O artigo 28.2 da Constitución española recoñece, como dereito fundamental da persoa, o dereito á folga.

O exercicio deste dereito na Administración e nas empresas, entidades e institucións públicas ou privadas, que presten servizos públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ao mantemento dos servizos esenciais fixados no artigo 2 do Decreto 155/1988, do 9 de xuño (DOG nº 116, do 20 de xuño), entre os que se atopa a sanidade.

O exercicio público das funcións en materia de saúde pública non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación con este.

O artigo 3 do citado decreto faculta os conselleiros ou conselleiras competentes, por razón dos servizos esenciais afectados, para que, mediante orde e diante de cada situación de folga, decidan o mínimo de actividade necesaria para asegurar o mantemento de tales servizos, así como para determinar o persoal necesario para a súa prestación.

As organizacións sindicais CIG, CCOO, CSI-F e UGT comunicaron a convocatoria dunha folga que afectará desde o día 18 de maio, de luns a mércores e con carácter indefinido, o persoal funcionario da clase de farmacéutico inspector de saúde pública.

Unha vez outorgada audiencia ao comité de folga,

DISPOÑO:

Artigo 1

A convocatoria de folga referida deberá entenderse condicionada ao mantemento dos servizos mínimos, segundo o criterio que se establece na presente orde.

Dado o carácter indefinido da folga e que esta se convoca de luns a mércores, os servizos mínimos que se establecen resultan necesarios para evitar que se produzan prexuízos para a saúde, singularmente en materia de calidade das zonas de baño, da auga de consumo humano, das piscinas de tempada ou a prevención e control da lexionelose, tomando en consideración como feito moi relevante que a folga afectará ao inicio do período estival. Con esa finalidade establécese como criterio reitor de carácter xeral a presenza de preto do 50 % dos efectivos habituais.

No cadro anexo determínase o número de efectivos necesarios para garantir os servizos mínimos.

Estes efectivos poderán ampliarse sempre que se xustifique que resulta estritamente necesario para evitar riscos sobrevidos para a saúde.

Artigo 2

Os/as profesionais necesarios para a cobertura dos servizos mínimos deberán ser publicados nos taboleiros de anuncios, polo menos con 48 horas de antelación.

Artigo 3

A designación nominal de efectivos que deben cubrir os servizos mínimos, que deberá recaer nos/nas profesionais de xeito rotatorio, será realizada pola correspondente xefatura territorial e notificada ao persoal designado.

O persoal designado como servizo mínimo que desexe exercer o seu dereito de folga, poderá instar a substitución da súa designación por outro/a profesional que voluntariamente acepte o cambio de xeito expreso.

Artigo 4

Os paros e alteracións no traballo por parte do persoal designado para o mantemento dos servizos mínimos serán considerados ilegais para os efectos do establecido no artigo 16.1 do Real decreto lei 17/1977, do 4 de marzo (BOE nº 58, do 9 de marzo).

Artigo 5

O disposto nos artigos anteriores non significará ningún tipo de limitación dos dereitos que a normativa reguladora da folga recoñece ao persoal nesta situación, nin tampouco sobre a tramitación e efectos das peticións que a motiven.

Disposición derradeira

Esta orde producirá efectos e entrará en vigor o mesmo día da súa publicación no Diario Oficial de Galicia.

Santiago de Compostela, 12 de maio de 2016

Jesús Vázquez Almuíña
Conselleiro de Sanidade

ANEXO

Luns a mércores (non festivos)

Xefatura territorial	Zona de inspección	Efectivos servizos mínimos
A Coruña	A Coruña	4
	Ferrol	2
	Santiago de Compostela	2
	Noia	2
Lugo	Lugo	4
	Burela	1
	Monforte de Lemos	1
Ourense	Ourense	4
	O Barco de Valdeorras	1
	Verín	1
Pontevedra	Pontevedra	4
	Lalín	1
	Vigo	5