Antecedentes:
Para os efectos previstos no artigo 21.1 da Lei 8/2013, do 28 de xuño, de estradas de Galicia, sométese ao trámite de información pública o documento Mellora de seguridade viaria (MSV) na estrada PO-542, p.q. 4+840-5+040, Pazos, de clave PO/19/054.06.
O obxecto do proxecto, cuxo ámbito de actuación se desenvolve no concello de Pontevedra, é definir, xustificar e valorar as obras necesarias para a mellora da intersección actual en cruz da estrada autonómica coas estradas provinciais EP-0003 e EP-0004, no p.q. 4+900 da PO-542. Para isto proxéctase a execución dunha rotonda con dous carrís, de largo 4,00 m cada un, 30 m de diámetro exterior (incluídas beiravías) e beiravías interior e exterior de 1,00 m, coa finalidade de:
• Mellorar a actual intersección en cruce.
• Reducir o número de xiros á esquerda do treito comprendido entre os p.q. 4+700 ao 5+600.
• Acadar unha diminución da velocidade no treito de estudo.
• Reordenar o espazo público no treito comprendido entre os p.q. 4+840 e 5+040.
No proxecto tense en conta tamén o itinerario peonil e ciclista previsto nas inmediacións da rotonda proxectada (entre os p.q. 4+840 e 5+040), e que se recolle no proxecto construtivo Fomento da mobilidade sustentable. Senda na PO-542. Treito: Pazos. p.q. 4+700-5+600, de clave PO/16/263.06, á hora de coordinar as distintas actuacións que se recollen en ambos os proxectos.
Considerando todo o exposto e o establecido na normativa vixente,
RESOLVO:
Primeiro. De acordo co establecido no artigo 21.1 da Lei 8/2013, do 28 de xuño, de estradas de Galicia, e no artigo 50 do Decreto 66/2016, do 26 de maio, polo que se aproba o Regulamento xeral de estradas de Galicia este documento sométese ao trámite de información pública durante un período de trinta días hábiles, contados a partir do seguinte ao da publicación deste anuncio no Diario Oficial Galicia, para que as persoas que o consideren oportuno poidan formular por escrito, ante a Axencia Galega de Infraestruturas, as observacións que crean convenientes relativas á concepción global do trazado deseñado.
Segundo. Simultaneamente ao trámite sinalado no parágrafo anterior, e para os efectos previstos no artigo 56.1 do Decreto do 26 de abril de 1957, polo que se aproba o Regulamento de expropiación forzosa, sométese a información pública a relación individual de bens, dereitos e propietarios afectados pola realización da obra correspondente, para que os afectados presenten cantas alegacións ou rectificacións consideren convenientes en canto aos bens e dereitos descritos na relación anexa.
Terceiro. A exposición ao público, para os efectos da presente resolución, realízase na Axencia Galega de Infraestruturas (San Caetano, s/n, 15781 Santiago de Compostela), no no Servizo de Infraestruturas de Pontevedra (avda. Mª Victoria Moreno, 43-1º, 36071 Pontevedra), e no Concello de Pontevedra (Michelena, 36002 Pontevedra). Así mesmo, na páxina web da Consellería de Infraestruturas e Mobilidade:
(https://infraestruturasemobilidade.xunta.gal/organizacion/c/CIV_Axencia_Galega_de_Infraestruturas), atópase á disposición dos interesados o documento de separata do proxecto de construción.
Santiago Compostela, 28 de novembro de 2019
Francisco Menéndez Iglesias
Director da Axencia Galega Infraestruturas
