O Concello de Dumbría solicita a aprobación definitiva do expediente referido, ao abeiro do establecido na disposición adicional 2ª.2 da Lei 9/2002, de ordenación urbanística e protección do medio rural de Galicia.
Analizada a documentación remitida polo Concello de Dumbría, subscrita polos arquitectos Daniel Beiras García-Sabell e David Estany Garea, e vista a proposta literal que eleva a Subdirección Xeral de Urbanismo, resulta:
I. Antecedentes.
1. O Concello de Dumbría carece actualmente de planeamento xeral municipal, resultando aplicables as normas complementarias e subsidiarias de planeamento da provincia da Coruña aprobadas definitivamente pola Orde da COTOP do 3.4.1991.
2. O Pleno do Concello do 31.10.2013 aprobou inicialmente o proxecto de delimitación do solo de núcleo rural de Figueiroa. Sometido a información pública por un mes (DOG do 8.11.2013, El Correo Gallego do 6.11.2013 e La Voz de Galicia do 8.11.2013) non se presentaron alegacións, segundo certificación do 11.12.2013.
3. A arquitecta técnica municipal emitiu informe o 12.12.2013. E o secretario municipal emitiu informes o 28.10.2013, previo á aprobación inicial, e o 4.3.2014, previo á aprobación provisional.
4. O Concello Pleno do 7.3.2014, aprobou provisionalmente a delimitación.
II. Análise e consideracións.
1. A proposta delimita un solo de núcleo rural de 15.092,72 m2 de superficie, que se categoriza como histórico-tradicional, no cal se aplica unha ordenanza definida no propio expediente, con parcela mínima 900 m2 (permítese edificar nas parcelas menores situadas entre outras edificadas) e 0,50 m2/m2 de edificabilidade.
2. O núcleo de Figueiroa, parroquia de Dumbría, do concello de Dumbría, figura no nomenclátor correspondente ás entidades de poboación da provincia da Coruña aprobado polo Decreto 189/2003, do 6 de febreiro (DOG do 25 de marzo), polo que cumpre as condicións para consideralo identificado e individualizado nos padróns oficiais (artigo 13.1 da LOUG).
3. O proxecto encadra o núcleo no tipo básico de histórico-tradicional, o que corresponde á súa morfoloxía, tipoloxía tradicional das edificacións e á vinculación coa explotación dos recursos naturais, conforme o establecido no artigo 13.3 da LOUG, en redacción dada pola Lei 2/2010.
4. O requisito para a delimitación do solo de núcleo rural, canto a acadar unha consolidación edificatoria do 50 % de acordo coa ordenación proposta (artigo 13 da LOUG) cúmprese cun 79,55 %, cunha parcela mínima para efectos de cálculo de 900 m2, acreditada polo método numérico da Instrución 4/2011 (DOG do 11.5.2011).
5. A delimitación acolle as edificacións tradicionais do asentamento seguindo o parcelario e as pegadas físicas existentes dentro do máximo de 50 m das devanditas edificacións tradicionais (artigo 13.3 da LOUG).
III. Resolución.
Visto canto antecede,
RESOLVO:
1. Aprobar definitivamente o proxecto de delimitación do solo de núcleo rural histórico tradicional de Figueiroa, no concello de Dumbría.
2. Contra esta resolución, que non pon fin á vía administrativa, poderase interpoñer recurso de alzada ante o conselleiro de Medio Ambiente, Territorio e Infraestruturas, no prazo dun mes que se contará a partir do día seguinte ao de notificación desta resolución, sen prexuízo de que os interesados poidan exercer, se é o caso, calquera outro que consideren procedente (artigos 48, 58, 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común, modificado pola Lei 4/1999, do 13 de xaneiro).
3. No suposto de que o interesado sexa unha Administración pública non caberá interpoñer recurso en vía administrativa, e poderase interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde o día seguinte ao da notificación, sen prexuízo da formulación, se é o caso, do requirimento previo en igual prazo (artigos 44 e 46 da Lei 29/1998, do 13 de xullo, da xurisdición contencioso-administrativa).
Santiago de Compostela, 6 de xuño de 2014
María Encarnación Rivas Díaz
Secretaria xeral de Ordenación do Territorio e Urbanismo
