O artigo 34.12 da Lei 8/2008, do 10 de xullo, de saúde de Galicia, recolle entre as intervencións públicas que poderán exercer as autoridades sanitarias competentes sobre as actividades públicas e privadas que, directa ou indirectamente, poidan ter consecuencias para a saúde, a posibilidade de adoptar as medidas preventivas que se consideren pertinentes en caso de que exista un risco inminente e extraordinario para a saúde.
Para tal efecto, a Administración sanitaria poderá proceder á incautación ou inmobilización de produtos, a suspensión do exercicio de actividades, o peche de empresas ou das súas instalacións, a intervención de medios materiais e persoais e cantas outras medidas se consideren sanitariamente xustificadas.
A duración das medidas a que se refire este punto fixaranse para cada caso, sen prexuízo das prórrogas sucesivas acordadas por resolucións motivadas, non excedendo do que exixa a situación de risco extraordinario que as xustificou.
Por outra banda, o artigo 8.3 da Lei 3/2019, do 2 de xullo, de farmacia de Galicia, recolle, entre as obrigas dos establecementos e servizos de atención farmacéutica, a de estar suxeitos ao cumprimento das obrigas derivadas do principio de solidariedade e integración sanitaria, nos casos de emerxencia ou perigo para a saúde pública.
De conformidade coa Orde SND/276/2020, do 23 de marzo, pola que se establecen obrigas de subministración de información, abastecemento e fabricación de determinados medicamentos na situación de crise sanitaria ocasionada polo COVID-19, e do procedemento habilitado pola Axencia Española do Medicamento e Produtos Sanitarios para a distribución controlada das especialidades con cloroquina e hidroxicloroquina ao canal de distribución, ditouse o Acordo do 27 de marzo de 2020 sobre medidas relativas ao control da distribución e dispensación das citadas especialidades, co obxecto de garantir a continuidade dos tratamentos crónicos xa existentes no ámbito ambulatorio, así como a cobertura das necesidades hospitalarias para loitar eficazmente contra a pandemia.
Neste intre, as necesidades destas especialidades estarían plenamente cubertas e mesmo se teñen xerado excedentes, polo que non tería sentido manter as limitacións impostas no momento inicial da pandemia.
Tendo en conta o anterior, e para tal efecto
ACORDO:
Primeiro. As existencias dos almacéns de distribución seguirán a ser monitorizadas pola Consellería de Sanidade, co obxecto de dispor en todo momento de información actualizada das existencias de especialidades con cloroquina e hidroxicloroquina, tal como esixe a Orde SND/276/2020.
Segundo. As oficinas de farmacia poderán solicitar a reposición ao almacén de distribución das especialidades con cloroquina e hidroxicloroquina, do mesmo xeito que o viñan facendo con anterioridade ao estado de alarma, asegurando, en todo momento, a dispoñibiliade de existencias.
Terceiro. As citadas medidas manteranse mentres se manteña vixente o estado de alarma ou as súas prórrogas, ou ben até que a autoridade delegada deixe sen efecto os procedementos previstos para as citadas especialidades.
Santiago de Compostela, 26 de maio de 2020
Jesús Vázquez Almuiña
Conselleiro de Sanidade