O artigo 28.2 da Constitución española recoñece o dereito á folga como dereito fundamental da persoa.

O exercicio deste dereito na Administración e nas empresas, entidades e institucións públicas ou privadas que presten servizos públicos ou de recoñecida e inaprazable necesidade está condicionado ao mantemento dos servizos esenciais fixados no artigo 2 do Decreto 155/1988, do 9 de xuño (DOG núm. 116, do 20 de xuño), entre os cales se encontra a sanidade.

O exercicio público da prestación da asistencia sanitaria e das funcións en materia de saúde pública non se pode ver afectado gravemente polo lexítimo exercicio do dereito de folga, xa que aquel é considerado e recoñecido prioritariamente con relación a este.

O artigo 3 do citado decreto faculta os conselleiros e conselleiras competentes por razón dos servizos esenciais afectados para que, mediante orde e diante de cada situación de folga, decidan o mínimo de actividade necesaria para asegurar o mantemento de tales servizos, así como para determinar o persoal necesario para a súa prestación.

A Confederación Intersindical Galega (CIG) convocou unha folga que afectará o persoal da empresa Tecnocom Telecomunicaciones y Energía, S.A., contratado para quendas, que presta o servizo de atención 24×7 baseado en help-desk no seu centro de traballo de Conxo, en Santiago de Compostela. A folga levarase a efecto con carácter indefinido desde a fin de semana do 23 de setembro, nas quendas existentes desde as 22.30 horas de todos os venres ata as 23.00 horas de todos os domingos.

A dita empresa presta servizos de soporte a usuarios/as dos sistemas e tecnoloxías da información do Servizo Galego de Saúde e da Consellería de Sanidade que traballan no ámbito dos servizos administrativos, da asistencia sanitaria e da protección da saúde pública.

A folga terá efectos con carácter indefinido todas as fins de semana, períodos en que, nun ámbito como o sanitario (caracterizado por prestar asistencia continuada as 24 horas os 365 días do ano) ten lugar unha actividade de singular cualificación, nomeadamente a atención urxente nos puntos de atención continuada e nos dispositivos asistenciais habilitados para o efecto, ademais de diversas tarefas relevantes no ámbito da saúde pública (por mor de determinados establecementos que desenvolven a súa actividade nas fins de semana).

Nun sistema sanitario en que o emprego dos sistemas e das tecnoloxías da información resulta preponderante, de non se prestaren axeitadamente estes servizos quedaría, pola súa vez, afectada a actividade sanitaria dispensada polos/as usuarios/as.

Toda vez que a dirección e o control da actividade do persoal (e, polo tanto, a determinación dos horarios e a distribución do tempo de traballo, incluída a fixación de quendas) corresponden á empresa, nesta orde óptase, en primeiro lugar, por fixar un número de efectivos de persoal que, como mínimo, deberá necesariamente prestar servizos no tramo horario afectado pola folga. En segundo lugar, e para o suposto de que sexa preciso recorrer a persoal chamado á folga para a garantía dese número mínimo de efectivos, determínase a actividade mínima necesaria que debe desenvolver este persoal.

Unha vez outorgada audiencia ao comité de folga,

DISPOÑO:

Artigo 1

A convocatoria da folga referida enténdese condicionada ao mantemento dos servizos mínimos que se dispoñen nesta orde, os cales resultan totalmente imprescindibles para manter a axeitada cobertura dos servizos esenciais de asistencia sanitaria e de determinadas funcións en materia de saúde pública, para os efectos de evitar que se lle produzan graves prexuízos á cidadanía que, respectando o exercicio do dereito á folga, baixo ningún concepto pode quedar desasistida polas características do servizo dispensado.

Atendendo aos motivos anteriormente expostos, determínase en 1 o número mínimo de efectivos que deberán prestar servizos no centro de traballo, días e tramo horario afectados pola folga.

No suposto de que a empresa deba recorrer a persoal chamado á folga para garantir ese número de efectivos, este atenderá como servizo mínimo esencial as seguintes incidencias formuladas polo persoal usuario implicado na prestación de asistencia sanitaria nos centros sanitarios e polo persoal inspector veterinario: alta ou modificación de perfís de usuario, habilitación dos perfís de acceso no caso de estaren bloqueados ou ter problemas co contrasinal de acceso, incidencias urxentes que inhabiliten a utilización dos sistemas de información corporativos.

Artigo 2

O persoal necesario para a cobertura dos servizos mínimos deberá ser publicado nos taboleiros de anuncios coa antelación suficiente. A designación nominal dos efectivos que deben cubrir os servizos mínimos será realizada pola empresa e notificada ao persoal designado.

O persoal designado que desexe exercer o seu dereito de folga poderá instar a súa substitución por outro/a empregado/a da empresa que voluntariamente acepte o cambio de xeito expreso.

Artigo 3

Os paros e as alteracións no traballo por parte do persoal necesario para o mantemento dos servizos mínimos determinados serán considerados ilegais para os efectos do establecido no artigo 16 do Real decreto lei 17/1977, do 4 de marzo (BOE núm. 58, do 9 de marzo).

Artigo 4

O disposto nos artigos anteriores non significará ningún tipo de limitación dos dereitos que a normativa reguladora da folga recoñece ao persoal nesta situación, nin tampouco sobre a tramitación e os efectos das peticións que a motiven.

Artigo 5

Sen prexuízo do que establecen os artigos anteriores, deberanse observar as normas legais e regulamentarias vixentes en materia de garantías á poboación e aos usuarios do servizos sanitarios. Os altercados ou incidentes que se produzan serán obxecto de sanción con base nas normas vixentes.

Disposición derradeira

Esta orde producirá efectos e entrará en vigor o mesmo día da súa publicación no Diario Oficial de Galicia.

Santiago de Compostela, 19 de setembro de 2016

Jesús Vázquez Almuíña
Conselleiro de Sanidade