Examinada a solicitude de conciliación formulada polos representantes do MVMC Arriba ou Corredoira, pertencente á CMVMC de Cabaleiros, A Santa Cruz e Tedós, e o MVMC Cerdeiriñas e Baños, pertencente á CMVMC de Carreiras, no concello de Lobeira, resultan os seguintes

Feitos:

Primeiro. Con data do 4 de xaneiro de 2019 o presidente da CMVMC de Cabaleiros, A Santa Cruz e Tedós presentou un escrito no rexistro electrónico da Xunta de Galicia (nº 2019/rx 16319) relativo a un acto de deslinde entre a citada comunidade de montes veciñais en man común e a de Carreiras, no concello de Lobeira.

Entre outra documentación, achegou un auto e acta de conciliación do Xulgado de Paz de Lobeira, as certificacións de aprobación do deslinde por ambas as CMVMC, así como arquivos informáticos cos vértices do deslindamento.

Segundo. O informe do Servizo de Montes da Xefatura Territorial de Ourense do 15 de outubro de 2019 considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, aínda que non consta unha acta do deslindamento nin se achega memoria.

Consideracións legais e técnicas:

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que hai seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, o Xurado Provincial de Clasificación de Montes Veciñais en Man Común acordou por unanimidade o día 25 de novembro de 2020:

Aprobar o acto de conciliación acadado polas xuntas reitoras dos MVMC Arriba ou Corredoira, pertencente á CMVMC de Cabaleiros, A Santa Cruz e Tedós, e o MVMC Cerdeiriñas e Baños, pertencente a Carreiras, no concello de Lobeira, de acordo co informe do Servizo de Montes do 15 de outubro de 2019.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 27 de abril de 2021

Luis Jorge Álvarez Ferro
Presidente do Xurado Provincial de Clasificación de Montes Veciñais
en Man Común de Ourense