Por Resolución do 26 de setembro de 2017, publicada no Diario Oficial de Galicia número 190, do 5 de outubro, aprobáronse os criterios e o procedemento para autorizar a ocupación de dominio público portuario con destino á celebración de espectáculos públicos ou actividades recreativas nos portos autonómicos da competencia deste organismo.
O 14 de xuño de 2018 entrou en vigor a Lei 6/2017, do 12 de decembro, de portos de Galicia, Diario Oficial de Galicia do 14 de decembro, que derroga a Lei 5/1994, do 29 de novembro, de creación de Portos de Galicia.
O 2 de xullo de 2018, entra en vigor a Lei 10/2017, do 27 de decembro, de espectáculos públicos e actividades recreativas de Galicia, publicada no Diario Oficial de Galicia do martes 2 de xaneiro de 2018.
Dada a entrada en vigor das dúas normas que se citan e a necesidade de adaptación da Resolución do 26 de setembro de 2017, por Resolución do 22 de xuño de 2018 o presidente de Portos de Galicia acordou a súa modificación.
A modificación da resolución non implica unha nova apertura do prazo de presentación de solicitudes, polo que se mantén o publicado no Diario Oficial de Galicia número 190, do 5 de outubro de 2017.
No sentido apuntado, para que a solicitude poida ser tida en conta, á marxe das excepcións previstas na resolución, deberá ser presentada no rexistro de Portos de Galicia coa anterioridade e por calquera dos medios recollidos nesa convocatoria, acompañada da documentación que se indica na condición sétima da resolución.
O texto íntegro da resolución, xunto cos seus anexos, atópase á disposición do público para seu exame desde as 9.00 ás 14.00 horas nas oficinas das zonas localizadas en Lugo, A Coruña e Pontevedra, e nos servizos centrais de Portos de Galicia ou na páxina web www.portosdegalicia.gal
Esta resolución será de aplicación a espectáculos ou eventos que se celebran a partir do día 2 de xullo de 2018 e que non conten con resolución de autorización outorgada en firme.
Contra a presente resolución, que esgota a vía administrativa, cabe interpor recurso contencioso-administrativo ante o Xulgado do Contencioso-Administrativo de Santiago de Compostela no prazo de dous (2) meses contado a partir do día seguinte ao da publicación da resolución.
Non obstante, os interesados poderán interpor contra esta resolución recurso potestativo de reposición nun prazo dun (1) mes contado a partir do día seguinte ao desta publicación, ante o mesmo órgano que a ditou, de acordo co disposto no artigo 123 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 22 de xuño de 2018
José Juan Durán Hermida
Presidente de Portos de Galicia