En cumprimento do sinalado na base sétima da Orde do 20 de maio de 2018 (Diario Oficial de Galicia, do 16 de abril) pola que se convoca o procedemento de acceso ao corpo de catedráticos de música e artes escénicas, nas especialidades vinculadas ás ensinanzas superiores de música, esta dirección xeral

RESOLVE:

Primeiro. Nomear o tribunal encargado da selección das persoas aspirantes no procedemento de acceso ao corpo de catedráticos de música e artes escénicas nas especialidades vinculadas ás ensinanzas superiores de música, coa seguinte composición:

Presidente:

– Gustavo Lorenzo Prozzo, funcionario de carreira do corpo de inspectores de Educación.

Vogais:

– Jesús María Risueño López, funcionario de carreira do corpo de inspectores de Educación.

– Fernando Fernández Fraga, funcionario de carreira do corpo de inspectores de Educación.

– Martín Manuel Leránoz Iglesias, profesor titular da Universidade de Santiago de Compostela.

– Marco Lucato, profesor titular da Universidade de Vigo.

Logo da convocatoria do presidente ou presidenta constituirase o tribunal no prazo máximo de cinco días desde a súa publicación no Diario Oficial de Galicia, sendo precisa a asistencia do presidente ou da presidenta titular e de, polo menos, tres vogais.

Na citada sesión acordarán todas as decisións que lles correspondan para o correcto desenvolvemento do procedemento selectivo.

Actuará como secretario ou secretaria o/a vogal con menor antigüidade no corpo, agás que o tribunal acorde determinalo doutra maneira.

Segundo. As persoas membros do tribunal absteranse de intervir de concorrer algunha das circunstancias sinaladas no artigo 23 da Lei 40/2015, do 1 de outubro, de réxime xurídico do sector público. Do mesmo xeito, de acordo co artigo 8.4 do Real decreto 276/2007, do 23 de febreiro, modificado polo Real decreto 84/2018, do 23 de febreiro, deberán absterse de actuar aquelas persoas membros que realizasen tarefas de preparación de aspirantes aos procedementos selectivos para o mesmo corpo e especialidade, nos cinco anos anteriores a esta publicación.

Así mesmo, as persoas aspirantes poderán recusar as persoas membros do tribunal cando concorran as circunstancias previstas no parágrafo anterior, de acordo co artigo 24 da Lei 40/2015, do 1 de outubro.

Terceiro. Para os efectos previstos no artigo 26.2 do Decreto 144/2001, do 7 de xuño (DOG do 25 de xuño), modificado polo Decreto 144/2008, do 26 de xuño (DOG do 18 de xullo), e polo Decreto 96/2011, do 5 de maio (DOG do 30 de maio, corrección de erros do 1 de xuño), este tribunal considérase incluído na categoría primeira.

O tribunal terá dereito ás indemnizacións por razón do servizo previstas na normativa vixente. Os medios de locomoción usados serán calquera dos previstos no citado Decreto 144/2001, do 7 de xuño, e deberá entenderse que queda expresamente autorizado o uso de vehículos propios, de acordo co citado decreto.

Santiago de Compostela, 18 de maio de 2018

José Manuel Pinal Rodríguez
Director xeral de Centros e Recursos Humanos