Mediante a Orde da Consellería de Facenda do 13 de xuño de 2017 acordouse o alleamento dun inmoble no concello de Ferrol procedente dunha herdanza ab intestato.
Logo de publicarse o 14 de decembro de 2017 no Diario Oficial de Galicia número 236, e nun xornal de ampla difusión (La Voz de Galicia do mesmo día), o Anuncio do 24 de novembro de 2017, da Secretaría Xeral Técnica e do Patrimonio, de alleamento do citado inmoble, celebrouse o día 7 de febreiro de 2018 a primeira, segunda e terceira poxa pública.
Mediante Orde do 8 de marzo de 2018 acordouse declarar deserta a adxudicación do procedemento de alleamento mediante poxa pública do inmoble citado, en primeira, segunda e terceira poxa (DOG núm. 48, do 8 de marzo).
Logo de publicarse o 19 de xuño de 2019 no Diario Oficial de Galicia número 130, e nun xornal de ampla difusión (La Voz de Galicia do mesmo día), o Anuncio da Secretaría Xeral Técnica e do Patrimonio de alleamento do citado inmoble, celebrouse o 18 de setembro de 2019 a poxa pública anunciada, co que á vista da acta da mesa de contratación, de conformidade co disposto no artigo 70 do Decreto 50/1989, polo que se aproba o Regulamento para a execución da Lei do patrimonio da Comunidade Autónoma de Galicia, e tras a proposta da Secretaría Xeral Técnica e do Patrimonio,
DISPOÑO:
Primeiro
Aprobar a seguinte adxudicación:
A Hugo Antonio Jiménez Zamora (DNI 23924126D) polo prezo de vinte e un mil euros (21.000,00 €), en cuarta poxa o local descrito como:
Predio urbano. Letra B (fondo esquerda) da planta 11 do bloque 3 denominado Edificio 13, sito no polígono de Caranza, na avenida de Castelao, sen número, na cidade de Ferrol. Ocupa unha superficie útil de 72,50 m2 e está distribuído en vestíbulo, cociña, estar-comedor, tendedeiro, terraza, baño, aseo e 3 dormitorios. Linda fronte, vivenda A da mesma planta e relanzo de escaleiras; dereita, relanzo de escaleiras e despois ascensores; fondo, zona verde e despois parcela VI-N; esquerda, espazo libre. Libre de cargas. Inscrita no Rexistro da Propiedade de Ferrol como predio 47.615, tomo 1.531, libro 580, folio 140. Referencia catastral 4446303NJ6144N0046PO.
Segundo
O pagamento do prezo de adxudicación efectuarase segundo o estipulado no artigo 70.3 do Decreto 50/1989, do 9 de marzo, polo que se aproba o Regulamento para a execución da Lei de patrimonio.
Terceiro
A venda formalizarase como corpo certo en escritura pública e serán por conta do adquirente os custos do seu outorgamento. Os tributos derivados da transmisión serán exixidos conforme o disposto na lexislación tributaria. Así mesmo, queda a cargo do adxudicatario o pagamento dos custos dos anuncios que se teñan producido neste procedemento de alleamento.
Cuarto
Contra esta resolución, que pon fin á vía administrativa, poderase interpoñer recurso potestativo de reposición perante esta consellería no prazo dun mes, contado desde o día seguinte ao da súa publicación no Diario Oficial de Galicia, ou recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia, no prazo de dous meses.
Santiago de Compostela, 30 de outubro de 2019
O conselleiro de Facenda
P.D. (Orde do 9.1.2012; DOG núm. 9, do 13 de xaneiro)
Mª del Socorro Martín Hierro
Secretaria xeral técnica e do Patrimonio da Consellería de Facenda