Examinada a solicitude de conciliación formulada polos representantes do MVMC de Montes, pertencente á CMVMC de Santa Baia de Montes e o MVMC de Carzoá, pertencente á CMVMC de Carzoá, no concello de Cualedro, resultan os seguintes

Feitos:

Primeiro. Con data do 30 de agosto de 2019 o presidente da CMVMC de Santa Baia de Montes achegou un escrito no rexistro electrónico da Xunta de Galicia (nº 2019/rx 1788615) relativo a un acto de deslindamento entre a citada comunidade de montes veciñais en man común entre os MVMC de Carzoá e de Montes,

Coa solicitude achegou os seguintes documentos: acta do deslindamento, memoria descritiva, acta de conciliación, certificación de aprobación das comunidades de montes implicadas e arquivos shp.

Segundo. O informe do Servizo de Montes da Xefatura Territorial de Ourense do 20 de decembro de 2019 considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, aínda que non se achega ningunha planimetría coa memoria.

En vista disto, o Servizo de Montes propuxo ao Xurado a aprobación do deslindamento, ben que coas seguintes condicións:

– Exclúese o tramo 1, sen denominación, por entender que afecta a confluencia do perímetro estremeiro destes dous MVMC co MVMC San Martiño, pertencente á CMVMC de San Martiño. Este punto deberá establecerse mediante un procedemento de deslindamento que inclúa o acordo da comunidadd de montes veciñais titular deste.

– Exclúese o tramo 8, denominado Os Penedos das Cruces, por entender que afecta a confluencia do perímetro estremeiro destes dous MVMC co MVMC de Cualedro, pertencente á CMVMC de Cualedro, polo que este punto deberá establecerse mediante un procedemento de deslindamento que inclúa o acordo da comunidade de montes veciñais titular deste.

Consideracións legais e técnicas:

Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se seguirá no deslindamento entre montes veciñais en man común e establece que o xurado provincial de clasificación de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, o Xurado Provincial de Clasificación de Montes Veciñais en Man Común acordou por unanimidade o día 25 de novembro de 2020:

Aprobar o acto de conciliación acadado polas xuntas reitoras dos MVMC de Montes, pertencente á CMVMC de Santa Baia de Montes, e o MVMC de Carzoá, pertencente á CMVMC de Carzoá, no concello de Cualedro, de acordo co informe do Servizo de Montes do 20 de decembro de 2019.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 27 de abril de 2021

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense