Por acordo da asemblea xeral ordinaria celebrada o día 25 de xuño de 2015, a entidade Mutualidade Caixa Galicia de Previsión Social a Prima Fixa, inscrita co número 6 no Rexistro Autonómico de Mutualidades de Previsión Social non integradas na Seguridade Social, adscrito a esta dirección xeral, adoptou o acordo de disolución voluntaria da mutualidade.

A competencia na materia vén determinada no Decreto 340/1996, do 13 de setembro, polo que se asumen funcións e servizos transferidos á Comunidade Autónoma de Galicia mediante o Real decreto 1642/1996, do 5 de xullo, en materia de mutualidades de previsión social e se asignan á Consellería de Economía e Facenda, e no Decreto 101/2014, do 1 de agosto, polo que establece a estrutura orgánica da Consellería de Facenda.

De acordo co anterior, para evitar unha dilatación no tempo do proceso liquidativo e coa finalidade de facilitar a liquidación sen maiores prexuízos aos mutualistas, beneficiarios e terceiros prexudicados, esta dirección xeral, de conformidade co disposto no artigo 28.2.d) do texto refundido da Lei de ordenación e supervisión dos seguros privados aprobado polo Real decreto lexislativo 6/2004, de 29 de outubro, e no artigo 84 do Regulamento de ordenación e supervisión dos seguros privados, aprobado polo Real decreto 2486/1998, do 20 de novembro,

ACORDA:

O vencemento anticipado, ás 24.00 horas do día 31 de xullo de 2015, dos contratos de seguro que integran a carteira da Mutualidade Caixa Galicia de Previsión Social a Prima Fixa, en liquidación.

Contra esta resolución, que non pon fin á vía administrativa, os interesados poderán interpoñer recurso de alzada no prazo dun mes, ante o conselleiro de Facenda, de conformidade co disposto nos artigos 107, 114 e seguintes da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 14 de xullo de 2015

David Cabañó Fernández
Director xeral de Política Financeira e Tesouro