Mediante a Orde do 22 de abril de 2020 estableceuse o réxime de delegación de competencias en órganos centrais e periféricos da Consellería de Sanidade e do Servizo Galego de Saúde e na Axencia Galega para a Xestión do Coñecemento en Saúde, que nunha única disposición estipulou as delegacións competenciais que ata ese momento se atopaban en disposicións particulares para os distintos órganos delegados.

A entrada en vigor da nova norma puxo de manifesto algunhas diverxencias e dificultades prácticas na aplicación e implementación dos distintos procedementos por parte dos órganos delegados, especialmente no que atinxe á tramitación económica dos expedientes de gasto e á necesidade de diferenciar as distintas fases destes.

Así, a modificación afecta, esencialmente, as delegacións realizadas en materia de contratación e xestión de gasto a prol da Secretaría Xeral Técnica da Consellería de Sanidade e da Dirección Xeral de Recursos Económicos do Servizo Galego de Saúde, dado que é esta última a que dispón dos medios e recursos para tramitar os expedientes e xestionar as distintas fases do gasto.

A outra modificación ten por obxecto facer unha aclaración respecto das competencias delegadas na Secretaría Xeral Técnica da consellería, no relativo ao persoal regulado na Lei 17/1989, do 23 de outubro, de creación de escalas do persoal sanitario ao servizo da Comunidade Autónoma, evitando a referencia a unha soa das categorías reguladas na citada disposición.

Por canto antecede, en virtude das facultades que me confiren os artigos 38, 43.3 e 44 da Lei 1/1983, do 22 de febreiro, de normas reguladoras da Xunta e da súa Presidencia; o artigo 6 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia; o artigo 9 da Lei 40/2015, do 1 de outubro, do réxime xurídico do sector público; nos decretos 136 e 137/2019, do 10 de outubro, polos que se establecen as estruturas orgánicas da Consellería de Sanidade e do Servizo Galego de Saúde, respectivamente; o Decreto 112/2015, do 31 de xullo, polo que se crea a Axencia Galega de Xestión do Coñecemento en Saúde, e demais disposicións de xeral aplicación,

DISPOÑO:

Artigo único. Modificación da Orde do 22 de abril de 2020 de delegación de competencias en órganos centrais e periféricos da Consellería de Sanidade e do Servizo Galego de Saúde e na Axencia Galega para a Xestión do Coñecemento en Saúde

Un. Modifícase o artigo 1 da Orde do 22 de abril de 2020 eliminando os parágrafos b) e c), e modificando o ordinal 2º do parágrafo e), que queda redactado como segue:

«Artigo 1. Delegacións na persoa titular da Secretaría Xeral Técnica da Consellería de Sanidade

Deléganse na persoa titular da Secretaría Xeral Técnica as seguintes competencias:

a) O despacho e resolución dos expedientes de índole administrativa que lle estean atribuídos á persoa titular da consellería.

b) A execución dos acordos de carácter xeral do Consello de Dirección da consellería.

c) A disposición de todo canto concirne ao réxime interno da consellería, agás o reservado legalmente á competencia exclusiva da persoa titular da consellería ou que estea atribuído expresamente a outros órganos.

d) As que derivan do exercicio do protectorado das fundacións de interese galego adscritas á consellería.

e) O exercicio das que en materia de persoal lle corresponden á persoa titular da consellería segundo o establecido na Lei 2/2015, do 29 de abril, do emprego público de Galicia, no ámbito da consellería e dos servizos centrais do Servizo Galego de Saúde, agás a provisión de postos de traballo clasificados como de libre designación, o nomeamento de persoal eventual e os que correspondan a outros órganos.

En particular, deléganse as seguintes funcións:

1ª. A resolución dos recursos administrativos interpostos contra actos e resolucións das persoas titulares dos órganos da consellería, agás as ditadas en expedientes sancionadores non disciplinarios, a suspensión dos actos impugnados en vía administrativa, así como a resolución das reclamacións en materia de responsabilidade patrimonial e os procedementos de revisión de oficio que lle correspondan á persoa titular da consellería, nos casos en que non estean expresamente delegados noutros órganos, e sempre que non ditase o acto obxecto do recurso ou reclamación.

2ª. As que en materia de persoal lle corresponden á persoa titular da consellería respecto do persoal funcionario e laboral da Consellería de Sanidade e do adscrito aos servizos centrais do Servizo Galego de Saúde, incluíndo nestes casos o persoal regulado na Lei 17/1989, do 23 de outubro, de creación de escalas do persoal sanitario ao servizo da Comunidade Autónoma.

3ª. As autorizacións:

Un. Das comisións de servizo con dereito á indemnización prevista no artigo 4 do Decreto 144/2001, do 7 de xuño, sobre indemnizacións por razón do servizo ao persoal con destino na Administración autonómica de Galicia, das persoas titulares das xefaturas territoriais e do persoal dependente da Secretaría Xeral Técnica da consellería.

Dous. As relativas a asistencia a cursos e actividades de formación e/ou perfeccionamento, e as vacacións anuais, permisos e licenzas do persoal baixo a súa dependencia dos servizos centrais da consellería e das persoas titulares das xefaturas territoriais da consellería.

f) O exercicio das tarefas de responsable de tratamento, nos termos definidos na lexislación en materia de protección de datos das persoas físicas. Estas tarefas aplicaranse a todos aqueles tratamentos que conteñan datos de carácter persoal dentro do Sistema público de saúde de Galicia».

Dous. Modifícase o parágrafo b) e engádese un parágrafo f) ao número 2 do artigo 6 da Orde do 22 de abril de 2020, relativo ás competencias delegadas en materia orzamentaria a prol da persoa titular da Dirección Xeral de Recursos Económicos do Servizo Galego de Saúde:

«2. En materia orzamentaria:

(...)

b) Os actos de autorización e de disposición de créditos de contratos centralizados e dos expedientes de gasto que afecten máis dunha área sanitaria ou centro de gasto. Non obstante, a retención de crédito, a autorización e disposición do gasto, o recoñecemento das obrigas, a proposta de pagamentos e a contabilización das diferentes fases continuará realizándose nas respectivas áreas sanitarias e/ou centros de gasto.

(...)

f) A autorización e disposición dos gastos da consellería, ata o límite dos créditos autorizados e non reservados á aprobación do Consello da Xunta de Galicia, o recoñecemento das obrigas de gasto e propostas de pagamento dos diferentes capítulos do orzamento, así como propoñer e aprobar as modificacións orzamentarias que correspondan á consellería».

Disposición derradeira única. Entrada en vigor

Esta orde entrará en vigor o día seguinte da súa publicación no Diario Oficial de Galicia.

Santiago de Compostela, 25 de maio de 2020

Jesús Vázquez Almuíña
Conselleiro de Sanidade e presidente do Servizo Galego de Saúde