Unha vez vistas as competencias, funcións e facultades atribuídas ao Consello de Administración no artigo 7 da Lei 3/1999, do 11 de marzo, de creación do Instituto Enerxético de Galicia, e no artigo 9 dos estatutos do Instituto,

Co obxecto de lograr unha maior axilidade e fluidez na tramitación dos diferentes procedementos administrativos,

Considerando o disposto no artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, así como o establecido no artigo 6 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia,

O Consello de Administración, en sesión do 30 de decembro de 2013, adoptou os seguintes acordos:

Primeiro. Delegar no director do Instituto o exercicio de todas aquelas competencias, funcións e facultades non atribuídas de xeito expreso ao Consello de Administración no artigo 7 da Lei 3/1999, do 11 de marzo, de creación do Instituto Enerxético de Galicia; e no artigo 9 dos estatutos do Instituto, e que, pola súa importancia ou transcendencia, non lle poidan corresponder ao Consello de Administración en virtude do establecido no artigo 7.3 g) da Lei 3/1999 e no artigo 9 f) dos estatutos do Instituto. As resolucións ditadas polo director no exercicio de tales competencias delegadas serán sometidas á ratificación posterior do Consello de Administración.

Segundo. Ratificar o acordo adoptado polo Consello de Administración en sesión do 6 de setembro de 1999, en virtude do cal se lle outorgaron ao director determinados poderes sobre materias concretas.

Terceiro. O Consello de Administración poderá avocar ou revogar esta delegación en calquera momento, en virtude do disposto nos artigos 13.6 e 14 da Lei 30/1992 e nos artigos 6.9 e 7 da Lei 6/2010.

Cuarto. A delegación referida efectúase nos termos de réxime xeral e abarca tanto as facultades de dirección e xestión como a de resolución mediante actos e acordos administrativos que afecten terceiros.

Santiago de Compostela, 14 de xaneiro de 2014

Ángel Bernardo Tahoces
Director do Instituto Enerxético de Galicia