O artigo 28.2 da Constitución española recoñece, como dereito fundamental da persoa, o dereito á folga.

O exercicio deste dereito na Administración e nas empresas, entidades e institucións públicas ou privadas, que presten servizos públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ao mantemento dos servizos esenciais fixados no artigo 2 do Decreto 155/1988, do 9 de xuño (DOG nº 116, do 20 de xuño), entre os que se atopa a sanidade.

O exercicio público da prestación da asistencia sanitaria non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación con este.

O artigo 3 do citado decreto faculta os conselleiros ou conselleiras competentes, por razón dos servizos esenciais afectados, para que, mediante orde e diante de cada situación de folga, decidan o mínimo de actividade necesaria para asegurar o mantemento de tales servizos, así como para determinar o persoal necesario para a súa prestación.

O persoal enfermeiro que presta servizos como perfusionista no Complexo Hospitalario Universitario de Santiago de Compostela comunicou a convocatoria dunha folga que se desenvolverá entre as 8.00 horas do luns 16 de outubro e as 15.00 horas do venres 20 de outubro.

Unha vez outorgada audiencia ao comité de folga,

DISPOÑO:

Artigo 1

A folga referida entenderase condicionada ao mantemento dos servizos mínimos que se dispoñen nesta orde, os cales resultan totalmente imprescindibles para manter a axeitada cobertura do servizo esencial de asistencia sanitaria, para os efectos de evitar que se produzan graves prexuízos á cidadanía.

Para a fixación dos servizos mínimos atendeuse ao seguinte criterio reitor de carácter xeral: persoal necesario para a cobertura do 100 % da actividade urxente e intervencións cirúrxicas inaprazables.

Con base nese criterio, o número mínimo de efectivos que deberá prestar servizos nos días da folga será o seguinte: 1 profesional das 8.00 ás 15.00 horas; 1 profesional, localizable, das 15.00 ás 8.00 horas.

A súa xustificación debe constar no expediente de determinación de servizos mínimos e exteriorizarse axeitadamente para xeral coñecemento do persoal afectado, e quedará constancia no expediente dos factores ou criterios cuxa ponderación conduce a determinar eses efectivos mínimos.

Artigo 2

O persoal necesario para a cobertura dos servizos mínimos deberá ser publicado nos taboleiros de anuncios, polo menos con 48 horas de antelación.

A designación nominal como servizo mínimo, que deberá recaer nos/as profesionais de xeito rotatorio, será realizada pola xerencia e notificada ás persoas designadas.

O persoal designado como servizo mínimo que desexe exercer o seu dereito de folga poderá instar a substitución da súa designación pola doutro/a profesional que, voluntariamente, acepte o cambio de xeito expreso.

Artigo 3

Os paros e alteracións no traballo por parte do persoal necesario para o mantemento dos servizos mínimos determinados serán considerados ilegais para os efectos do establecido no artigo 16 do Real decreto lei 17/1977, do 4 de marzo (BOE nº 58, do 9 de marzo).

Artigo 4

O disposto nos artigos anteriores non significará ningún tipo de limitación dos dereitos que a normativa reguladora da folga recoñece ao persoal nesta situación, nin tampouco sobre a tramitación e efectos das peticións que a motiven.

Disposición derradeira

Esta orde producirá efectos e entrará en vigor o mesmo día da súa publicación no Diario Oficial de Galicia.

Santiago de Compostela, 10 de outubro de 2017

Jesús Vázquez Almuíña
Conselleiro de Sanidade