Na vila de Ponteareas o 2 de agosto de 2016,

Comparecen:

– Dunha parte, Xosé Represas Giráldez, alcalde-presidente do Concello de Ponteareas, maior de idade e veciño de Ponteareas, facultado neste acto polo Pleno da Corporación en Acordo adoptado na sesión do 19 de xullo de 2016.

– Doutra parte, José Manuel Lorenzo Varela, maior de idade, casado e veciño de Ponteareas (Pontevedra), con domicilio na parroquia de Xinzo, A Cividá, 1, provisto de DNI nº 76904877-F, que actúa na súa condición de presidente da Comunidade de Montes Veciñais en Man Común de Xinzo segundo resulta da acta da asemblea da dita comunidade.

Ambos actúan en nome e representación do Concello de Ponteareas e da Comunidade de Montes Veciñais en Man Común de Xinzo e

Expoñen:

Primeiro. Que o Concello de Ponteareas, en sesión plenaria da Corporación do 2 de febreiro de 2016 aprobou provisionalmente o seu Plan xeral de ordenación municipal, no cal se contén unha ficha que abarca o ámbito de solo de núcleo rural común denominado A Portela para o cal se prevé un desenvolvemento urbanístico a través dun Plan especial de ordenación do núcleo rural nº 1; o sistema de actuación é o de cooperación e a iniciativa pública e nel prevense unha serie de cesións a favor do concello.

Achéganse a ficha de planeamento citada e o plano de localización do polígono incluído no seu ámbito.

Segundo. Pola súa banda, a Comunidade de Montes Veciñais en Man Común de Xinzo é propietaria dunha serie de terreos que se atopan na súa maior parte dentro do ambito do plan especial referido no punto anterior. Únese o plano de situación dos ditos terreos.

Terceiro. Co fin de desenvolver tal ámbito, dada a súa iniciativa pública, corresponde ao Concello a redacción do plan especial en cuestión e a súa aprobación, así como a posterior xestión e execución tendo en conta a distribución de cargas e beneficios entre os propietarios.

Cuarto. Por outra banda, ao estar nas proximidades do ámbito en cuestión o Centro Cultural de Xinzo, en que anualmente se celebran na época estival as súas festas, e ao ser necesario que o Concello proceda ao adecentamento dun terreo próximo, propiedade da comunidade de montes citada e incluído no ámbito en cuestión, sendo as actuacións a levar a cabo a súa explanación para destinalo a aparcadoiro, o Concello de Ponteareas e a Comunidade de Montes teñen decidiron asinar o presente convenio de execucion do planeamento, ao abeiro do disposto nos artigos 2.3 e 17 da Lei do solo de Galicia conforme as seguintes

Estipulacións:

I. Co fin de obter de xeito anticipado a cesión de uso dunha parte do terreo propiedade da Comunidade de Montes de Xinzo, situado no ámbito do Plan especial de ordenación de núcleo rural nº 1, cuxa superficie e localización quedarán pendentes de determinar, a Comunidade de Montes, por medio deste anuncio, e o abeiro da autorización conferida pola súa asemblea celebrada o día 2 de xullo de 2016, cede ao Concello de Ponteareas o uso da parcela que no seu momento se concretará pero que está situada dentro dos planos que se achegan para os únicos e exclusivos efectos de levar a cabo sobre tal terreo as actuacións derivadas do desenvolvemento, xestión e execución do plan especial descrito no expositivo primeiro do presente documento.

Sen prexuízo do anterior, a Comunidade de Montes poderá utilizar e desfrutar do terreo obxecto de cesión, logo de autorización do Concello, para poder destinalo a aqueles fins que non sexan incompatibles coas actuacións que vai levar a cabo o Concello nin as limiten ou prexudiquen.

II. O Concello, a cambio de tal cesión de uso, comprométese a realizar as obras de adecentamento, consistentes na súa explanación mediante os movementos de terra precisos, obra que realizará contratando unha empresa especializada neses labores.

III. Pola súa vez, dado que o Concello de Ponteareas vai contratar proximamente a redacción do plan especial citado no expoñendo primeiro, e unha vez aprobado definitivamente, vai proceder a executar as pertinentes obras de urbanización por estar prevista a iniciativa pública do ámbito, e por iso, en contraprestación de tal labor económico, a Comunidade de Montes comprométese a entregar ao Concello de Ponteareas tamén unha parcela dentro do ámbito do PEONR nº 1, de superficie e localización que se concretarán, ademais das que lle corresponden ao Concello polas cesións obrigatorias establecidas na correspondente ficha anexa, parcela que o Concello destinará, en todo caso, a un uso dotacional múltiple.

IV. Este convenio non supón ningunha alteración, modificación ou dispensa do planeamento.

V. Este convenio resolverase se non se aproba definitivamente o Plan xeral de ordenación municipal e, consecuentemente, o Plan especial de ordenación de núcleo rural nº 1 referido no expositivo primeiro deste documento.

Do mesmo xeito, se finalmente non se aproba definitivamente o Plan xeral de núcleo rural, a cesión de uso formalizada no presente documento quedará automaticamente sen efecto, sen que a Comunidade lle teña que satisfacer ao Concello ningunha compensación polas obras de adecentamento sinaladas na estipulación segunda do presente documento.

VI. Unha vez aprobados o Plan xeral de ordenación municipal e o plan especial de ordenación, as partes comprométense a subscribir un novo convenio no cal se determinarán as condicións do desenvolvemento, xestión e execución do plan e se concretará a parcela que percibirá o Concello como contraprestación pola execución das obras de urbanización referida na estipulación terceira deste documento.

En proba de conformidade, asinan os contratantes este convenio por duplicado exemplar e para un só efecto no lugar e na data indicados.

Xosé Represas Giráldez Alcalde

José Manuel Lorenzo Varela Presidente da Comunidade de Montes Veciñais en Man Común de Xinzo