En cumprimento do establecido na base décima da Resolución do 27 de xaneiro de 2017 (DOG núm. 36, do 18 de abril), faise pública a Resolución do 5 de xuño de 2017 da concesión dunha bolsa de formación en estudos relacionados co dereito administrativo:

Resolución do 5 de xuño de 2017 pola que se adxudica a bolsa de formación en dereito administrativo (PR770F).

Feitos.

1. A Escola Galega de Administración Pública (en diante, EGAP) convocou, mediante a Resolución do 27 de xaneiro de 2017 (DOG núm. 36, do 18 de abril), unha bolsa de formación en estudos relacionados co dereito administrativo, e concedeu un prazo dun mes para que as persoas interesadas presentasen as súas solicitudes.

2. Mediante a Resolución da directora da EGAP do 5 de abril de 2017 nomeáronse as persoas integrantes da comisión de avaliación.

3. Terminado o prazo de presentación de instancias e emendadas as deficiencias observadas na documentación achegada polas persoas solicitantes, a antedita comisión reuniuse para avaliar os seus méritos.

Logo de ser realizada a dita avaliación, publicouse na web da EGAP http://egap.xunta.gal e no seu taboleiro de anuncios a listaxe provisional de posibles bolseiros/as coas puntuacións obtidas e concedeuse un prazo de tres días para presentar alegacións. Contra a dita listaxe non se formulou alegación ningunha.

4. O día 22 de maio de 2017, a comisión de avaliación entrevistou a aquelas persoas candidatas que acadaron a puntuación mínima establecida na avaliación de méritos e que se presentaron a ela.

Como consecuencia das ditas entrevistas, o día 29 de maio de 2017, a comisión eleva á directora da EGAP unha proposta de concesión para a designación de Alejandro Villanueva Turnes como titular da bolsa.

Consideracións legais e técnicas.

Primeira. A competencia para ditar esta resolución correspóndelle á directora da EGAP, segundo o establecido na base décima da convocatoria.

Segunda. De acordo co establecido na base novena da convocatoria, a comisión de avaliación examinou e valorou os méritos, realizou a entrevista das persoas candidatas e concluíu que a persoa con maior puntuación da bolsa é Alejandro Villanueva Turnes, que obtivo un total de 21,09 puntos.

Esta conclusión foi recollida na proposta que elevou a directora da EGAP, de conformidade co exixido pola base décima da convocatoria.

Polo exposto e examinada a proposta da comisión para a súa adxudicación,

RESOLVO:

1º. Adxudicar a bolsa de referencia a Alejandro Villanueva Turnes por ser o candidato as cal lle corresponde por orde de puntuación. A efectividade da bolsa recoñecida será desde a data da súa incorporación ata o 31 de decembro de 2017.

2º. Lembrarlle ao beneficiario que, de acordo co disposto pola base décimo primeira da convocatoria, unha vez recibida a notificación desta resolución de concesión da bolsa, disporá dun prazo de dez días para comunicar á EGAP a súa aceptación ou renuncia á bolsa. Transcorrido este prazo sen que se producise manifestación expresa pola súa parte, entenderase tacitamente aceptada, segundo o establecido no artigo 21.5 da Lei 9/2007, do 13 de xuño, de subvencións de Galicia.

3º. Lembrarlle ao beneficiario que, de acordo co disposto na base décimo primeira da convocatoria, no prazo de cinco días contados desde a aceptación expresa da bolsa ou do transcurso do prazo para entendela tacitamente aceptada, deberá incorporarse ao desempeño da bolsa na EGAP. No caso de que o beneficiario non se incorporase neste prazo ou que renunciase expresamente, perderá os dereitos inherentes á bolsa.

Contra esta resolución poderase interpoñer, con carácter potestativo, recurso de reposición ante a directora da EGAP, no prazo dun mes contado desde o día seguinte ao da publicación da resolución, nos termos dos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou, directamente, recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses contados desde o día seguinte ao da publicación da resolución, de conformidade co establecido no artigo 46.4 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 6 de xuño de 2017

Sonia Rodríguez-Campos González
Directora da Escola Galega de Administración Pública