O Pleno do Concello de Outes (A Coruña) adoptou na sesión ordinaria realizada o 25 de febreiro de 2021 o seguinte
ACORDO
Primeiro. Desestimar a alegación presenda por L.S.M., con rexistro de entrada no Concello número 2020-E-RC-2132. O motivo da dita desestimación fundaméntase no informe sobre ela emitido por José Isidro López Yáñez, arquitecto, que se transcribe a seguir:
«Informe da alegación:
Primeiro. Non resulta necesario desenvolvemento do solo urbano non consolidado para poder ser dedicado a aparcadoiro. Segundo o previsto no artigo 2.2.14 do PXOM e 89 da Lei 2/2016, do solo de Galicia (LSG), sería un uso permitido con carácter provisional.
Desde este punto de vista non se considera necesario levar a cabo o desenvolvemento do solo urbano non consolidado nin as tramitacións dos instrumentos de desenvolvemento, para podelo destinar a aparcadoiro.
Ademais, desde esta formulación de provisionalidade non resulta incompatible co desenvolvemento posterior do solo urbano non consolidado. Tampouco implicaría a aparición automática dunha medianeira vista, posto que a actividade podería cesar cando se desenvolva o referido solo.
Segundo. Ao tratarse de usos provisionais tampouco resultan incompatibles coa execución de vivendas protexidas no momento en que se execute o solo urbano non consolidado.
Non se terán que xustificar os parámetros edificatorios do solo urbano non consolidado por non tratarse dunha actuación permanente.
Terceiro. Independentemente de que a parcela de solo urbano non consolidado poida ser destinada a aparcadoiro, como uso provisional, a previsión de aparcadoiros indicada no artigo 6.8.10. do PXOM debe xustificarse con carácter permanente polos modos indicados neste artigo.
Cuarto. Segundo o previsto no artigo 79 da LSG, non lle corresponde ao estudo de detalle a xustificación da existencia da totalidade dos servizos urbanísticos, os cales se presumen con base na clasificación e cualificación outorgada polo PXOM. No proxecto de edificación deberá avaliarse a existencia destes servizos e, se for necesario, prever as actuacións necesarias de acordo co previsto no artigo 20.b) da LSG.
Proposta de resolución:
Visto o anterior, proponse desestimar a alegación presentada, con excepción do indicado no punto terceiro, e deberá xustificar o promotor da actuación o previsto no artigo 6.8.10 de maneira permanente e non provisional».
Segundo. Estimar parcialmente as alegacións no seu punto segundo (no tocante á dotación de aparcadoiro en solo urbano non consolidado), presentadas polos seguintes alegantes:
R.M.B.O. |
Rexistro de entrada: 2020-E-RC-2120 |
A.X.N.F. |
Rexistro de entrada: 2020-E-RC-2165 |
A.N.F. |
Rexistro de entrada: 2020-E-RC-2145 |
M.E.F.D. |
Rexistro de entrada: 2020-E-RC-2121 |
A motivación da estimación baséase no informe emitido por José Isidro López Yáñez, arquitecto, que se transcribe a seguir:
«Segundo. A previsión de aparcadoiros provisionais en parcelas de solo urbano non consolidado está recollida no artigo 2.2.14 do PXOM e 89 da Lei 2/2016, do solo de Galicia (LSG).
Esta actuación non inviabilizará a execución posterior do solo urbano non consolidado.
Porén, independentemente de que a parcela de solo urbano non consolidado poida ser destinada a aparcadoiro, como uso provisional, a previsión de aparcadoiros indicada no artigo 6.8.10 do PXOM debe xustificarse con carácter permanente polos modos indicados neste artigo.
Proposta de resolución:
Visto o anterior, proponse desestimar a alegación presentada, con excepción do indicado no punto segundo, e deberá xustificar o promotor da actuación o previsto no artigo 6.8.10 do PXOM de maneira permanente e non provisional».
Terceiro. Desestimar as restantes alegacións formuladas polos alegantes do punto segundo anterior. O fundamento da dita destimación baséase no informe que consta no expediente, emitido polo arquitecto José Isidro López Yáñez, que se trancribe a seguir:
«Informe da alegación:
Primeiro:
Sobre a definición de uso dotacional que figura no número 5.7.1 do PXOM. O uso dotacional ten por finalidade, entre outras, a provisión de equipamento que faga posible a saúde, cuestión esta intimamente relacionada cos tanatorios.
No artigo 5.7.5 inclúense os tanatorios como equipamento sanitario-asistencial. A redacción dada polo PXOM non resulta incompatible co previsto nin no Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia, nin no Decreto 83/2018, do 26 de xullo, polo que se aproba o Plan básico autonómico de Galicia.
Por outra banda, na alegación presentada alúdese en todo caso á excepcionalidade da tramitación do estudo de detalle. Segundo o previsto no artigo 8.2.5 do PXOM, a tramitación do estudo de detalle non é unha excepcionalidade senón un procedemento ordinario para a execución dun equipamento en edificio exclusivo.
Desde este punto de vista non se considera necesario nin xustificar o interese público nin a excepcionalidade, nin a necesidade.
Por outra banda, esta xustificación tamén excedería a finalidade prevista para os estudos de detalle no artigo 79 da Lei 2/2016, do solo de Galicia. A alegación pretende que o estudo de detalle incorpore documentacións e xustificacións que non lle son propias.
Polo que respecta a que non pode considerarse equipamento por tratarse dunha actividade privada, cómpre lembrar o disposto no artigo 112 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia.
Proposta de resolución:
Visto o anterior, proponse desestimar a alegación presentada, con excepción do indicado no punto segundo, e deberá xustificar o promotor da actuación o previsto no artigo 6.8.10 do PXOM de maneira permanente e non provisional».
Cuarto. A aprobación definitiva por parte do Pleno do Concello do estudo de detalle correspondente á parcela destinada a tanatorio situada nas rúas Otero Pedraio esquina rúa Curros Enríquez (referencia catastral 15063P50407465), de conformidade co artigo 22.2.c) da Lei 7/1985, do 2 de abril, reguladora das bases de réxime local, que outorga a este órgano municipal a competencia para a aprobación, que poña fin á tramitación municipal, dos instrumentos de ordenación previstos na lexislación urbanística.
Quinto. Notificarlles aos interesados o acordo adoptado no Pleno.
Sexto. Publicar o acordo de aprobación definitiva, no prazo dun mes desde a súa adopción, no Diario Oficial de Galicia, e o texto dos documentos que integran o estudo detalle, así como os planos deste no Boletín Oficial da provincia.
Sétimo. Comunicar a acordo de aprobación definitiva á consellería competente en materia de urbanismo e dar traslado deste para a súa inscrición no Rexistro de Planeamento Urbanístico de Galicia, no prazo dun mes desde a data de aprobación municipal.
Outes, 22 de marzo de 2021
Manuel González López
Alcalde