De conformidade co disposto no artigo 59.4 da Lei 30/1992, do 26 de novembro, de réxime xurídico das administracións públicas e do procedemento administrativo común, notifícase mediante a publicación no Diario Oficial de Galicia e exposición no taboleiro de edictos do Concello de Vigo á mercantil Inversiones Mapama, S.L. orde de retirada da embarcación Antigua II, con matrícula 7ª-BA-2-517-92, do peirao do porto de Combarro, por non ser posible a notificación a través do servizo de Correos no derradeiro enderezo coñecido sito na rúa Progreso, 36, 3º B, de Vigo, provincia de Pontevedra.

De acordo co expediente que traslada a Xefatura da Zona Sur de Portos de Galicia, que intentou notificar dúas ordes de retirada, a embarcación atópase depositada sen autorización na zona de servizo do porto de Combarro.

A presente orde emítese a Dirección de Portos de Galicia ao abeiro das competencias conferidas polo artigo 9.3.a) da Lei 5/1994, do 29 de novembro, de creación de Portos de Galicia.

A retirada da embarcación deberá producirse nun prazo máximo de 15 días contados dedde o día seguinte ao da publicación da presente orde no Diario Oficial de Galicia e exposición no taboleiro de edictos do Concello de Vigo.

O atraso no cumprimento da orde de retirada implicará que Portos de Galicia comece a liquidar a tarifa X-5 –embarcacións deportivas e de lecer– conforme o establecido na regra décima de aplicación a esta tarifa recollida na Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia, e todo iso sen prexuízo de comezar a aplicar a tarifa na contía prevista na regra décimo cuarta de aplicación, de reservar para si a potestade de efectuar a dita retirada de maneira subsidiaria e á custa do propietario da embarcación, polo que pasará o correspondente cargo, respondendo o valor da embarcación dos gastos de transporte e almacenaxe, e de iniciarse procedemento administrativo sancionador.

O presente acto administrativo, que ten eficacia executiva, non esgota a vía administrativa e é susceptible de recurso de alzada, que deberá presentarse ante a Presidencia de Portos de Galicia nun prazo máximo dun mes contado desde o día seguinte ao da súa publicación no Diario oficial de Galicia ou ao da súa exposición no taboleiro de edictos do Concello de Vigo.

E para que conste e lles sirva de notificación, e en cumprimento do disposto no
artigo 59.4 da Lei 30/1992, do 26 de novembro, de réxime xurídico das administracións públicas e do procedemento administrativo común, expido, asino e selo a presente cédula.

Santiago de Compostela, 26 de decembro de 2014

José Ignacio Villar García
Director de Portos de Galicia