O 19 de decembro de 2019 publicouse no Diario Oficial de Galicia núm. 241, a Resolución do 28 de novembro de 2019 pola que se establecen as bases reguladoras para a concesión, en réxime de concorrencia competitiva, de subvencións a xeodestinos de Galicia, para o desenvolvemento de actuacións de dinamización turística, e se procede á súa convocatoria para o ano 2020 (código de procedemento TU501C).
O artigo 3.2 das bases reguladoras dispón:
«Unicamente será subvencionable un proxecto por xeodestino solicitante. Se existise máis dunha solicitude por territorio, a subvención será adxudicada de acordo coa seguinte orde de prelación:
• Mancomunidades e consorcios.
• Grupos de desenvolvemento rural.
• Outras asociacións legalmente constituídas.
No caso de que se presenten dúas ou máis solicitudes nas categorías indicadas, adxudicarase á entidade que agrupe o maior número de concellos do xeodestino».
Dado o mapa de xeodestinos existente e a convivencia nalgún destes territorios claramente diferenciados, cómpre modificar o citado artigo 3.2 de xeito que ningún territorio quede excluído das accións de dinamización turística cuxo desenvolvemento constitúe o obxecto da presente convocatoria.
Polo exposto,
RESOLVO:
1. Modificar o artigo 3.2 das bases reguladoras para a concesión, en réxime de concorrencia competitiva, de subvencións a xeodestinos de Galicia, para o desenvolvemento de actuacións de dinamización turística, e se procede á súa convocatoria para o ano 2020, que queda redactado como segue:
«2. Só se admitirá unha solicitude por entidade xestora.
Poderanse subvencionar varios proxectos por xeodestino sempre que se cumpran os seguintes requisitos:
– Que se trate de territorios diferenciados dentro los límites do xeodestino.
– Ningún concello poderá participar en máis dunha proposta.
– Que os proxectos se presenten por entidades xestoras diferenciadas.
No caso de admisión de máis dun proxecto para un xeodestino, valoración establecida no punto 1.a) do artigo 6 destas bases, o territorio dividirase seguindo unha repartición de todos os concellos entre as propostas.
Se existisen varias solicitudes por territorio, a subvención será adxudicada de acordo coa seguinte orde de prelación:
• Mancomunidades e consorcios.
• Grupos de desenvolvemento rural.
• Outras asociacións legalmente constituídas».
2. Esta modificación, unha vez publicada no Diario Oficial de Galicia, implicará a apertura dun novo prazo para presentar solicitudes, que será dun mes a partir do día seguinte ao da citada publicación.
Santiago de Compostela, 9 de xaneiro de 2020
Mª Nava Castro Domínguez
Directora da Axencia Turismo de Galicia
