Visto o expediente de cambio de titularidade da granxa mariña que Aquacría Arousa, S.L.U. ten no lugar de Bico da Ran, Castrelo, Cambados (Pontevedra), resulta:

a) Antecedentes.

Primeiro. Mediante escrito do 28 de novembro de 2016, Salvador Ortiz de Montellano (X7724146X) en nome e representación de Aquacría Arousa, S.L.U. (B36296945), solicitou autorización para transmisión da granxa mariña situada no lugar de Bico da Ran, Castrelo, Cambados (Pontevedra).

Segundo. Mediante a Orde do 30 de maio de 2017 autorízase a transmisión inter vivos do permiso de actividade e concesión dun establecemento de cultivos mariños na cal figura como nova titular a entidade Sea 8 Porto, S.L.

Terceiro. O 20 de xullo de 2017, Jaime León Santamaría, en nome e representación de Aquacría Arousa, S.L.U., presenta un recurso de reposición contra a citada orde.

Cuarto. O 21 de decembro de 2017 a Consellería do Mar estima o recurso presentado e ordena a modificación do titular da concesión que debe ser Aquacría Arousa, S.L.U. e cuxas participacións sociais son titularidade de Sea 8 Porto, S.L. (B98389141).

b) Consideracións legais e técnicas.

Primeira. Este órgano é competente para resolver o expediente de conformidade coa Lei 11/2008, do 3 de decembro, de pesca de Galicia (DOG núm. 243, do 16 de decembro), modificada pola Lei 6/2009, do 11 de decembro (DOG núm. 243, do 15 de decembro); e coa Orde do 8 de setembro de 2017, de delegación de competencias na Secretaría Xeral Técnica da Consellería do Mar, nas direccións xerais e xefaturas territoriais e na presidencia do Consello de Administración do ente público Portos de Galicia.

Segunda. O expediente seguiu todos os trámites establecidos no procedemento administrativo común, coas especialidades previstas no Decreto 274/2003, do 4 de xuño, polo que se regula o procedemento de obtención do permiso e concesión de actividade para os establecementos de acuicultura e auxiliares de acuicultura na zona terrestre (DOG núm. 110, do 9 de xuño).

Vistas as disposicións citadas, o artigo 88 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), e demais normas de xeral e pertinente aplicación, esta consellería resolve:

Autorizar a transmisión inter vivos, a favor de Aquacría Arousa, S.L.U., e cuxas participacións sociais son titularidade de Sea 8 Porto, S.L. (B98389141), do permiso de actividade e concesión administrativa do establecemento que se indica a continuación:

Identificación:

Tipo: granxa mariña.

Nome: Aquacría Arousa, S.L.U.

Localización: Bico da Ran. Castrelo, Cambados (Pontevedra).

Data de outorgamento do permiso de actividade: 16.4.1998 (DOG núm. 93, do 18 de maio).

Vixencia: 18.5.2018.

Superficie de dominio privado: 13.023 m2.

Superficie de dominio público marítimo terrestre: 1.105 m2.

Actual titular: Aquacría Arousa, S.L.U. (B36296945).

Nova titular: Aquacría Arousa, S.L.U. (B36296945), cuxas participacións sociais son titularidade de Sea 8 Porto, S.L. (B98389141).

Baixo as seguintes condicións:

Primeira. A actual titular deberá presentar (en caso de non telo presentado tras a publicación da Orde do 30 de maio de 2017) no prazo máximo dun mes, contado desde o día seguinte ao da publicación desta resolución no Diario Oficial de Galicia, orixinal ou fotocopia cotexada da seguinte documentación:

a) Documento notarial da transmisión ou doazón.

b) Solicitude ou carta de pagamento do imposto de transmisións patrimoniais ou documento de sucesións.

Segunda. Transcorrido o prazo indicado na condición primeira sen ter presentado a documentación requirida, a autorización quedará sen efecto, logo de comunicación por parte da consellería.

Terceira. A nova titular do permiso de actividade e da concesión queda subrogada nos dereitos e obrigas do anterior, desde o momento de formalización da compravenda en escritura pública.

Contra esta resolución, que esgota a vía administrativa, poderase interpoñer recurso potestativo de reposición no prazo dun mes ante a conselleira do Mar, ou recurso contencioso-administrativo, ante a xurisdición contencioso-administrativa, no prazo de dous meses, contados en ambos os dous casos desde o día seguinte ao da súa publicación, de conformidade co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro) e o artigo 46.1 da Lei 29/1998, do 13 de xullo, reguladora da xurisdición contencioso-administrativa.

Vigo, 1 de marzo de 2018

A conselleira do Mar
P.D. (Orde 8.9.2017)
Sonia Lorenzo Santos
Jefa territorial de Vigo