Examinada a solicitude de conciliación formulada polos representantes do MVMC Seixo e Val, pertencente á CMVMC de Poulo (agás Sobrado, Cerdal, O Dorno e Garabelos), e o MVMC Seixo e Val, pertencente á CMVMC de Trasportela, no concello de Gomesende, resultan os seguintes

Feitos:

Primeiro. Con data do 27 de xuño de 2019 o presidente da CMVMC de Poulo (agás Sobrado, Cerdal, O Dorno e Garabelos) presentou un escrito no rexistro electrónico da Xunta de Galicia (nº 2019/rx 1406128) relativo a un acto de deslindamento entre a citada comunidade de montes veciñais en man común e a de Trasportela.

Entre outra documentación, achegou unha certificación do Xulgado de Paz de Gomesende, e certificacións de aprobación do deslindamento por ambas as CMVMC.

Segundo. O 3 de xullo de 2019 a CMVMC interesada presentou no rexistro electrónico da Xunta de Galicia (nº 2019/1441635) un novo escrito co cal incorporou a seguinte documentación: arquivo shape de vértices de deslindamento e un arquivo shape de poligonal de deslindamento.

Terceiro. O informe do Servizo de Montes da Xefatura Territorial de Ourense do 22 de novembro de 2019 considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, aínda que non consta unha acta do deslindamento nin se achega memoria. Polo que o Servizo de Montes lle propuxo ao Xurado a aprobación do deslindamento, ben que co seguinte condicionado:

Exclúese o tramo comprendido entre o vértice auxiliar A22 (situado entre os vértices V20 e V21) e o vértice V23, por entender que afecta a confluencia do perímetro estremeiro destes dous MVMC co MVMC Seixo e Val, pertencente á CMVMC da parroquia de San Lourenzo de Fustáns. Polo que este punto deberá establecerse mediante un procedemento de deslindamento que inclúa o acordo da comunidade de montes veciñais titular deste.

Consideracións legais e técnicas:

Primeiro. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento a seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, o Xurado Provincial de Clasificación de Montes Veciñais en Man Común acordou por unanimidade o día 2 de setembro de 2020:

Aprobar o acto de conciliación acadado polas xuntas reitoras dos MVMC Seixo e Val, pertencente á CMVMC de Poulo (agás Sobrado, Cerdal, O Dorno e Garabelos), e o MVMC Seixo e Val, pertencente á CMVMC de Trasportela, no concello de Gomesende, de acordo co informe do Servizo de Montes do 22 de novembro de 2019.

Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 10 de decembro de 2020

Yago Borrajo Sánchez
Presidente do Xurado Provincial de Clasificación
de Montes Veciñais en Man Común de Ourense