Para os efectos previstos no artigo 54 da Lei 7/2012, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, o 3 de xuño 2018, en relación ao deslindamento parcial entre as comunidades de montes veciñais en man común de Freixo e Rebordechán, do concello de Crecente, ao respecto da estrema común dos seus montes.

Feitos:

Primeiro. A Lei 7/2012, do 28 de xuño, de montes de Galicia (DOG número 140, do 23 de xullo), na súa disposición derradeira segunda modifica o artigo 25 da Lei 13/1989, do 10 de outubro, de montes veciñais en man común e elimina a obriga da Administración forestal de proceder ao deslindamento e sinalización dos montes veciñais. Por tanto, esta competencia corresponde ás comunidades propietarias consonte os artigos 53 e 54 da Lei de montes de Galicia.

Segundo. Con data do 10.4.2014, as comunidades de montes veciñais en man común (en diante CCMMVMC) de Freixo e Rebordechán, ambas do concello de Crecente, achegan o expediente de deslindamento consonte o artigo 53 da Lei 7/2012, do 28 de xuño (DOG núm. 140, do 23 de xullo).

Terceiro. Con data do 13.10.2015 notifícase o requirimento da acta de conciliación levantada no xulgado de paz ou primera instancia correspondente. Con data do 9.2.2016, notifícase o requirimento do certificado do secretario da aprobación en asemblea xeral a ambas as comunidades.

Cuarto. A sentenza xudicial 163/10 do Xulgado de Primeira Instancia número 1 de Ponteareas do procedemento ordinario 420/2007, de deslindamento entre as CCMMVMC de Angudes e Rebordechán, considerada polo Xurado Provincial de Montes Veciñais en Man Común de Pontevedra o 3.10.2011, modifica a liña divisoria entre ambas as comunidades: «o trazado da liña que se inicia no marco situado na Cruz de Requiáns na que tamén conflúen as parroquias de Crecente e de Couto seguen en liña ata chegar ao nacente do regueiro de Chedeiro ou Riobó e desde aquí discorre a divisoria polo curso deste río ou regueiro ata o río Miño, onde remata o límite...».

A resolución dos montes Requiáns, Castelete e Repolín a favor dos veciños da parroquia de Freixo indica que estrema polo norte cos montes de Rebordechán.

A resolución dos montes Coutada, Pobanza e San Sebastián a favor dos veciños da parroquia de Rebordechán indica que linda polo sur cos montes de Angudes e Freixo.

Por todo o exposto, o único punto de condición de estremas entre as CCMMVMC de Freixo e de Rebordechán é no marco da Cruz de Requiáns, coas coordenadas ETRS 89 X:564.804,13 e Y:4.670.334,42.

Consideracións legais e técnicas:

Primeira. A Lei 7/2012, do 28 de xuño, de montes de Galicia, regula nos artigos 52 e 54 o procedemento de deslindamento de montes veciñais en man común e establece, entre outras, a obriga de publicar a resolución do Xurado no Diario Oficial de Galicia.

Segunda. Da documentación fornecida polas comunidades e do informe técnico do Servizo de Montes desta xefatura territorial conclúese que a avinza entre as CCMMVMC de Freixo e de Rebordechán é congruente coas respectivas resolucións de clasificación, coa sentenza 163/10 ditada polo Xulgado de Primeira Instancia número 1 de Ponteareas e coas estremas nelas descritas.

Revisada a liña de deslindamento presentada, a documentación achegada e o informe técnico do Servizo de Montes da xefatura territorial da Consellería do Medio Rural de Pontevedra, e en atención ao disposto nos artigos 53, 54 e na disposición transitoria décimo cuarta da Lei 7/2012, de montes de Galicia, este xurado provincial, por unanimidade dos seus membros,

ACORDA:

Primeiro. Aprobar o deslindamento parcial realizado entre as CCMMVMC de Freixo e Rebordechán, ao respecto da súa estrema común, nos termos indicados no antecedente de feito cuarto, e de acordo cos planos topográficos achegados e validados mediante o informe técnico do Servizo de Montes.

Segundo. Notificar este acordo ás comunidades propietarias afectadas e publicalo no Diario Oficial de Galicia para dar cumprimento ao disposto na Lei 7/2012, do 28 de xuño, de montes de Galicia.

Contra a presente resolución, que pon fin á vía administrativa, poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra no prazo de dous meses contados desde o día seguinte ao da súa publicación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e cos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 19 de xullo de 2018

Antonio Crespo Iglesias
Presidente do Xurado Provincial de Montes Veciñais
en Man Común de Pontevedra