Tras a aprobación do texto inicial, e unha vez finalizado o trámite de información pública (DOG núm. 44, do 5 de marzo de 2021), na sesión ordinaria do 21 de maio de 2021, a Corporación municipal en pleno acordou ratificar o texto definitivo do convenio urbanístico de planeamento e para a súa execución, referido ao sector de solo urbanizable SU-12.
En cumprimento do punto terceiro do acordo plenario, publícase o texto íntegro do convenio.
Sanxenxo, 15 de xuño de 2021
Telmo Martín González
Alcalde presidente
ANEXO
Texto definitivo do convenio urbanístico de planeamento e para a súa execución, referido ao sector de solo urbanizable SU-12 do Plan xeral de ordenación municipal de Sanxenxo (Pontevedra)
Sanxenxo, 4 de xuño de 2021
Reunidos:
Telmo Martín González, con DNI * e domicilio para efectos de notificacións na rúa Madrid, nº 1, 36960 Sanxenxo, Pontevedra.
Samuel Matarranz Costoso, con DNI * e domicilio para efectos de notificacións na rúa Anabel Segura, nº 11, Edificio D, Centro de Negocios Albatros, 28108 Alcobendas (Madrid).
Interveñen:
Telmo Martín González, na súa condición de alcalde do Concello de Sanxenxo e en representación del.
Samuel Matarranz Costoso, en nome e representación de Acciona Inmobiliaria, S.L.U., propietaria única dos terreos incluídos no SU-12 (no sucesivo, e de forma indistinta, Acciona, o Promotor ou a Propiedade). Está especialmente facultado para este acto en virtude de escritura de elevación a público de acordos dos administradores mancomunados sobre outorgamento de poderes xerais de Acciona Inmobiliaria, S.L.U., autorizada polo notario de Alcobendas Eduardo Martín Alcalde o día 2 de outubro de 2020, co número 2.163 do seu protocolo. Achégase como anexo I copia da citada escritura, da cal resultan as facultades para a sinatura deste convenio.
Tendo e recoñecéndose, segundo concorren, a capacidade legal necesaria para contratar e obrigarse, formalizan este convenio urbanístico, para cuxo fin
EXPOÑEN:
I. O Plan xeral de ordenación municipal (en diante, PXOM) de Sanxenxo foi aprobado definitivamente polo Pleno municipal na sesión que tivo lugar o día 27 de febreiro de 2003.
Nel delimitáronse trinta sectores de solo urbanizable delimitandose, e indicáronse as características, os parámetros urbanísticos e as condicións de desenvolvemento de cada un deles.
II. Na actualidade, catro sectores de solo urbanizable (o SU-3, o SU-7, o SU-15 e o SU-28) concluíron o seu desenvolvemento urbanístico, alcanzada a condición de solo urbano consolidado e recibidas as obras de urbanización dos respectivos ámbitos.
Outros sectores encóntranse nun avanzado estado de execución das súas obras de urbanización, entre eles o sector SU-12.
III. Non obstante, desde a aprobación do vixente PXOM de Sanxenxo (ano 2003), a normativa urbanística aplicable sufriu non poucas alteracións, dando como resultado que o vixente Plan xeral de Sanxenxo non se encontra actualmente adaptado a ela.
Un dos documentos normativos que tivo maior repercusión sobre o PXOM de Sanxenxo foi o Plan de ordenación do litoral (en diante, POL), aprobado en virtude do Decreto 20/2011, do 10 de febreiro, da Consellería de Medio Ambiente, Territorio e Infraestruturas da Xunta de Galicia, publicado no Diario Oficial de Galicia do 23 de febreiro.
IV. O Concello de Sanxenxo iniciou os trámites para a modificación do PXOM, que se tramita como a modificación puntual nº 9 (no sucesivo, modificación puntual nº 9 PXOM), co obxectivo, tal como indica o documento de borrador de modificación puntual sometido a avaliación ambiental estratéxica, de «adaptar os solos urbanizables incluídos dentro da área de mellora ambiental e paisaxística do POL aos seus criterios e aos establecidos nesta modificación puntual. Estas modificacións irán dirixidas a rebaixar a densidade, a aumentar a compacidade das ordenacións, liberar solo, como espazo público ou privado, e adaptar as construcións e urbanización ao relevo coa finalidade de preservar a paisaxe litoral e mellorar a imaxe de bordo costeiro».
V. O POL, ao regular o seu ámbito de aplicación, dispón –artigo 3.2– que non será de aplicación a aqueles solos «que no momento da entrada en vigor deste plan finalizasen a tramitación do instrumento de xestión». Engade o mesmo precepto, no seu número 3 que «non obstante, en virtude de expedientes de primeira formulación, modificación ou revisión do planeamento urbanístico, si será aplicable aos solos que este clasifique de núcleo rural e que se encontren incluídos nas áreas de recualificación identificadas no POL, así como naquelas que, de ser o caso, determine o planeamento urbanístico».
O proxecto de compensación do SU-12 foi aprobado definitivamente antes da entrada en vigor do POL, polo que, de acordo coas previsións sinaladas, o SU-12 quedou excluído do seu ámbito de aplicación. De conformidade cos informes emitidos polo organismo competente na materia durante a tramitación ambiental da modificación puntual nº 9 do PXOM, serán aplicables aqueles criterios de ordenación do POL que resulten viables en función do grao de execución e desenvolvemento de cada ámbito e na medida e co alcance con que o dispoña a modificación puntual nº 9 en tramitación.
En consecuencia, a adaptación do SU-12 ao POL debe ser coherente co grao de execución acadado, tendo en consideración que, como se sinalou, é o de realización de gran parte das obras de urbanización, o que significa que se trata dun ámbito próximo a obter a condición de solo urbano consolidado.
VI. En coherencia con este marco legal, o documento de avance da modificación puntual xa dispón que «dado o proceso de transformación a que está sendo sometido xa nestes momentos a zona de mellora ambiental e paisaxística do POL, enténdese que a mellor maneira de acadar os obxectivos fixados é mediante acordos cos propietarios que xa iniciaron o desenvolvementos dos solos, de xeito que os documentos aprobados se modifiquen e se adapten ás novas condicións aquí plasmadas».
O documento de modificación puntual precisa o grao de definición dos seus propios obxectivos e determinacións para poder facilitar estes acordos cos propietarios dos solos en execución. E faino nos seguintes termos: «De cara a poder chegar a acordos cos xestores do solo que nestes momentos iniciaron xa o proceso de transformación, as condicións de desenvolvemento impostas neste documento de avance non pretenden ser pechadas sobre todo no que se refire á diminución da densidade, fixando intervalos de movemento desta variable, de cara a poder axustar o número definitivo no momento en que se acorde unha ordenación pormenorizada para cada ámbito que, independentemente do número de vivendas, cumpra cos criterios de mellor integración paisaxística e menor impacto ambiental, dentro do lóxico equilibrio de ingresos e custos».
VII. O documento de avance ou borrador da modificación puntual nº 9 do PXOM prevía a integración das novas ordenacións, detalladas ou non, na modificación en tramitación.
Non obstante, por razóns de operatividade e axilidade, outorgóuselles a todos os propietarios dos sectores que quedaron fóra do ámbito de aplicación do POL a posibilidade de articular, de mutuo acordo, a adaptación aos criterios do instrumento de ordenación territorial que en cada caso resultasen viables mediante a modificación puntual dos respectivos instrumentos de planeamento de desenvolvemento e de xestión, sen necesidade de modificar o planeamento xeral.
Neste contexto, ao abeiro da competencia municipal en materia de planificación e xestión urbanística recollida no artigo 25.2.a) da Lei 7/1985, do 2 de abril, reguladora das bases do réxime local, e de conformidade co disposto nos artigos 165, 166 e 167 da LSG, e dadas as particularidades que presenta o sector de solo urbanizable SU-12 do PXOM de Sanxenxo, o Concello de Sanxenxo e Acciona consideran conveniente a sinatura deste convenio urbanístico, que facilitará o desenvolvemento urbanístico do sector e, ao propio tempo, a consecución dos obxectivos da modificación puntual nº 9 do PXOM.
Con base no anterior, as partes que subscriben este documento celebran este convenio urbanístico conforme as seguintes
Estipulacións
Primeira. Obxecto deste documento
Este convenio ten por obxecto:
i. Establecer as bases da modificación da ordenación detallada do SU-12, prevista no plan parcial do sector actualmente en vigor, coa finalidade de adaptala aos criterios do POL que resulten viables. Todo isto tendo en consideración o avanzado grao de desenvolvemento e execución acadado no ámbito.
ii. Regular a incorporación da nova ordenación detallada do SU-12 ao planeamento municipal mediante a tramitación da modificación do plan parcial en vigor, de modo tal que permita avaliar a súa compatibilidade e coherencia cos criterios de ordenación da modificación puntual do PXOM en tramitación.
iii. Regular a terminación das obras de urbanización pendentes de execución, tanto as interiores ao polígono como a conexión exterior do ámbito cos sistemas xerais de abastecemento de auga potable e saneamento, que permitirán a recepción das obras de urbanización e que o solo do sector SU-12 acade a condición de solo urbano consolidado.
iv. Regular o réxime de conservación das obras de urbanización.
v. Garantir a viabilidade técnica e económica da actuación, establecendo o adecuado equilibrio entre os beneficios e as cargas derivadas da actuación.
vi. Concretar as obrigas que asumen as partes asinantes no marco da modificación puntual nº 9 do PXOM de Sanxenxo e no seu desenvolvemento do mesmo no que afecta o sector de solo urbanizable SU-12, de modo que coa formalización deste convenio, o desenvolvemento do sector SU-12 continúe de xeito paralelo e non se vexa interrompido pola tramitación da modificación puntual nº 9 PXOM.
Segunda. Proposta de modificación do Plan parcial do sector SU-12 para a súa adaptación a criterios do POL
i. As alteracións que se incorporarán na ordenación urbanística en vigor do sector SU-12 son as reflectidas na ficha que xunta como anexo II, na cal se establecen as determinacións de aplicación a este sector.
Son obxecto de modificación, entre outros parámetros, os seguintes:
|
Parámetros |
Plan parcial en vigor |
Modificación puntual do plan parcial |
|
Edificabilidade |
0,55 m2/m2 |
0,35 m2/m2 |
|
Densidade de vivendas |
50 viv./ha |
30 viv./ha |
|
Nº máximo de vivendas |
359 |
211 |
Establécese unha tipoloxía de edificación formada por vivenda unifamiliar e/ou colectiva. A porcentaxe de aproveitamento para cada unha das tipoloxías edificatorias establecerase no documento de ordenación. En calquera caso, para a tipoloxía edificatoria de vivenda unifamiliar fíxase un estándar de prazas de aparcadoiro de 2 por vivenda.
En todo o demais, manterase a ordenación urbanística do plan parcial en vigor e as obras de urbanización xa executadas, salvo aquelas que teñan que ser modificadas para adaptarse á modificación do plan parcial e do proxecto de urbanización que para tal efecto se tramiten.
ii. Estas novas condicións de desenvolvemento do sector SU-12 materializaranse na ordenación detallada do sector mediante a modificación puntual do plan parcial en vigor, que se tramitará de conformidade co establecido no artigo 185 e seguintes do Regulamento da Lei do solo de Galicia.
Xúntase como anexo III o esquema orientativo da ordenación que se vai incluír na modificación puntual do plan parcial, na cal se materializan os novos criterios de desenvolvemento do sector tendo en conta o grao de execución acadado e os antecedentes deste ámbito de actuación, e coa que se considera que se cumpren no sector SU-12 os obxectivos de mellor integración paisaxística e menor impacto ambiental, dentro do necesario equilibrio de beneficios e cargas.
Esta proposta ten o carácter dun esquema de ordenación que na modificación puntual do plan parcial deberá ser obxecto de desenvolvemento consonte os parámetros e criterios da modificación puntual do PXOM en tramitación e as consideracións que resulten do trámite de avaliación ambiental estratéxica, respectando o espírito deste convenio e os parámetros xerais acordados nel.
Terceira. A xestión do sector SU-12 a partir da formalización deste convenio
A partir da formalización deste convenio, o desenvolvemento do sector SU-12 continuará de acordo coas previsións que se indican a continuación:
i. A propiedade executará, ata a súa finalización, as obras de urbanización interior do polígono previstas no proxecto de urbanización actualmente vixente, coas modificacións derivadas, de ser o caso, do plan parcial e do proxecto de urbanización modificados.
Así mesmo, executará pola súa conta as actuacións necesarias para conectar os servizos de abastecemento de auga potable e saneamento do sector ás redes públicas de ambos os servizos, coas seguintes particularidades:
• Respecto do sistema de abastecemento, se en execución das previsións da modificación puntual nº 9 do PXOM en tramitación é preciso reforzar os sistemas exteriores, a propiedade asume a obriga de executar e/ou custear as ditas obras na parte que lle corresponda en función da edificabilidade do ámbito.
• Respecto do sistema de saneamento, se posteriormente, en execución das previsións da modificación puntual nº 9 do PXOM en tramitación, for preciso reforzar os sistemas exteriores de saneamento ou facer unha nova depuradora para servir ao solo incluído neste sector SU-12, a propiedade asume a obriga de executar e/ou custear as ditas obras na parte que lle corresponda en función da porcentaxe da edificabilidade dos tres sectores, cun máximo de 300 €/habitante equivalente e considerando tres habitantes por vivenda.
Ambas as obrigas de reforzo exterior das infraestruturas de abastecemento e saneamento se manterán durante o prazo de dez (10) anos contados desde a aprobación definitiva da modificación puntual nº 9 do PXOM, aprobación que deberá ter lugar, como máis tarde, o 12 de setembro de 2022 (data de caducidade do informe ambiental).
Se a modificación puntual nº 9 do PXOM non acada a aprobación definitiva ou, unha vez aprobada, remata o prazo de dez (10) anos sen que o Concello de Sanxenxo executase as infraestruturas de ampliación ou reforzo exterior da rede de abastecemento e/ou saneamento, o promotor e os propietarios do SU-12 quedarán relevados do cumprimento da dita obriga.
Se, para a execución das conexións ás redes xerais dos servizos de abastecemento e saneamento na forma sinalada nos puntos anteriores, se precisa a ocupación dalgún terreo exterior ao ámbito, o Concello tramitará algún dos procedementos legalmente establecidos para a súa obtención, mesmo a súa expropiación forzosa, asumindo a Propiedade a obriga de pagamento de todos os custos que supoña a obtención dos terreos na porcentaxe que lle corresponda en relación co resto dos sectores afectados polas ditas obras.
O documento do plan parcial modificado deberá determinar as infraestruturas de conexión cos sistemas xerais existentes, así como as obras necesarias para a ampliación e o reforzo cos citados sistemas, de forma que asegure o correcto funcionamento do SU-12 tendo en conta as características do sector, de conformidade cos requisitos e condicións que estableza a modificación puntual nº 9 do PXOM en tramitación.
ii. Executadas as obras de urbanización previstas no punto anterior, o Concello procederá á súa recepción, incorporaraas ao dominio público municipal e, a partir dese momento o solo do sector SU-12, pasará a ter a natureza de solo urbano consolidado.
A conservación das obras de urbanización recibidas corresponde ao Concello de Sanxenxo.
iii. A propiedade presentará, nun prazo máximo de 45 días desde a subscrición deste convenio, o borrador de modificación puntual do Plan parcial SU-12 vixente, de acordo coas determinacións establecidas na ficha do sector (anexo II) e coa proposta alternativa da modificación da ordenación do plan parcial (anexo III) que se xuntan a este convenio.
Simultaneamente, a Propiedade poderá presentar, para a súa tramitación conxunta, a proposta de modificación do instrumento de xestión e do proxecto de urbanización, coa finalidade de adaptalos á modificación do plan parcial, segundo establecen o artigo 95.1 da LSG e o 221.1 do RGLS.
iv. A propiedade poderá solicitar licenzas de edificación naquelas zonas ou parcelas do sector en que sexan coincidentes as determinacións do plan parcial actualmente en vigor e as determinacións da súa modificación puntual. Para poder apreciar esta coincidencia, estas licenzas outorgaranse a partir da aprobación inicial da modificación puntual do plan parcial.
Cuarta. Obrigas asumidas polo promotor do sector de solo urbanizable SU-12
As obrigas que coa sinatura deste convenio urbanístico asumen os propietarios asinantes do sector SU-12 recondúcense ás seguintes:
1ª. A propiedade única do sector SU-12 asume os obxectivos xerais pretendidos pola modificación puntual nº 9 do PXOM de Sanxenxo, isto é, «rebaixar a densidade, aumentar a compacidade das ordenacións, liberar solo, como espazo público ou privado, e adaptar as construcións e urbanización ao relevo coa finalidade de preservar a paisaxe litoral e mellorar a imaxe do bordo costeiro», nos termos e co alcance que resultan da ficha do sector que se xunta como anexo II e da proposta de ordenación que se achega como anexo III.
2ª. Nun prazo non superior a 45 días, contados desde a formalización deste convenio, o promotor presentará no Rexistro municipal un borrador de modificación do plan parcial do sector que sexa acorde coas determinacións contidas na documentación anexa II e III.
3ª. No referente ao sistema e dotacións de abastecemento deste sector SU-12, se en execución das previsións da modificación puntual nº 9 do PXOM en tramitación for preciso reforzar os sistemas exteriores, a propiedade asume, durante o prazo de dez (10) anos contados desde a aprobación definitiva da modificación puntual nº 9 do PXOM, a obriga de executar e/ou custear as ditas obras na parte que lle corresponda en función da edificabilidade do ámbito.
Con carácter previo á aprobación definitiva da modificación do proxecto de equidistribución, o Promotor achegará a correspondente garantía do cumprimento da dita obriga, ben en forma de aval bancario –logo de determinación do importe da actuación– ben afectando parcelas de resultado con aproveitamento lucrativo privado ao cumprimento da dita obriga, afección real que será obxecto de inscrición no Rexistro da Propiedade.
Esta obriga manterase durante o prazo de dez (10) anos contados desde a aprobación definitiva da modificación puntual nº 9 do PXOM, aprobación que deberá ter lugar, como máis tarde, o 12 de setembro de 2022 (data de caducidade do informe ambiental). Se a modificación puntual nº 9 do PXOM non acadase a aprobación definitiva ou, unha vez aprobada, remata o prazo de dez (10) anos sen que o Concello de Sanxenxo executase as infraestruturas de ampliación ou reforzo exterior da rede de abastecemento, o Promotor do SU-12 quedará relevado do cumprimento da dita obriga e procederase á cancelación das garantías constituídas.
4ª. No referente ao sistema e dotacións de saneamento deste sector SU-12, se en execución das previsións da modificación puntual nº 9 do PXOM en tramitación for preciso reforzar os sistemas exteriores de saneamento ou facer unha nova depuradora para servir ao solo incluído neste sector SU-12, a Propiedade asume a obriga de executar e/ou custear as ditas obras na parte que proporcionalmente lle corresponda, cun máximo de 300 €/habitante equivalente, considerando tres habitantes por vivenda.
Con carácter previo á aprobación definitiva da modificación do proxecto de equidistribución, o Promotor achegará a correspondente garantía do cumprimento da dita obriga, ben en forma de aval bancario –logo de determinación do importe da actuación– ben afectando parcelas de resultado con aproveitamento lucrativo privado ao cumprimento da dita obriga, afección real que será obxecto de inscrición no Rexistro da Propiedade.
Esta obriga manterase durante o prazo de dez (10) anos contados desde a aprobación definitiva da modificación puntual nº 9 do PXOM, aprobación que deberá ter lugar, como máis tarde, o 12 de setembro de 2022 (data de caducidade do informe ambiental). Se a modificación puntual nº 9 do PXOM non acada a aprobación definitiva ou, unha vez aprobada, remata o prazo de dez (10) anos sen que o Concello de Sanxenxo execute as infraestruturas de ampliación ou reforzo exterior da rede de saneamento, o Promotor do SU-12 quedará relevado do cumprimento da dita obriga e procederase á cancelación das garantías constituídas.
5ª. A Propiedade obrígase, así mesmo, a redactar, impulsar e tramitar á súa custa a modificación que sexa preciso realizar do proxecto de equidistribución e do proxecto de urbanización do polígono único do ámbito, como consecuencia da aprobación da modificación puntual do plan parcial a que se refire este convenio. A dita modificación, conforme o indicado anteriormente, poderá tramitarse de forma conxunta coa modificación puntual do plan parcial.
6ª. A Propiedade renuncia ao exercicio de calquera reclamación de responsabilidade patrimonial contra o Concello de Sanxenxo en relación co acordo de suspensión de licenzas adoptado o 27 de setembro de 2017 ou calquera outro relacionado cos acordos adoptados neste convenio.
A renuncia prevista no parágrafo anterior quedará sen efecto no caso de que, por calquera causa, este convenio non chegue a entrar en vigor ou no suposto de que o Concello de Sanxenxo incumpra as obrigas asumidas na cláusula seguinte.
O incumprimento por parte da Propiedade das obrigas asumidas neste convenio motivará a modificación das condicións de ordenación do ámbito na modificación puntual nº 9 do PXOM en tramitación ou a través doutra figura de planeamento, sen que o Promotor poida reclamar ningunha responsabilidade pola inclusión do ámbito na modificación puntual nº 9 do PXOM nas condicións que nela se determinen.
Quinta. Obrigas asumidas polo Concello de Sanxenxo
Coa sinatura deste convenio, o Concello de Sanxenxo asume as seguintes obrigas:
1ª. Recibir de forma expresa as obras de urbanización deste sector SU-12, unha vez executadas na súa integridade e sendo acordes coas previsións contidas no proxecto de urbanización aprobado no seu día ou, de ser o caso, na súa modificación, e que se conclúa a súa execución do modo establecido na estipulación terceira, sen prexuízo das adaptacións exixidas pola execución material das obras permitida no artigo 96.2 da Lei do solo de Galicia.
2ª. Tramitar coa maior celeridade posible a modificación do Plan parcial do sector SU-12, cuxa proposta deberá ser presentada polos propietarios nos termos expostos na estipulación segunda deste convenio.
3ª. Coa sinatura deste convenio, e unha vez aprobada definitivamente a modificación do Plan parcial do sector SU-12, o Concello dá por cumpridos os criterios de desenvolvemento e os obxectivos pretendidos pola modificación puntual nº 9 do PXOM de Sanxenxo.
4ª. De conformidade co artigo 86.3.c) do Regulamento da Lei do solo de Galicia, o Concello de Sanxenxo asume de forma explícita a súa obriga de outorgar expresamente as licenzas urbanísticas que autoricen os proxectos que cumpran simultaneamente o plan parcial actualmente en vigor e a modificación puntual do plan parcial tras a aprobación inicial deste.
Sexta. Tramitación e perfeccionamento do convenio
De conformidade co disposto no artigo 168 da Lei do solo de Galicia e no 401 do seu regulamento de desenvolvemento, unha vez finalizado o trámite de exposición pública deste convenio, no caso de que por razón das alegacións presentadas se deban introducir cambios, o Concello de Sanxenxo notificaralles ás partes a proposta do seu texto definitivo e concederalles un prazo de dez (10) días hábiles para manifestaren a súa conformidade, reparos ou, de ser o caso, renuncia a ela, trámite este ao cal as partes renuncian para o suposto de que o dito texto sexa idéntico ao plasmado neste documento.
Unha vez aprobado definitivamente o convenio polo órgano municipal competente, deberá ser asinado no prazo máximo de quince (15) días contados desde a notificación do acordo ou resolución correspondente (artigo 168.4 da Lei do solo de Galicia e 402 do seu regulamento de desenvolvemento).
Sétima. Documentación que conforma o convenio
Forma parte deste convenio e, polo tanto, do réxime de reciprocidade obrigacional convido polas partes, a proposta de ficha do sector e a proposta de modificación da ordenación detallada do plan parcial, que se incorporan a este convenio como anexos I, II, III e que integran os seguintes documentos:
1. Anexo I: escritura de otorgamento de poder.
2. Anexo II: ficha de determinación do sector nº 12 de solo urbanizable.
3. Anexo III: plano da alternativa proposta.
Oitava. Natureza xurídica e xurisdición competente.
Este documento ten a natureza xurídica de convenio urbanístico de planeamento e de convenio urbanístico para a execución do dito planeamento, nos termos previstos polo artigo 165 e seguintes da LSG e 398 e seguintes do seu regulamento de desenvolvemento e, así mesmo, o contido no artigo 49 da Lei 40/2017, do 1 de outubro, de réxime xurídico do sector público.
As previsións establecidas no presente convenio non limitan nin condicionan a potestade municipal de planeamento. As cuestións relativas á súa celebración, cumprimento, interpretación, efectos e extinción serán competencia da orde xurisdicional contencioso-administrativa.
E en proba de conformidade con todo o acordado, asinan este documento por duplicado exemplar no lugar e na data indicados no encabezamento, de todo o cal dou fe.
|
Polo Concello de Sanxenxo |
Por Acciona Inmobiliaria, S.L.U. |
|
Telmo Martín González |
Samuel Matarranz Costoso |
ANEXO I
Escritura de apoderamento
O texto da escritura pódese consultar na sede electrónica do Concello de Sanxenxo (http://sede.sanxenxo.es) introducindo o seguinte CSV: LEKEPYCQR499C1UR
ANEXO II
Ficha das condicións urbanísticas ás cales debe adaptar
o Plan parcial do SU-12
Superficie bruta do sector: 70.395,89 m².
Superficie dotación existente e mantida:
Superficie neta do sector: 70.395,89 m²s.
Coeficiente edificabilidade: 0,35 m²/m².
Aproveitamento lucrativo máximo: 24.638,56 m2c.
(As superficies anteriores son provisionais, pendentes de confirmación na modificación do plan parcial).
Densidade de vivendas: a densidade de vivendas non poderá superar a cifra de 30 viv./ha.
Tipoloxía de edificación: establécese unha tipoloxía de edificación mixta formada por vivenda unifamiliar e vivenda colectiva, sen determinar unha porcentaxe de aproveitamento mínima para cada unha das tipoloxías edificatorias.
Porcentaxe VPO: 6,40 % ou, de ser superior, a porcentaxe determinada polo Instituto Galego da Vivenda e Solo para o Concello de Sanxenxo, que resulte de aplicación no momento de aprobación definitiva da modificación do plan parcial ou, se este varía polo transcurso do tempo, o vixente no momento de aprobación definitiva da modificación do proxecto de equidistribución.
As vivendas que resulten da aplicación desa porcentaxe adxudicaranse ao Concello de Sanxenxo con cargo ao 10 % de cesión obrigatoria de aproveitamento.
Altura máxima:
• Vivenda colectiva: PB+2.
• Vivenda unifamiliar: PB+1.
Os ditos criterios adaptaranse e, no caso de resultar preciso, poderase incrementar a altura de determinados bloques de vivenda colectiva a PB+3, se así resulta das consideracións dos organismos sectoriais competentes en materia de paisaxe, urbanismo e ordenación do territorio, emitidas durante a fase de avaliación ambiental estratéxica.
Criterios de ordenación:
• Fomentarase a compacidade reducindo, na medida do posible, a ocupación de solo.
• Aumentarase a dotación de espazos libres, tanto públicos como privados.
• Realizarase un estudo da paisaxe urbana para garantir a mellor ordenación posible das edificacións, procurando manter as maiores aperturas visuais posibles cara ao mar, analizando a inserción topográfica de tal modo que se respecten as vistas desde a estrada, se evite a formación de pantallas edificatorias (intercalando para tal efecto espazos libres públicos ou privados) e se mitigue o impacto visual.
• Incorporaranse os criterios que resulten dos informes emitidos na fase de avaliación ambiental estratéxica polos organismos correspondentes.
Condicións específicas da edificación:
• As cubertas das edificacións serán planas, cun acabamento vexetal en, polo menos, o 60 % da súa superficie. Poderán rematarse cun peto para poder executar correctamente a impermeabilización, cunha altura máxima de 60 cm sobre a cara superior do forxado da cuberta.
• O 40 % da superficie da parcela non ocupada pola edificación na tipoloxía de vivenda plurifamiliar deberá estar axardinada.
• As ordenanzas definirán unhas condicións de composición e acabamento das edificacións homoxéneas e congruentes, para que o conxunto da actuación presente unha lectura harmoniosa.
• Incorporaranse os criterios que resulten dos informes emitidos na fase de avaliación ambiental estratéxica polos organismos correspondentes.
ANEXO III
Proposta de ordenación (planos)
