Mediante Orde da Consellería de Facenda do 11 de marzo de 2015 foi autorizado o alleamento, mediante poxa, do 50 % dun inmoble situado na avenida Pérez Galdós, 65 de Valencia.

Logo de publicarse, no Diario Oficial de Galicia do 10 de febreiro de 2016, número 27, e nun xornal de ampla difusión (Diario Marca do mesmo día), o anuncio da Secretaría Xeral Técnica e do Patrimonio de alleamento do citado inmoble, tivo lugar o 10 de marzo de 2016 a poxa pública anunciada, polo que, á vista das actas da mesa de contratación, de conformidade co disposto no artigo 70 do Decreto 50/1989, polo que se aproba o Regulamento do patrimonio da Comunidade Autónoma de Galicia, e tras a proposta da Secretaría Xeral Técnica e do Patrimonio,

DISPOÑO:

Primeiro. Aprobar a seguinte adxudicación:

A Módulos Audiovisuales, S.L., en cuarta poxa, polo prezo de oito mil trescentos setenta e un euros, o 50 % do dominio da vivenda situada na avenida Pérez Galdós, 65, planta primeira, porta primeira, de Valencia, dunha superficie construída de 94,85 m2 e de 82,70 m2 útiles, segundo unha medición recente. Referencia catastral 4522008YJ2742B0003YB, inscrito no Rexistro da Propiedade número 2 de Valencia no tomo 2955, folio 171, sección sétima, do predio 11385.

Segundo. O pagamento do prezo de adxudicación efectuarase segundo o estipulado no artigo 70.3 do Decreto 50/1989, do 9 de marzo, polo que se aproba o Regulamento de patrimonio da Comunidade Autónoma de Galicia.

Terceiro. A venda formalizarase como corpo certo en escritura pública e serán por conta dos adquirentes os custos do seu outorgamento. Os tributos derivados da transmisión serán exixidos conforme o disposto na lexislación tributaria. Así mesmo, é por conta do adxudicatario o pagamento dos custos dos anuncios que se producisen neste procedemento de alleamento e os demais gastos previstos no prego de condicións.

Cuarto. Contra esta resolución, que pon fin á vía administrativa, poderase interpor recurso potestativo de reposición, ante esta consellería, no prazo dun mes contado desde o día seguinte ao da súa publicación no Diario Oficial de Galicia, ou recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses.

Santiago de Compostela, 15 de marzo de 2016

P.D. (Orde do 9.1.2012; DOG nº 9, do 13 de xaneiro)
Mª del Socorro Martín Hierro
Secretaria xeral técnica e do Patrimonio da Consellería de Facenda