De conformidade co previsto no artigo 8 da Lei 19/2013, do 9 de decembro, de transparencia, acceso á información pública e bo goberno e no artigo 8 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, dáse publicidade do seguinte encargo coas seguintes características:
• Resolución do 18 de agosto de 2020, da Axencia Galega de Innovación (Gain) pola que se encarga a Tragsa (Empresa de Transformación Agraria, S.A., SME, MP) a realización das obras complementarias ás encargadas pola Resolución do 14.12.2018 da Axencia Galega de Innovación respecto das obras de acondicionamento e urbanización da ampliación do Centro de Investigación Aerotransportada de Rozas (CIAR) en Lugo.
• Actividade: Tragsa asumirá a realización das obras complementarias ás previstas na Resolución do 14.12.2018 con suxeición aos termos e condicións que se derivan da Resolución do 18.8.2020.
• Natureza e alcance da xestión encomendada: o encargo ten natureza de encargo a medio propio, de acordo co disposto nos artigos 47 e seguintes da Lei 16/2010, do 17 de decembro, e no artigo 13 da Lei 14/2013, do 26 de decembro, de racionalización do sector público autonómico.
Tal condición de medio propio está recollida na disposición adicional vixésimo cuarta da Lei 9/2017, do 8 de novembro, de contratos do sector público, a cal establece que Tragsa e a súa filial Tragsatec terán a consideración de medios propios personificados e servizos técnicos da Administración sempre que se cumpran os requisitos establecidos no punto 2º da letra d) do número 2 do artigo 32, e nas letras a) e b) do número 4 do mesmo artigo, e virán obrigadas a realizar, con carácter exclusivo, os traballos que estes lles encomenden nas materias sinaladas nos números 4 e 5, dando unha especial prioridade a aqueles que sexan urxentes ou que se ordenen como consecuencia das situacións de emerxencia que se declaren.
A empresa pública Tragsa encargarase de realizar as seguintes tarefas:
1. Executar os traballos derivados desta encarga a medio propio previstos na Resolución do 18.8.2020 cos medios persoais e materiais que considere necesarios, sen prexuízo das funcións que corresponden ao director facultativo da encarga para o bo fin desta.
O eventual recurso á subcontratación non poderá supor a execución dunha parte relevante do obxecto que se encarga.
2. Executar os traballos derivados desta encarga con suxeición ás condicións técnicas indicadas e ás tarefas descritas achegando os medios que resulten necesarios.
O persoal necesario para a execución da encarga dependerá exclusivamente de Tragsa, o cal terá todos os dereitos e deberes inherentes á súa condición de empregador respecto deste.
• Financiamento: o orzamento de execución é de 226.146,61 € (non aplica IVE), con cargo á aplicación orzamentaria 09.A3.561A.622.0 dos orzamentos xerais da Comunidade Autónoma de Galicia para o ano 2020.
Para todos os efectos, entenderase que o orzamento aprobado por Gain en canto Administración pública poder adxudicador, comprende todos os gastos directos e indirectos que a empresa deba realizar para a normal execución dos traballos encargados.
• Prazo de vixencia: seis meses, contado desde o día de sinatura da acta de replanteo.
A empresa Tragsa está obrigada ao cumprimento do prazo fixado para a encarga. Poderán ser acordadas prórrogas do prazo de execución que sexan necesarias sempre e cando estean xustificadas as causas do atraso e sen que supoñan en ningún caso incremento do importe total da encarga.
Santiago de Compostela, 18 de agosto de 2020
Patricia Argerey Vilar
Directora da Axencia Galega de Innovación