O Pleno da Corporación, en sesión do 27 de xaneiro de 2017, adoptou o seguinte acordo:
Primeiro. Prestar aprobación, con carácter definitivo, ao documento refundido do «Proxecto de modificación puntual con ordenación detallada do vixente Plan xeral de ordenación urbana de Pontevedra, para o solo urbanizable A-1.2» no Vao-Campañó; redactado polos arquitectos Eugenio Jiménez Passolas, Gustavo Pérez Álvarez e Amador Rey Camiño, e datado en decembro de 2016.
Segundo. Dispor a publicación do anuncio do acordo de aprobación definitiva no Diario Oficial de Galicia, con indicación expresa de que o contido íntegro do Plan estará a disposición do público na sede electrónica do Concello de Pontevedra www.sede.pontevedra.gal
Unha vez publicado anuncio no DOG o instrumento de planeamento aprobado será inscrito no Rexistro de Planeamento Urbanístico de Galicia, por petición deste concello para o que se remitirá un exemplar en soporte dixital, debidamente dilixenciado pola Secretaría do Pleno.
O documento que conteña a normativa e as ordenanzas, ademais de na sede electrónica, será obxecto de publicación, unha vez recibido o certificado de inscrición no Rexistro do Instrumento de Planeamento, no Boletín Oficial da provincia de Pontevedra para lograr a súa eficacia e executividade, consonte ao establecido na lexislación de réxime local, concretamente artigos 70.2, 70 ter e 65 da Lei reguladora das bases do réxime local.
Incorporaranse ás normas e ordenanzas os informes sectoriais emitidos, e farase constar expresamente na publicación que a viabilidade do desenvolvemento e ulterior execución xurídica e habilitación das obras quedará condicionada á aprobación da permuta de terreos en tramitación pola Delegación de Economía e Facenda de Pontevedra e a posterior elevación a escritura pública e construción do muro que se converterá na aresta exterior da explanación da autoestrada.
Terceiro. Notificar este acordo individualmente, con ofrecemento dos recursos procedentes, á entidade mercantil Inmobiliaria Ponteno, S.L.U., así como a todas aquelas persoas titulares catastrais dos terreos afectados, ás cales xa se lles tivese notificado a aprobación inicial e aos demais que figuren como interesados no expediente. Notificar, así mesmo, o presente acto, á entidade entidade mercantil Bricoking, S.A., a quen se lle remitirá tamén, como resposta razoada, copia dos informes que serviron de base ou motivación á aprobación provisional do 2.3.2015 con parcial estimación das alegacións formuladas, xunto con copia dos posteriores acordos de aprobación provisional.
Contra este acordo poderá interporse recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de 2 meses contado desde o día seguinte ao da súa publicación (artigos 10 e 46 da Lei 29/1998). Isto sen prexuízo de interpor calquera outro recurso que se entenda máis procedente e sexa conforme a dereito.
Pontevedra, 10 de febreiro de 2017
O alcalde
P.S.
José Carlos Castiñeira Piñeiro
Secretario xeral do Pleno