O Decreto 191/2011, do 22 de setembro, de organización e funcionamento dos rexistros da Administración xeral e das entidades públicas instrumentais da Comunidade Autónoma de Galicia (DOG núm. 196, do 13 de outubro), dispón no seu artigo 8.2 que a creación, modificación ou supresión das oficinas de rexistro auxiliares se fará mediante orde da consellería competente en materia de administracións públicas, por proposta da consellería ou entidade correspondente, logo de informe da Oficina de Rexistro Xeral.

No anexo I do Decreto 191/2011, do 22 de setembro, de organización e funcionamento dos rexistros da Administración xeral e das entidades públicas instrumentais da Comunidade Autónoma de Galicia, figura a listaxe inicial de oficinas de rexistro. A relación actualizada delas está á disposición da cidadanía no portal institucional www.xunta.gal, segundo o previsto na disposición adicional segunda dese decreto.

A Oficina de Rexistro Auxiliar do Centro de Atención ao Cidadán, dependente do Servizo de Rexistro e Atención á Cidadanía da Subdirección Xeral de Coordinación do Rexistro e Atención á Cidadanía, que pola súa vez depende da Secretaría Xeral Técnica da Vicepresidencia e Consellería de Presidencia, Administracións Públicas e Xustiza, está situada na rúa Dr. Teixeiro, 26, entreplanta, de Santiago de Compostela.

A dita oficina presenta unha serie de particularidades que fan conveniente o seu peche e a integración dos seus medios persoais e materiais no Rexistro Xeral, tanto polo número de entradas e o número e tipo de persoas usuarias como pola inadecuación do local para a prestación do servizo.

Tendo en conta o antedito, é conveniente a supresión do Rexistro Auxiliar do Centro de Atención ao Cidadán e a adscrición dos seus medios humanos e materiais ao Rexistro Xeral do Edificio Administrativo San Caetano.

Esta supresión faise tendo sempre en conta os principios de eficacia e economía que deben inspirar a actuación e a organización administrativa.

Polo exposto, e en uso das facultades que me confiren os artigos 34.6 e 38 da Lei 1/1983, do 22 de febreiro, reguladora da Xunta e da súa Presidencia,

DISPOÑO:

Artigo único

Suprímese o Rexistro Auxiliar do Centro de Atención ao Cidadán (rúa Dr. Teixeiro, 26, entreplanta, Santiago de Compostela) e adscríbense os seus medios humanos e materiais ao Rexistro Xeral do Edificio Administrativo San Caetano.

Disposición derradeira primeira

O establecido nesta orde non suporá incremento de gasto.

Disposición derradeira segunda

Esta orde entrará en vigor o mesmo día da súa publicación no Diario Oficial de Galicia.

Nesa mesma data actualizarase para a cidadanía a relación de oficinas de rexistro auxiliar, existente na páxina web institucional.

Santiago de Compostela, 7 de febreiro de 2019

Alfonso Rueda Valenzuela
Vicepresidente e conselleiro de Presidencia,
Administracións Públicas e Xustiza