Antecedentes:
Con data do 9 de novembro de 2016 aprobouse provisionalmente, por resolución da dirección da Axencia Galega de Infraestruturas, o proxecto de construción: itinerario peonil e ciclista na AC-543. Treito: urbanización Monte Devesa- Aldea Buio (p.q. 10+160-10+870), de clave AC/16/088.06.
Con data do 28 de novembro de 2016 publicouse no Diario Oficial de Galicia (núm. 227) o Anuncio do 14 de novembro de 2016 polo que se somete ao trámite de información pública o proxecto de construción: itinerario peonil e ciclista na AC-543. Treito: urbanización Monte Devesa- Aldea Buio (p.q. 10+160-10+870), de clave AC/16/088.06, así como a relación individual de bens, dereitos e propietarios afectados polo proxecto referenciado.
Posteriormente, e tras a análise dos informes e certificacións presentadas, o 2 de febreiro de 2017 se aproba o expediente de información pública e definitivamente o proxecto de construción: itinerario peonil e ciclista na AC-543. Treito: urbanización Monte Devesa- Aldea Buio (p.q. 10+160-10+870), de clave AC/16/088.06.
Este proxecto de construción ten por obxecto a execución dun itinerario mixto (peonil e ciclista) na marxe dereita da estrada AC-543 coa finalidade de comunicar a aldea de Buio e a urbanización de Monte Devesa, constituíndo así un itinerario continuo entre ambas as poboacións, ao mesmo tempo que se favorece a seguridade vial no contorno da estrada AC-543.
O itinerario considerado está deseñado en toda a súa lonxitude (710 m) para albergar un largo de 3,15 m, distribuídos do seguinte xeito: zona destinada ao tránsito peonil e ciclista de largo mínimo 1,8 m, e separador vexetal de 90 cm de largo delimitado por dous bordos de formigón (de aproximadamente 22 cm de largo).
As obras previstas comprenden tamén as seguintes actuacións complementarias á execución da senda, e que son necesarias para garantir a súa funcionalidade:
– Reposición e ampliación da drenaxe existente. Execución de foxas para dar continuidade á drenaxe lonxitudinal.
– Realización dun prisma de servizos para futuras canalizacións.
– Reposición da sinalización horizontal. Mellora e recuamento da sinalización vertical.
– Colocación de proteccións peonís e reposición dos sistemas de contención e balizamentos.
– Reposición dos servizos públicos e privados afectados polas obras.
A competencia para a execución da expropiación forzosa, no ámbito das estradas non incorporadas á rede do Estado, con itinerarios que se desenvolvan integramente no seu territorio, correspóndelle á Comunidade Autónoma de Galicia, ao abeiro do punto dous do artigo 28 do Estatuto de autonomía de Galicia, aprobado pola Lei orgánica 1/1981, do 6 de abril.
Correspóndelle ao Consello da Xunta de Galicia, como órgano equivalente ao Consello de Ministros, no ámbito da Administración autonómica, o recoñecemento concreto da utilidade pública e a declaración da urxente ocupación dos bens afectados pola expropiación a que dá lugar a realización da obra, segundo o previsto nos artigos 10 e 52 da Lei do 16 de decembro de 1954, de expropiación forzosa.
Na súa virtude, por proposta da conselleira de Infraestruturas e Vivenda e logo da deliberación do Consello da Xunta de Galicia, na súa reunión do día dous de marzo de dous mil dezasete,
DISPOÑO:
Artigo único
Declarar, en concreto, a utilidade pública e a necesidade de urxente ocupación para os efectos de expropiación forzosa, dos bens e dereitos que se concretan no expediente administrativo instruído, así como en calquera das modificacións que sexa necesario realizar para a execución do proxecto de construción: itinerario peonil e ciclista na AC-543. Treito: urbanización Monte Devesa-Aldea Buio (p.q. 10+160-10+870), de clave AC/16/088.06.
Santiago de Compostela, dous de marzo de dous mil dezasete
Alberto Núñez Feijóo
Presidente
Ethel Mª Vázquez Mourelle
Conselleira de Infraestruturas e Vivenda