Conforme o disposto no artigo 70 do Real decreto lexislativo 5/2015, do 30 de outubro, polo que se aproba o texto refundido da Lei do estatuto básico do empregado público; no artigo 20.2 j) da Ley 48/2015, do 29 de outubro, de orzamentos xerais do Estado para o ano 2016; no artigo 36 da Lei 12/2015, do 24 de decembro, de orzamentos xerais da Comunidade Autónoma de Galicia para o ano 2016, así como nos estatutos da Universidade de Santiago de Compostela (USC); e logo do informe favorable da Mesa de Negociación do Persoal Docente e Investigador da USC que tivo lugar o 13 de abril de 2016, do informe favorable do Consello Social da USC do 26 de maio de 2016 e da aprobación polo Consello de Goberno da Universidade de Santiago de Compostela do 3 de maio de 2016, de creación de 38 prazas de profesorado contratado doutor e 5 prazas de profesor titular de universidade, unha vez obtida a autorización da Consellería de Facenda da Xunta de Galicia, con data 9 de xuño de 2016, tal e como se determina nos artigos 13 e 36 da Lei 12/2015,

RESOLVO:

Primeiro. Publicar a oferta de emprego público (OPE) do persoal docente e investigador da Universidade de Santiago de Compostela para o ano 2016, que consiste en 43 prazas de profesorado con vinculación permanente. Do total de prazas, 38 son de profesor de contratado doutor e delas ofértanse 6 prazas para dar cumprimento á obriga de destinar un 15 % do total de prazas á contratación como persoal laboral fixo de persoal investigador doutor que finalizase o programa Ramón y Cajal e obtivese o certificado I3, fixada no artigo 36 da citada Lei 12/2015 e no artigo 20.2 J) da Ley 48/2015, e 5 prazas de profesor titular de universidade.

Segundo. Esta OPE inclúe as necesidades de recursos humanos de carácter permanente no ámbito docente e investigador, con asignación orzamentaria, que non poden ser cubertas cos efectivos de persoal existentes, segundo se detalla no anexo, dentro do contexto global de restrición orzamentaria que afecta todas as administracións públicas.

Terceiro. A planificación dos recursos humanos na USC oriéntase á atención das funcións prioritarias, á correcta dimensión do volume de efectivos e a potenciar a estabilización do seu persoal docente e investigador.

Cuarto. As convocatorias dos concursos derivados desta oferta publicaranse no Diario Oficial de Galicia e, de ser o caso, no Boletín Oficial del Estado, para garantir a publicidade, e executaranse dentro do prazo máximo previsto no artigo 70 do Estatuto básico do empregado público.

Quinto. Coa finalidade de dar unha maior difusión ás convocatorias de concursos relacionados con esta oferta de emprego, así como dos actos que deriven deles, na páxina web do Servizo de Planificación de PDI da USC (enderezo web http://www.usc.es/gl/servizos/profesorado), na sección de Convocatorias de prazas, poderase consultar a documentación correspondente.

Santiago de Compostela, 14 de xuño de 2016

Juan M. Viaño Rey
Reitor da Universidade de Santiago de Compostela

ANEXO I
Oferta pública de emprego para o persoal docente e investigador da Universidade de Santiago de Compostela do ano 2016

Categoria	Nº de prazas	Sistema de acceso
Profesor titular de universidade	5	Libre
Profesor/a contratado/a doutor/a	32	Libre
Profesor/a contratado/a doutor/a (reserva do 15 % para persoal investigador doutor que finalizase o programa Ramón y Cajal e obtivese o certificado I3)	6	Libre