O 16 de setembro de 2019 o director xeral de Desenvolvemento Rural ditou a seguinte resolución de modificación do acordo de concentración parcelaria da zona de Arca-Nigoi, sector Arca (A Estrada-Pontevedra):
O acordo de concentración parcelaria da zona de Arca-Nigoi, sector Arca (A Estrada-Pontevedra) foi aprobado pola dirección xeral competente na materia con data do 13 de xaneiro de 2012, encontrándose na actualidade pendente de declaración de firmeza.
Con posterioridade a estes actos, o Concello da Estrada solicitou a cesión da titularidade do predio nº 725 para destinalo a área recreativa.
Vista a proposta da xunta local da zona, a Lei de reforma e desenvolvemento agrario, do 12 de xaneiro de 1973; a disposición transitoria primeira da Lei 4/2015, do 17 de xuño, de mellora da estrutura territorial agraria de Galicia; a Lei 10/1985, do 14 de agosto, de concentración parcelaria para Galicia, modificada pola Lei 12/2001, do 10 de setembro; a Lei 39/2015, do 1 de outubro, do procedemento administrativo común das administracións públicas, e demais disposicións vixentes de aplicación ao caso.
Dado o destino para o que se solicita o referido predio, e respecto do que se entende que é perfectamente subsumible no suposto recollido no artigo 32 da antedita lei galega, esta dirección xeral
RESOLVE:
1. Modificar o acordo de concentración parcelaria da zona de Arca-Nigoi, sector Arca (A Estrada-Pontevedra), e adxudicar ao Concello da Estrada a titularidade do predio nº 725, que causa baixa no Fondo de terras da zona, para ser destinado a área recreativa.
Transcorridos cinco anos desde a cesión da propiedade sen que o predio fose destinado aos fins para os que é adxudicado, a titularidade do referido predio reverterá sobre o Fondo de terras da zona, o patrimonio da Comunidade Autónoma, a Axencia Galega de Desenvolvemento Rural (Agader) ou outra entidade que corresponda, segundo o caso.
2. Ordenar que á presente resolución se lle dea a oportuna publicidade, sen prexuízo da súa notificación ao Concello da Estrada.
Contra esta resolución, que non é definitiva na vía administrativa, poderase interpor recurso de alzada ante a persoa titular da Consellería do Medio Rural no prazo dun mes, que se contará desde o día seguinte ao da publicación desta resolución.
Pontevedra, 15 de outubro de 2019
Antonio Crespo Iglesias
Xefe territorial de Pontevedra