O Consello Regulador da indicación xeográfica protexida Tarta de Santiago aprobou propoñer á Consellería do Medio Rural unha modificación do seu regulamento, aprobado mediante a Orde do 10 de febreiro de 2010.
Trátase dunha modificación puntual que afecta o artigo 18, que regula as baixas no Consello Regulador. Con esta modificación preténdese que haxa, como ocorre nos regulamentos doutros consellos reguladores, un vínculo entre a inscrición no rexistro do consello regulador e a efectiva realización da actividade coa que se relaciona a inscrición, de xeito que poidan ser dados de baixa, logo de audiencia ao interesado, aqueles operadores que durante un período de tempo prolongado non elaborasen e comercializasen tortas amparadas pola indicación xeográfica protexida.
A modificación proposta non afecta o contido do prego de condicións que serviu de base para a inscrición desta indicación xeográfica protexida no rexistro europeo, ao circunscribirse ao ámbito do funcionamento do consello regulador. Por iso non é necesario tramitar unha modificación do citado documento.
Polo anterior, e tendo en conta as competencias conferidas en virtude do Decreto 4/2007, do 18 de xaneiro, polo que se regulan as denominacións xeográficas de calidade do sector alimentario e os seus consellos reguladores,
DISPOÑO:
Artigo único. Modificación do artigo 18 da Orde do 10 de febreiro de 2010
Modifícase o artigo 18 da Orde do 10 de febreiro de 2010 pola que se aproba o Regulamento da indicación xeográfica protexida Tarta de Santiago e do seu Consello Regulador, se nomea o Consello Regulador provisional e se dá publicidade ao prego de condicións do produto (DOG núm. 32, do 17 de febreiro), de xeito que se engade unha nova alínea co seguinte texto:
«3. O Consello Regulador, logo de audiencia ao interesado, poderá dar de baixa os inscritos no rexistro despois de máis dun ano continuado sen actividade. Os cambios de titularidade interromperán o prazo sinalado».
Disposición derradeira única. Entrada en vigor
A presente orde entrará en vigor o día seguinte ao da súa publicación no Diario Oficial de Galicia.
Santiago de Compostela, 10 de xuño de 2016
Ángeles Vázquez Mejuto
Conselleira do Medio Rural