O Pleno da Corporación, en sesión que tivo lugar o día 8 de febreiro de 2018 acordou:

Primeiro. Derrogar por innecesarios segundo se recolle nos informes emitidos tanto pola Dirección Xeral de Administración Local, como polo xefe do Servizo de Urbanismo e o asesor xurídico do Concello, os acordos adoptados nos plenos do 20.6.2012 e 20.6.2017 sobre cambio de uso de predios destinados a centro de saúde, sendo que a cualificación urbanística outorgada polas normas subsidiarias municipais vixentes, permite a implantación do uso sanitario pretendido, polo que nada obsta o outorgamento de licenza municipal directa para a construción do centro de saúde nas parcelas referidas, ao estar expresamente recoñecido o uso sanitario no artigo 171 das mesmas NNSS relativo ao sistema de equipamentos comunitarios, como equipamento socio-asistencial.

Segundo. Esta derrogación terá efectos «ex tunc», como se nunca se adoptasen os ditos acordos e entrará de novo en vigor a normativa das normas subsidiarias vixente ata o momento de adoptarse os acordos.

Terceiro. Estes acordos deberán remitirse á consellería competente en materia de urbanismo e ordenación do territorio e deberán publicarse no Diario Oficial de Galicia e no BOP, e fará constar no anuncio a remisión á consellería. Tamén se dará traslado deste acordo e do actuado ao Servizo de Urbanismo.

Cuarto. Facultar a alcaldía para a execución de cantos trámites sexan necesarios en dereito para a execución destes acordos e para levar a cabo todos os trámites necesarios para a agrupación dos predios e a súa posterior cesión á Xunta de Galicia para a construción do centro de saúde.

Melide, 21 de febreiro de 2018

Dalia García Couso
Alcaldesa