O ordinal 4 do artigo 29 do Decreto 51/2000, do 25 de febreiro, polo que se establece a organización recadatoria da Xunta de Galicia e o Estatuto dos recadadores de zona, indica que a Consellería de Facenda poderá revisar as retribucións dos recadadores de zona cando as circunstancias o aconsellen, en función tanto do número de documentos e o volume de débeda cargada a cada zona como dos gastos desta e as súas circunstancias obxectivas.
As actuais circunstancias económicas e a súa afectación á actividade recadatoria das oficinas recadadoras aconsellan a revisión dos axustes introducidos pola Orde do 31 de xullo de 2012 pola que se fixan as retribucións dos recadadores de zona.
Por iso, e en uso da autorización contida na disposición derradeira primeira do citado decreto,
ACORDO:
Artigo 1
As retribucións dos recadadores de zona serán as que resulten de aplicar sobre a suma dos ingresos que sexan imputables en cada exercicio a cada zona e que corresponden a providencias de constrinximento cun importe cargado que non exceda os 500.000 euros, as seguintes porcentaxes:
– De 0 euros a 600.000 euros, o 20 %.
– De 600.000,01 euros a 1.200.000 euros, o 15 %.
– De 1.200.000,01 euros a 2.100.000 euros, o 10 %.
– De 2.100.000,01 euros a 2.400.000 euros, o 5 %.
– De 2.400.000,01 euros a 3.000.000 de euros, o 4 %.
– De 3.000.000,01 euros a 3.600.000 euros, o 3 %.
– De 3.600.000,01 euros a 4.200.000 euros, o 2 %.
– A partir de 4.200.000,01 euros, o 1 %.
Artigo 2
Nas providencias de constrinximento cun importe cargado que exceda os 500.000 euros, a retribución dos recadadores establecerase por cada valor aplicando aos ingresos que obteñan a porcentaxe do 1 %.
Artigo 3
Fíxase no 1 % a porcentaxe para satisfacer sobre o total recadado en período executivo no suposto de recompensas especiais a que se refire o artigo 33.1 do Decreto 51/2000, do 25 de febreiro, polo que se establece a organización recadatoria da Xunta de Galicia e o Estatuto dos recadadores de zona.
Artigo 4
As retribucións a que se refiren os artigos anteriores non inclúen o imposto sobre o valor engadido.
Disposición derrogatoria única
Queda derrogada a Orde do 31 de xullo de 2012 pola que se fixan as retribucións dos recadadores de zona.
Disposición derradeira única
Esta orde terá efectos desde o 1 de xaneiro de 2021.
Santiago de Compostela, 16 de decembro de 2020
Valeriano Martínez García
Conselleiro de Facenda e Administración Pública