Antecedentes:
Para os efectos previstos no artigo 21.1 da Lei 8/2013, do 28 de xuño, de estradas de Galicia, sométese ao trámite de información pública o proxecto construtivo Mellora da seguridade viaria na PO-531. Actuacións nos puntos quilométricos (p.q.) 8+850 e 9+400, de clave PO/18/101.06.
A estrada PO-531 (Pontevedra-Barro) caracterízase por presentar unha intensidade media diaria de tráfico moi alta e por atravesar e dar acceso a varios núcleos de poboación e algún polígono industrial-comercial, todo o cal fai que se teñan continuas situacións de cruzamento de vías e por tanto, risco de accidente de tráfico e de inseguridade viaria.
Trátase de mellorar a seguridade viaria do treito considerado mediante a reordenación do trazado actual habilitando nos lugares, xa preestablecidos no estudo previo, dúas zonas para o cambio de sentido de tipo rotonda e paso inferior.
Está prevista tamén a execución de varios muros tipo quebramar, varios treitos de beirarrúas, dúas paradas de autobús (p.q. 9+310 e 9+270), o reforzo do firme no treito considerado, a renovación da drenaxe lonxitudinal e a reposición e mellora da iluminación pública, da sinalización viaria e das barreiras de seguridade.
Considerando todo o exposto e o establecido na normativa vixente,
RESOLVO:
Primeiro. De acordo co establecido no artigo 21.1 da Lei 8/2013, do 28 de xuño, de estradas de Galicia, e no artigo 50 do Decreto 66/2016, do 26 de maio, polo que se aproba o Regulamento xeral de estradas de Galicia, o proyecto de construción sométese ao trámite de información pública, durante un período de trinta días hábiles, contados a partir do seguinte ao da publicación deste anuncio no Diario Oficial Galicia, para que as persoas que o consideren oportuno poidan formular por escrito, ante a Axencia Galega de Infraestruturas, as observacións que crean convenientes relativas á concepción global do trazado deseñado.
Segundo. Simultaneamente ao trámite sinalado no parágrafo anterior, e para os efectos previstos no artigo 56.1 do Decreto do 26 de abril de 1957, polo que se aproba o Regulamento de expropiación forzosa, sométese a información pública a relación individual de bens, dereitos e propietarios afectados pola realización da obra correspondente, para que os afectados presenten cantas alegacións ou rectificacións consideren convenientes en canto aos bens e dereitos descritos na relación anexa.
Terceiro. A exposición ao público, para os efectos da presente resolución, realízase na Axencia Galega de Infraestruturas (San Caetano, s/n, 15781 Santiago de Compostela), no Servizo de Infraestruturas de Pontevedra (avda. Mª Victoria Moreno, 43-1º, 36071 Pontevedra) e no Concello de Barro (Santo Antoniño, 11, Perdecanai, 36194 Barro-Pontevedra).
Así mesmo, na páxina web da Consellería de Infraestruturas e Mobilidade:
(https://infraestruturasemobilidade.xunta.gal/organizacion/c/CIV_Axencia_Galega_de_Infraestruturas) atópase á disposición dos interesados o proxecto de construción.
Santiago Compostela, 2 de decembro de 2019
Francisco Menéndez Iglesias
Director da Axencia Galega Infraestruturas
