O actual regulamento da indicación xeográfica protexida Pataca de Galicia e do seu Consello Regulador foi aprobado mediante a Orde da Consellería do Medio Rural do 26 de xullo de 2010 (DOG nº 144, do 29 de xullo).
Desde a citada data tense producido unha importante variación no número de inscritos e no peso relativo de cada unha das subzonas de produción que configuran a citada indicación xeográfica, circunstancia que moveu ao Pleno do Consello Regulador a aprobar o pasado día 28 de novembro unha modificación puntual do citado Regulamento que afecta o seu artigo 42.
Esta modificación limítase ao ámbito organizativo do Consello Regulador e non afecta ningún requisito dos que figuran no prego de condicións co que esta indicación xeográfica está inscrita no Rexistro Europeo de Denominacións de Orixe e Indicacións Xeográficas Protexidas.
Polo tanto, unha vez analizada a documentación presentada polo Consello Regulador e tendo en conta o disposto no artigo 11 da Lei 2/2005, do 18 de febreiro, de promoción e defensa da calidade alimentaria galega e no artigo 4 do Decreto 4/2007, do 18 de xaneiro, polo que se regulan as denominacións xeográficas de calidade do sector alimentario e os seus consellos reguladores,
DISPOÑO:
Artigo único. Modificación do Anexo da Orde do 26 de xullo de 2010 polo que se aproba o Regulamento da indicación xeográfica protexida Pataca de Galicia
Modifícase a alínea 1 do artigo 42 do Regulamento da indicación xeográfica protexida Pataca de Galicia e do seu Consello Regulador, aprobado mediante a Orde do 26 de xullo de 2010 (DOG nº 144, do 29 de xullo), que queda redactada do seguinte xeito:
«1. O Pleno está constituído por:
a) Seis vogais en representación do sector produtor, elixidos democraticamente por e entre os titulares de parcelas de cultivo inscritas no Rexistro de Plantacións, sen que ningunha das subzonas poida ter unha representación superior ao 70 %.
b) Seis vogais en representación do sector industrial, elixidos democraticamente por e entre os titulares de instalacións de almacenaxe e envasamento inscritas no Rexistro de Almacéns e Plantas Envasadoras, sen que ningunha das subzonas poida ter unha representación superior ao 70 %».
Disposición derradeira única. Entrada en vigor
A presente Orde entrará en vigor o día seguinte ao da súa publicación no Diario Oficial de Galicia.
Santiago de Compostela, 13 de febreiro 2017
Ángeles Vázquez Mejuto
Conselleira do Medio Rural