Logo da tramitación do procedemento en que se outorga audiencia ao concesionario, non constando a formulación de oposición, e tras a emisión de proposta polo instrutor designado para o efecto, con data do 26 de febreiro de 2015, o presidente de Portos de Galicia, de acordo coas competencias conferidas polo artigo cuarto da Orde do 30 de marzo de 2012, da Consellería do Medio Rural e do Mar, resolve declarar a caducidade da concesión administrativa de referencia, o que determina a extinción anticipada da concesión, e a reversión e recuperación pola Administración das superficies ocupadas e das instalacións que se indican na resolución, así como a incautación da totalidade das garantías, se é o caso, se constituísen para responder da explotación e/ou construción da concesión.
Intentada a notificación da resolución no enderezo que consta no expediente sito no Castro, s/n, Castiñeiras, Ribeira, provincia da Coruña, a través do servizo de Correos, e non sendo posible a súa práctica, de conformidade co disposto no artigo 59.4 da Lei 30/1992, de réxime xurídico das administracións públicas e do procedemento administrativo común, notifícase mediante a publicación no Diario Oficial de Galicia e exposición no taboleiro de edictos do Concello de Ribeira á mercantil Conservas Castiñeiras, S.L. a presente resolución que decreta a caducidade da concesión administrativa de referencia.
A concesión administrativa caduca polo incumprimento das condicións xerais 16ª e 17ª da concesión; a inexistencia de actividade na concesión e estar debendo a totalidade das taxas xiradas desde o ano 2006 constitúen causas imperativas de caducidade por aplicación do establecido na condición xeral 32ª do título.
Para o seu exame, o expediente completo está nas dependencias dos Servizos Centrais de Portos de Galicia en Área Central, praza de Europa, 5-A, 6º, 15707 Santiago de Compostela.
A presente resolución esgota a vía administrativa, e contra ela poderase interpor recurso contencioso-administrativo nun prazo de dous meses, contados desde o día seguinte ao da súa publicación no Diario Oficial de Galicia ou exposición no taboleiro de edictos do Concello de Ribeira, perante o Xulgado do Contencioso-Administrativo de Santiago de Compostela que corresponda, ou recurso potestativo de reposición perante esta Presidencia de Portos de Galicia no prazo dun mes contado desde a mesma data.
E para que conste e le sirva de notificación, en cumprimento do disposto no artigo 59.4 da Lei 30/1992, do 26 de novembro, de réxime xurídico das administracións públicas e do procedemento administrativo común, expido, asino e selo a presente cédula.
Santiago de Compostela, 6 de marzo de 2015
José Juan Durán Hermida
Presidente de Portos de Galicia