O Pleno do Concello de Vigo, en sesión ordinaria do día 8 de setembro de 2015, adoptou o seguinte acordo:
Primeiro. Aprobar definitivamente o estudo de detalle do reaxuste da aliñación de parcela na avda. Atlántida nº 107 ao 111, promovido pola mercantil Vicus Vivenda, S.L. e redactado polo arquitecto José Antonio Comesaña García, con visado colexial do 1.9.2014, de acordo cos informes técnicos que constan no expediente.
Segundo. Comunicar o presente acordo á Consellería de Medio Ambiente, Territorio e Infraestruturas e darlle traslado de copia autenticada de dous exemplares do instrumento aprobado definitivamente con todos os planos e documentos que o integran debidamente dilixenciados nos termos exixidos no artigo 92 da LOUG.
Terceiro. Publicar este acordo no DOG no prazo previsto no artigo 92 da LOUG, facer constar a data de remisión do instrumento á consellería competente en materia de ordenación do territorio e urbanismo e publicar os documentos que contivesen, de ser o caso, a normativa no BOP.
Cuarto. Publicar este acordo xunto co instrumento definitivamente aprobado na web municipal.
Quinto. Notificar o presente acordo ás oficinas municipais competentes en materia de licenzas, medio ambiente e parques e xardíns, para o seu coñecemento e efectos oportunos.
Sexto. Notificarlles o presente acordo aos interesados, coa indicación de que pon fin á vía administrativa e contra el cabe interpor recurso contencioso-administrativo ante os órganos da xurisdición contencioso-administrativa competentes, no prazo de dous meses contados a partir do seguinte ao da súa publicación, de conformidade co previsto no artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de calquera outro que se considere pertinente.
Mediante o presente anuncio faise constar que a documentación sobre a que se ditou o acordo de aprobación definitiva foi remitida, por oficio do 28 de setembro de 2015, á Consellería de Medio Ambiente, Territorio e Infraestruturas, ao abeiro do establecido no artigo 92.3 da LOUG.
Vigo, 28 de setembro de 2015
P.D. (Resolución do 6.7.2015)
Mª José Caride Estévez
Vicepresidenta da Xerencia Municipal de Urbanismo