O Pleno do Concello de Pontevedra, na sesión ordinaria que tivo lugar con data do 21.3.2016, adoptou, entre outros pronunciamentos, o seguinte acordo, que, na súa parte dispositiva literalmente, di:
«Primeiro. Prestar aprobación ao documento refundido do proxecto de modificación puntual número 2 do Plan parcial do sector B-4/Fonte Santa, instrumento urbanístico de iniciativa particular promovido pola Asociación Juan XXIII e redactado pola arquitecta María Teresa Táboas Veleiro, datado en xaneiro de 2016, que ten por finalidade fixar unha ordenación detallada da parcela cedida en compensación do 10 % do aproveitamento do polígono, coa finalidade de permitir a materialización dun uso dotacional consistente na construción dunha residencia e centro de día para persoas con discapacidade: fogar do grupo da comunidade, en desenvolvemento do acordo de colaboración asinado o 16.3.2012, e que conta con informe favorable da Secretaría Xeral de Ordenación do Territorio e Urbanismo do 18.2.2016.
Segundo. Notificar este acto administrativo á entidade interesada e aos propietarios de terreos afectados, segundo a relación catastral incorporada ao expediente e, asemade, comunicarllo á Consellería de Medio Ambiente e Ordenación do Territorio nos termos do artigo 92 da Lei 9/2002, do 30 de decembro, de ordenación urbanística e protección do medio rural de Galicia, dándoselle traslado, a esta última, dunha copia autenticada de dous exemplares do instrumento aprobado definitivamente con todos os planos e documentos que integran o plan sobre os que recaese o acordo de aprobación definitiva, debidamente dilixenciados pola Secretaría Xeral do Pleno do concello, facendo constar a dita circunstancia.
Terceiro. Dispoñer a publicación do anuncio do acordo de aprobación definitiva no Diario Oficial de Galicia, facendo constar a remisión da documentación á Consellería e a publicación do documento que conteña a normativa e as ordenanzas na web http://www.pontevedra.gal e no Boletín Oficial da provincia para lograr a súa eficacia e executividade, consonte o establecido na lexislación de réxime local, concretamente nos artigos 70.2, 70 ter e 65 da Lei reguladora das bases de réxime local (...)».
Faise constar que con data do 13.4.2016 tivo entrada no Rexistro do Portelo Único da Xunta de Galicia a documentación amentada, dirixida á Consellería de Medio Ambiente e Ordenación do Territorio.
Así mesmo, faise constar que, nestas datas, xa se atopa publicado na páxina web municipal (www.pontevedra.gal) o contido íntegro do documento aprobado definitivamente polo Pleno da Corporación.
Recursos procedentes:
Contra este acordo poderá interporse recurso contencioso-administrativo ante a Sala do Contencioso-Administrativo do TSX de Galicia, no prazo de 2 meses contados desde o día seguinte ao da súa publicación (artigos 10 e 46 da Lei 29/1998). Isto sen prexuízo de interpor calquera outro recurso que se entenda máis procedente e sexa conforme dereito.
Pontevedra, 25 de abril de 2016
José Luis Mato Rodríguez
Secretario xeral do Pleno