Antecedentes.
De conformidade co disposto no artigo 15 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio), o Servizo Provincial de Conservación da Natureza de Ourense iniciou o expediente de modificación do couto de pesca de Boborás.
No expediente de modificación do couto de pesca de Boborás consta o informe favorable do Comité Provincial de Pesca Fluvial de Ourense, do 10 de outubro de 2013.
O expediente de modificación do couto de pesca de Boborás foi sometido a información pública mediante Anuncio do 8 de novembro de 2013, da Xefatura Territorial de Ourense, publicado no DOG núm. 238, do 13 de decembro de 2013. Neste trámite de información pública non se presentaron alegacións.
Consideracións legais.
O expediente de modificación do couto de pesca de Boborás cumpre os requisitos establecidos na Lei 7/1992, do 24 de xullo, de pesca fluvial, no Decreto 130/1997, do 14 de maio, polo que se aproba o Regulamento de ordenación da pesca fluvial e dos ecosistemas acuáticos continentais, e demais normativa de aplicación.
A Dirección Xeral de Conservación da Natureza é competente para resolver o expediente segundo o disposto na Lei 7/1992, do 24 de xullo, de pesca fluvial, no Decreto 130/1997, do 14 de maio, polo que se aproba o Regulamento de ordenación da pesca fluvial e dos ecosistemas acuáticos continentais, e mais no Decreto 44/2012, do 19 de xaneiro, polo que se establece a estrutura orgánica da Consellería de Medio Ambiente, Territorio e Infraestruturas.
Resolución.
De conformidade con todo o anterior, resolvo modificar os límites do couto de pesca de Boborás, no río Viñao, que quedan fixados nos seguintes puntos:
Límite superior: ponte do muíño de Santiso (O Irixo).
Límite inferior: muíño da Teixeira (Boborás).
Lonxitude aproximada: 10,5 km.
De conformidade co disposto no artigo 15 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio), inclúense no couto de pesca os 100 metros finais de todos os afluentes existentes no tramo acoutado.
Contra esta resolución caberá, de conformidade cos artigos 107.1º, 114 e 115 da Lei 4/1999, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común, a interposición do recurso de alzada perante o conselleiro de Medio Ambiente, Territorio e Infraestruturas no prazo dun mes, contado desde o día seguinte ao da publicación no Diario Oficial de Galicia.
Santiago de Compostela, 13 de febreiro de 2014
Verónica Tellado Barcia
Directora xeral de Conservación da Natureza