamento tipo da área de repartición, entregándolle ao Concello de Sanxenxo o importe de 3.248.765 euros, IVE excluído.
• Mediante Resolución do 28 de febreiro de 2007 aprobouse o Proxecto de Compensación do ámbito, que supuxo a transmisión ao Concello de Sanxenxo, en pleno dominio e libre de cargas, dos terreos de cesión obrigatoria para a súa incorporación ao patrimonio do solo e a súa afectación aos usos previstos no planeamento.
Ao abeiro do disposto no artigo 118.2 da Lei 9/2002, do 30 de decembro, de ordenación urbanística e protección do medio rural de Galicia (LOUGA), o Concello de Sanxenxo procedeu, coa colaboración da Propiedade, á ocupación da parcela destinada a equipamento comunitario, en que promoveu a construción da Casa da Cultura de Dorrón, actualmente en funcionamento.
• Mediante Resolución do 13 de xullo de 2009 outorgóuselles ás xuntas de compensación do SU-1 e do SU-8 do PXOM de Sanxenxo licenza para a execución dunha nova rotonda na estrada PO-308, no p.q. 12+600, presentando con carácter previo ao inicio das obras sendos avais polo importe conxunto de 7.575,45 euros.
Malia que non se recibiron formalmente as obras realizadas pese á solicitude formulada pola Xunta de Compensación do SU-8 o día 13 de xuño de 2018, o certo e verdade é que a rotonda atópase executada e aberta ao uso público, e é do interese de ambas as partes asinantes o recoñecemento da dita realidade e a devolución dos avais depositados en garantía das obras de urbanización da rotonda existente no p.q. 12+630 da PO-308.
• As obras de urbanización do ámbito están executadas nunha alta porcentaxe, e é de interese de ambas as partes proceder á recepción parcial das obras de urbanización do ámbito en particular no relativo á vía común de acceso aos sectores de solo urbanizable nº 1 e 8 do PXOM.
IX. O documento de avance ou borrador da modificación puntual nº 9 do PXOM recollía a integración das novas ordenacións, detalladas ou non, na modificación en tramitación.
Non obstante, por razóns de operatividade e axilidade, outorgóuselles a todos os propietarios dos sectores que quedaron fóra do ámbito de aplicación do POL a posibilidade de articular, de mutuo acordo, a adaptación aos criterios do instrumento de ordenación territorial que en cada caso resultasen viables mediante a modificación puntual dos respectivos instrumentos de planeamento de desenvolvemento e de xestión, sen necesidade de modificar o planeamento xeral.
Neste contexto, ao abeiro da competencia municipal en materia de planificación e xestión urbanística contemplada no artigo 25.2.a) da Lei 7/1985, do 2 de abril, reguladora das bases do réxime local e de conformidade co disposto nos artigos 165, 166 e 167 da LSG, e dadas as particularidades que presenta o sector de solo urbanizable SU-8 do PXOM de Sanxenxo, o Concello de Sanxenxo e a Xunta de Compensación consideran conveniente a sinatura do presente convenio urbanístico, que facilitará o desenvolvemento urbanístico do sector e, ao propio tempo, a consecución dos obxectivos da modificación puntual nº 9 do PXOM.
Con base no anterior, as partes que subscriben este documento celebran o presente convenio urbanístico, conforme as seguintes
ESTIPULACIÓNS:
Primeira. Obxecto do presente documento
O presente convenio ten por obxecto:
i. Establecer as bases da modificación da ordenación detallada do SU-8, prevista no plan parcial do sector actualmente en vigor, coa finalidade de adaptala aos criterios do POL que resulten viables. Todo iso tendo en consideración o avanzado grao de desenvolvemento e execución alcanzado no ámbito.
ii. Regular a incorporación da nova ordenación detallada do SU-8 ao planeamento municipal mediante a tramitación da modificación del plan parcial en vigor, de modo tal que permita avaliar a súa compatibilidade e coherencia cos criterios de ordenación da modificación puntual do PXOM en tramitación.
iii. Regular a terminación das obras de urbanización pendentes de execución, tanto as interiores ao polígono como a conexión exterior do ámbito cos sistemas xerais de abastecemento de auga potable e saneamento, que permitirán a recepción das obras de urbanización e que o solo do sector SU-8 alcance a condición de solo urbano consolidado.
iv. Regular o réxime de conservación das obras de urbanización.
v. Garantir a viabilidade técnica e económica da actuación, establecendo o adecuado equilibrio entre os beneficios e as cargas derivadas da actuación.
vi. Concretar as obrigas que asumen as partes asinantes no marco da modificación puntual nº 9 do PXOM de Sanxenxo e no seu desenvolvemento no que afecta ao sector de solo urbanizable SU-8, de modo que coa formalización deste convenio, o desenvolvemento do sector SU-8 continúe de xeito paralelo e non se vexa interrompido pola tramitación da modificación puntual nº 9 PXOM.
Segunda. Proposta de modificación do Plan parcial do sector SU-8 para a súa adaptación a criterios do POL
i. As alteracións que se incorporarán na ordenación urbanística en vigor do sector SU-8 son as reflectidas na ficha que se xunta como anexo II, na que se establecen as determinacións de aplicación a este sector.
Son obxecto de modificación, entre outros parámetros, os seguintes:
|
Parámetros |
Plan parcial en vigor |
Modificación puntual do Plan parcial |
|
Edificabilidade |
0,55 m2/m2 |
0,35 m2/m2 |
|
Densidade de vivendas |
50 viv/ha |
32 viv/ha |
|
Nº máximo de vivendas |
394 |
253 |
En todo o demais, manterase a ordenación urbanística do plan parcial en vigor e as obras de urbanización xa executadas, salvo aquelas que teñan que ser modificadas para adaptarse á modificación do plan parcial e do proxecto de urbanización que, para tal efecto, se tramiten.
ii. Estas novas condicións de desenvolvemento do sector SU-8 materializaranse na ordenación detallada do sector mediante a modificación puntual do plan parcial en vigor, que se tramitará de conformidade co establecido no artigo 185 e seguintes do Regulamento da Lei do solo de Galicia.
Acompáñase como anexo III o esquema orientativo da ordenación para incluír na modificación puntual do plan parcial, en que se materializan os novos criterios de desenvolvemento do sector, tendo en conta o grao de execución alcanzado e os antecedentes deste ámbito de actuación, e coa que se considera que se cumpren no sector SU-8 os obxectivos de mellor integración paisaxística e menor impacto ambiental, dentro do necesario equilibrio de beneficios e cargas.
Esta proposta ten o carácter dun esquema de ordenación que na modificación puntual do plan parcial deberá ser obxecto de desenvolvemento consonte os parámetros e criterios da modificación puntual do PXOM en tramitación e ás consideracións que resulten do trámite de avaliación ambiental estratéxica, respectando o espírito do presente convenio e os parámetros xerais acordados nel.
Terceira. A xestión do sector SU-8 a partir da formalización do presente convenio
A partir da formalización do presente convenio, o desenvolvemento do sector SU-8 continuará de acordo coas previsións que se indican a continuación:
i. A Propiedade executará, ata a súa finalización, as obras de urbanización interior do polígono previstas no proxecto de urbanización actualmente vixente coas modificacións derivadas, de ser o caso, do plan parcial e do proxecto de urbanización modificados.
Así mesmo, executará ao seu cargo as actuacións necesarias para conectar os servizos de abastecemento de auga potable e saneamento do sector ás redes públicas de ambos os servizos que transcorren pola estrada PO-308, coas seguintes particularidades:
• Respecto do sistema de abastecemento, a Propiedade asume a obriga de executar e/ou custear, na parte que lle corresponda en función da porcentaxe da edificabilidade de cada sector (SU-1 e SU-8), unha tubaxe de abastecemento de auga desde o depósito de Dorrón ata o límite do sector, de características e en condicións adecuadas para o abastecemento de auga potable aos dous ámbitos de actuación (SU-1 e SU-8).
Se, posteriormente, en execución das previsións da modificación puntual nº 9 do PXOM en tramitación, for preciso reforzar os sistemas exteriores, a Propiedade asume a obriga de executar e/ou custear as ditas obras, na parte que lle corresponda en función da edificabilidade do ámbito.
• Respecto do sistema de saneamento, se, posteriormente, en execución das previsións da modificación puntual nº 9 do PXOM en tramitación, for preciso reforzar os sistemas exteriores de saneamento ou facer unha nova depuradora para servir os solos incluídos neste sector SU-8 e nos lindeiros (SU-1 e SU-9), a Propiedade asume a obriga de executar e/ou custear as ditas obras, na parte que lle corresponda en función da porcentaxe da edificabilidade dos tres sectores cun máximo de 300 €/habitante equivalente e considerando 3 habitantes por vivenda.
Ambas as obrigas de reforzo exterior das infraestruturas de abastecemento e saneamento se manterán durante o prazo de dez (10) anos contados desde a aprobación definitiva da modificación puntual nº 9 do PXOM, aprobación que deberá ter lugar, como máis tarde, o 12 de setembro de 2022 (data de caducidade do informe ambiental).
Se a modificación puntual nº 9 do PXOM non acada a aprobación definitiva ou, unha vez aprobada, remata o prazo de dez (10) anos sen que o Concello de Sanxenxo executase as infraestruturas de ampliación ou reforzo exterior da rede de abastecemento e/ou saneamento, o promotor e os propietarios do SU-8 quedarán exonerados do cumprimento da dita obriga.
Se para a execución das conexións ás redes xerais dos servizos de abastecemento e saneamento na forma sinalada nos puntos anteriores, se precisa a ocupación dalgún terreo exterior ao ámbito, o concello tramitará algún dos procedementos legalmente establecidos para a súa obtención, incluso a súa expropiación forzosa, asumindo a Xunta de Compensación a obriga de pagamento de todos os custos que supoña a obtención dos terreos na porcentaxe que lle corresponda en relación co resto dos sectores afectados polas ditas obras.
O documento do plan parcial modificado deberá determinar as infraestruturas de conexión cos sistemas xerais existentes así como as obras necesarias para a ampliación e reforzo cos citados sistemas, de forma que asegure o correcto funcionamento do SU-8 tendo en conta as características do sector, de conformidade cos requisitos e condicións que estableza a modificación puntual nº 9 do PXOM en tramitación.
ii. Executadas as obras de urbanización previstas no punto anterior, o concello procederá á súa recepción, incorporándoas ao dominio público municipal e pasando a ter o solo do sector SU-8, a partir dese momento, a natureza de solo urbano consolidado.
A conservación das obras de urbanización recibidas corresponde ao Concello de Sanxenxo.
iii. A Propiedade presentará, nun prazo máximo de 45 días desde a subscrición deste convenio, o borrador de modificación puntual do Plan parcial SU-8 vixente, de acordo coas determinacións establecidas na ficha do sector (anexo II) e coa proposta alternativa da modificación da ordenación do plan parcial (anexo III) que se acompañan a este convenio.
Simultaneamente, a Propiedade poderá presentar, para a súa tramitación conxunta, a proposta de modificación do instrumento de xestión e do proxecto de urbanización, coa finalidade de adaptalos á modificación do plan parcial, segundo establece o artigos 95.1 da LSG e 221.1 do RGLS.
iv. O Concello de Sanxenxo recoñece que a rotonda sita no p.q. 12+600 da PO-308 está aberta ao uso e servizo público e, por conseguinte, pode considerarse que as obras foron tacitamente recibidas, procedendo neste acto á devolución das fianzas depositadas en garantía da execución das obras da rotonda.
v. As partes comprométense a solicitar e recibir no prazo máximo de 2 meses desde a subscrición do texto definitivo do presente convenio, as obras de urbanización correspondentes á vía común de acceso ao SU-1 e o SU-8, sempre que fosen executadas de conformidade cos instrumentos de planeamento aprobados ou, de ser o caso, ao abeiro das modificacións que, para o efecto, se aproben.
vi. A Propiedade poderá solicitar licenzas de edificación naquelas zonas ou parcelas do sector nas que sexan coincidentes as determinacións do plan parcial actualmente en vigor e as determinacións da modificación puntual do mesmo. Para poder apreciar esta coincidencia, estas licenzas outorgaranse a partir da aprobación inicial da modificación puntual do plan parcial.
Cuarta. Obrigas asumidas pola Xunta de Compensación do sector de solo urbanizable SU-8
As obrigas que coa sinatura do presente convenio urbanístico asumen os propietarios asinantes do sector SU-8 recondúcense ás seguintes:
1ª. A Xunta de Compensación do sector SU-8 asume os obxectivos xerais pretendidos pola modificación puntual nº 9 do PXOM de Sanxenxo; isto é, «rebaixar a densidade, aumentar a compacidade das ordenacións, liberar solo, ben como espazo público ou privado, e adaptar as construcións e urbanización ao relevo coa finalidade de preservar a paisaxe litoral e mellorar a imaxe do bordo costeiro», nos termos e co alcance que resultan da ficha do sector que se adxunta como anexo II e da proposta de ordenación que se xunta como anexo III.
2ª. Nun prazo non superior a 45 días contados desde a formalización deste convenio, a Xunta de Compensación do sector SU-8 presentará no rexistro municipal do concello un borrador de modificación del plan parcial do sector, que sexa acorde coas determinacións contidas na documentación anexa II e III.
3ª. No referente ao sistema e dotacións de abastecemento deste sector SU-8, a Propiedade asume a obriga de executar e/ou custear, na parte que lle corresponda en función da porcentaxe da edificabilidade de cada sector (SU-1 e SU-8), unha tubaxe de abastecemento de auga desde o depósito de Dorrón ata o límite do sector, de características e en condicións adecuadas para o abastecemento de auga potable aos dous ámbitos de actuación (SU-1 e SU-8).
Se, posteriormente, en execución das previsións da modificación puntual nº 9 do PXOM en tramitación, for preciso reforzar os sistemas exteriores, a Propiedade asume, durante o prazo de dez (10) anos contados desde a aprobación definitiva da modificación puntual nº 9 do PXOM, a obriga de executar e/ou custear as ditas obras, na parte que lle corresponda en función da edificabilidade do ámbito.
Con carácter previo á aprobación definitiva da modificación do proxecto de equidistribución, a Xunta de Compensación achegará a correspondente garantía do cumprimento da dita obriga, ben en forma de aval bancario –logo de determinación do importe da actuación– ben afectando parcelas de resultado con aproveitamento lucrativo privado ao cumprimento da dita obriga, afección real que será obxecto de inscrición no Rexistro da Propiedade.
Esta obriga manterase durante o prazo de dez (10) anos contados desde a aprobación definitiva da modificación puntual nº 9 do PXOM, aprobación que deberá ter lugar, como máis tarde, o 12 de setembro de 2022 (data de caducidade do informe ambiental).
Se a modificación puntual nº 9 do PXOM non acada a aprobación definitiva ou, unha vez aprobada, remata o prazo de dez (10) anos sen que o Concello de Sanxenxo execute as infraestruturas de ampliación ou reforzo exterior da rede de abastecemento, o promotor e os propietarios do SU-8 quedarán exonerados do cumprimento da dita obriga e procederase á cancelación das garantías constituídas.
4ª. No referente ao sistema e dotacións de saneamento deste sector SU-8, preverase a súa conexión co sistema xeral de saneamento que discorre ao longo da estrada PO-308.
Se, posteriormente, en execución das previsións da modificación puntual nº 9 do PXOM en tramitación, for preciso reforzar os sistemas exteriores de saneamento ou facer unha nova depuradora para servir os solos incluídos neste sector SU-8 e nos sectores lindeiros (SU-1 e SU-9), a Propiedade asume a obriga de executar e/ou custear as ditas obras na parte que proporcionalmente lle corresponda, cun máximo de 300 €/habitante equivalente, considerando 3 habitantes por vivenda.
Con carácter previo á aprobación definitiva da modificación do proxecto de equidistribución, a Xunta de Compensación achegará a correspondente garantía do cumprimento da dita obriga, ben en forma de aval bancario –logo de determinación do importe da actuación– ben afectando parcelas de resultado con aproveitamento lucrativo privado ao cumprimento da dita obriga, afección real que será obxecto de inscrición no Rexistro da Propiedade.
Esta obriga manterase durante o prazo de dez (10) anos contados desde a aprobación definitiva da modificación puntual nº 9 do PXOM, aprobación que deberá ter lugar, como máis tarde, o 12 de setembro de 2022 (data de caducidade do informe ambiental).
Se a modificación puntual nº 9 do PXOM non acada a aprobación definitiva ou, unha vez aprobada, remata o prazo de dez (10) anos sen que o Concello de Sanxenxo execute as infraestruturas de ampliación ou reforzo exterior da rede de saneamento, o promotor e os propietarios do SU-8 quedarán exonerados do cumprimento da dita obriga e procederase á cancelación das garantías constituídas.
5ª. No prazo máximo dun (1) mes contado desde a sinatura do texto definitivo do convenio, a Xunta de Compensación do SU-8 solicitará formalmente ao Concello de Sanxenxo, xunto coa Xunta de Compensación do SU-1, a recepción parcial das obras de urbanización no particular relativo á vía común de acceso a ambos os sectores, e achegará, para tal efecto, a documentación completa e necesaria.
No caso de que as obras executadas non sexan conformes cos proxectos de urbanización aprobados, a Xunta de Compensación deberá presentar, no devandito prazo, a documentación técnica precisa para a recepción das obras de urbanización da vía.
Se, finalmente, a dita obriga non pode ser cumprida pola Propiedade por causas a ela non imputables, debidamente xustificadas, o Concello de Sanxenxo poderá proceder á ocupación e recepción anticipada da dita infraestrutura, logo de tramitación do procedemento legalmente establecido.
6ª. A Xunta de Compensación do sector SU-8 obrígase, así mesmo, a redactar, impulsar e tramitar pola súa conta a modificación que sexa preciso realizar do proxecto de equidistribución e do proxecto de urbanización do polígono único do ámbito, como consecuencia da aprobación da modificación puntual do plan parcial a que se refire o presente convenio. A dita modificación, conforme o indicado anteriormente, poderá tramitarse de forma conxunta coa modificación puntual do plan parcial.
7ª. A Xunta de Compensación do sector SU-8 –e, en coherencia co acordo adoptado, os propietarios que votaron a favor da sinatura do presente convenio–, renuncian ao exercicio de calquera reclamación de responsabilidade patrimonial contra o Concello de Sanxenxo en relación co acordo de suspensión de licenzas adoptado o 27 de setembro de 2017 ou calquera outro relacionado cos acordos adoptados no presente convenio.
A renuncia prevista no punto anterior quedará sen efecto no caso de que, por calquera causa, o presente convenio non chegase a entrar en vigor ou no suposto de que o Concello de Sanxenxo incumprise as obrigas asumidas na cláusula seguinte.
O incumprimento por parte da Xunta de Compensación do SU-8 das obrigas asumidas no presente convenio motivará a modificación das condicións de ordenación do ámbito na modificación puntual nº 9 do PXOM en tramitación ou a través doutra figura de planeamento, sen que a Xunta de Compensación poida reclamar responsabilidade ningunha pola inclusión do ámbito na modificación puntual nº 9 do PXOM nas condicións que nela se determinen.
Quinta. Obrigas asumidas polo Concello de Sanxenxo
Coa sinatura do presente convenio o Concello de Sanxenxo asume as seguintes obrigacións:
1ª. Recibir de forma expresa as obras de urbanización deste sector SU-8, unha vez executadas na súa integridade e sendo acordes coas previsión contidas no proxecto de urbanización no seu día aprobado ou, de ser o caso, na súa modificación, e se conclúa a súa execución do modo establecido na estipulación terceira. Sen prexuízo das adaptacións exixidas pola execución material das obras permitida no artigo 96.2 da Lei do solo de Galicia.
2ª. Recibir de forma expresa as obras de urbanización parcial do sector SU-8, relativas á vía común de acceso aos sectores de solo urbanizable SU-1 e SU-8.
A dita recepción deberá verificarse no prazo máximo dun (1) mes desde a solicitude presentada no rexistro do Concello de Sanxenxo polas xuntas de compensación do SU-1 e do SU-8, acompañada da documentación completa e necesaria, e sempre que as obras executadas sexan conformes cos proxectos de urbanización aprobados. En caso contrario, deberá tramitarse previamente a documentación técnica precisa, iniciándose o cómputo do prazo dun (1) mes para a recepción das obras de urbanización da vía desde a aprobación definitiva de dita modificación.
No caso de non verificarse o cumprimento da dita obriga por parte das xuntas de compensación, o Concello de Sanxenxo poderá proceder á ocupación e recepción anticipada da dita infraestrutura, logo de tramitación do procedemento legalmente establecido.
3ª. Devolver no presente acto á Xunta de Compensación do SU-8 o aval depositado en garantía das obras de urbanización da rotonda no p.q. 12+600 da PO-308, consonte os informes técnicos emitidos polos servizos municipais e a fiscalización favorable do órgano de Intervención municipal.
4ª. Tramitar coa maior celeridade posible a modificación do plan parcial do sector SU-8, cuxa proposta deberá ser presentada polos propietarios nos termos expostos na estipulación segunda do presente convenio.
5ª. Coa sinatura do presente convenio e unha vez aprobada definitivamente a modificación do plan parcial del sector SU-8, o Concello dá por cumpridos os criterios de desenvolvemento e os obxectivos pretendidos pola modificación puntual nº 9 do PXOM de Sanxenxo.
6ª. De conformidade co artigo 86.3.c) do Regulamento da Lei do solo de Galicia, o Concello de Sanxenxo asume de forma explícita a súa obriga de outorgar expresamente as licencias urbanísticas que autoricen os proxectos que cumpran simultaneamente o plan parcial actualmente en vigor e a modificación puntual do plan parcial logo da aprobación inicial deste.
Sexta. Tramitación e perfeccionamento do convenio
De conformidade co disposto nos artigos 168 da Lei do solo de Galicia e 401 do seu Regulamento de desenvolvemento, unha vez finalizado o trámite de exposición pública do presente convenio, no caso de que por razón das alegacións presentadas se deban introducir cambios, o Concello de Sanxenxo notificaralles ás partes a proposta do seu texto definitivo, concedéndolles un prazo de dez (10) días hábiles para manifestar a súa conformidade, reparos ou, de ser o caso, renuncia a el, trámite este ao que as partes renuncian para o suposto de que o dito texto fose idéntico ao plasmado no presente documento.
Unha vez aprobado definitivamente o convenio polo órgano municipal competente, deberá ser asinado no prazo máximo de quince (15) días contados desde a notificación do acordo ou resolución correspondente (artigos 168.4 da Lei de Solo de Galicia e 402 do seu Regulamento de desenvolvemento).
Sétima. Documentación que conforma o convenio
Forma parte deste convenio e, polo tanto, do réxime de reciprocidade obrigacional convido polas partes, a proposta de ficha do sector e a proposta de modificación da ordenación detallada do plan parcial que se incorporan a este convenio como anexos I, II, III, e que se integran polos seguintes documentos:
1. Anexo I: certificación do Acordo da Asemblea Xeral do 20 de outubro de 2020.
2. Anexo II: ficha de determinación del Sector nº 8 de solo urbanizable.
3. Anexo III: plano da alternativa proposta.
Oitava. Natureza xurídica e xurisdición competente
O presente documento ten a natureza xurídica de convenio urbanístico de planeamento e de convenio urbanístico para a execución do dito planeamento, nos termos previstos polos artigos 165 e seguintes da LSG e 398 e seguintes do seu Regulamento de desenvolvemento, así mesmo, o contido no artigo 49 da Lei 40/2017, do 1 de outubro, de réxime xurídico do sector público.
As previsións establecidas no presente convenio non limitan nin condicionan a potestade municipal de planeamento.
As cuestións relativas á súa celebración, cumprimento, interpretación, efectos e extinción serán competencia da orde xurisdicional contencioso-administrativa.
E en proba de conformidade con todo o acordado, asinan o presente documento por duplicado exemplar no lugar e na data indicados no encabezamento, de todo o cal dou fe.
|
Polo Concello de Sanxenxo |
Pola Xunta de Compensación |
ANEXO I
Certificación do Acordo da Asemblea Xeral do 20 de outubro de 2020
O texto da certificación pode consultarse na sede electrónica do Concello de Sanxenxo (http://sede.sanxenxo.es) introducindo o seguinte CSV: YUT1WZN06UE0C6D4.
ANEXO II
Ficha das condicións urbanísticas a que debe adaptarse
o plan parcial do SU-8
Superficie bruta do sector: 119.050 m2s.
Superficie dotación existente e mantida: 4.369,81 m2s.
Superficie neta do sector: 78.920,00 m2s.
Coeficiente edificabilidade: 0,35 m2/m2.
Aproveitamento lucrativo máximo: 27.622 m2c.
Superficie solo rústico adscrito: 40.130,00 m2s.
(As superficies anteriores son provisionais, pendentes de confirmación na modificación do plan parcial).
Densidade de vivendas: a densidade de vivendas non poderá superar a cifra de 32 viv/ha.
Tipoloxía de edificación: establécese unha tipoloxía de edificación mixta formada por vivenda unifamiliar e vivenda colectiva, sen determinar unha porcentaxe de aproveitamento mínima para cada unha das tipoloxías edificatorias.
Porcentaxe VPO: 6,40 % ou, de ser superior, a porcentaxe determinada polo Instituto Galego da Vivenda e Solo para o Concello de Sanxenxo que resulte de aplicación no momento de aprobación definitiva da modificación do plan parcial ou, se este variase polo transcurso do tempo, o vixente no momento de aprobación definitiva da modificación do proxecto de equidistribución.
Altura máxima:
• Vivenda colectiva: PB + 2 + Áticos recuados.
• Vivenda tipo familiar: as derivadas das condicións de volume máximo (4 metros sobre a rasante teórica do terreo), salvo elementos lixeiros e accesos.
• Vivenda unifamiliar: PB + 1.
Estes criterios adaptaranse, no caso de resultar preciso, ás consideracións que resulten da fase de avaliación ambiental estratéxica polos organismos correspondentes.
Criterios de ordenación:
• Fomentarase a compactidade reducindo na medida do posible a ocupación de solo.
• Aumentarase a dotación de espazos libres tanto públicos como privados.
• Realizarase un estudo da paisaxe urbana para garantir a mellor ordenación posible das edificacións, procurando manter as maiores aperturas visuais posibles cara o mar, analizando a inserción topográfica de tal modo que se respecten as vistas desde a estrada PO-308, se evite a formación de pantallas edificatorias (intercalando, para tal efecto, espazos libres públicos ou privados) e se mitigue o impacto visual.
• Incorporaranse os criterios que resulten dos informes emitidos na fase de avaliación ambiental estratéxica polos organismos correspondentes.
Condicións específicas da edificación:
• Non se permite o aproveitamento baixo cuberta excepto nos casos de tipoloxía colectiva, en que se permitan áticos recuados a unha distancia mínima de 3 metros.
• As cubertas das edificacións serán planas, cun acabamento vexetal en, alomenos, o 60 % da súa superficie. Poderán rematarse cun peto para poder executar correctamente a impermeabilización, cunha altura máxima de 60 cm sobre a cara superior do forxado da cuberta.
• O 40 % da superficie da parcela non ocupada pola edificación na tipoloxía de vivenda plurifamiliar deberá estar axardinada.
• Na ordenanza RVU1 (edificación familiar de uso comunitario), a edificación non poderá superar a rasante da vía superior da parcela, de xeito que exista permeabilidade de vistas cara ao mar.
O bordo do escaleiramento da edificación deberá de resolverse con elementos perimetrais vexetais que minimicen a visibilidade da edificación desde o mar.
O 30 % do solo debe destinarse a espazo libre privado de carácter comunitario, xerándose espazos intersticiais libres entre edificacións a modo de corredores visuais entre a costa e o interior.
• As ordenanzas definirán unhas condicións de composición e acabamento das edificacións homoxéneas e congruentes, para que o conxunto da actuación presente unha lectura harmoniosa.
• Incorporaranse os criterios que resulten dos informes emitidos na fase de avaliación ambiental estratéxica polos organismos correspondentes.
ANEXO III
Proposta de ordenación (planos)
