A Xefatura da Zona Sur de Portos de Galicia comunica que a mercantil Transportes Arenaz, S.L. está a ocupar os departamentos números 2 e 3 do porto de Tragove destinados ao almacenamento de aparellos sen a debida autorización e que, efectuados dous requirimentos ao domicilio facilitado pola empresa demandando a solicitude de nova autorización ou, en caso contrario, ordenando o desaloxo dos departamentos, foron devoltos polo servizo de Correos.
Polo exposto, de acordo co establecido no artigo 113 da Lei 5/2011, do patrimonio da Comunidade Autónoma de Galicia, no artigo 103 do Real decreto lexislativo 2/2011, do 5 de setembro, que aproba o texto refundido da Lei de portos do Estado e da mariña mercante, e no artigo 31 do Decreto 227/1995, que aproba o regulamento da entidade pública Portos de Galicia, notifícase á mercantil Transportes Arenaz, S.L., con último domicilio coñecido na rúa Pombal, número 10, de Cambados, mediante a publicación da presente cédula no Diario Oficial de Galicia e exposición no taboleiro de edictos do Concello de Cambados, o inicio do procedemento de desafiuzamento administrativo.
Outórgase trámite de audiencia por un prazo máximo de 10 días hábiles contados desde a publicación da presente cédula no Diario Oficial de Galicia, ou da súa exposición no taboleiro de edictos do Concello de Cambados, durante o cal poderán formularse alegacións e presentarse os documentos ou xustificacións que se consideren pertinentes. Durante o dito prazo poderá solicitarse nova autorización para regularizar a ocupación.
De acordo co disposto no artigo 114 da Lei 5/2011, do patrimonio da Comunidade Autónoma de Galicia, a competencia para emitir o presente acto administrativo corresponde á Presidencia do Consello de Administración da entidade pública Portos de Galicia.
A instrución do presente procedemento recae no xefe da División Xurídica de Portos de Galicia, Jesús Javier Fernández Barro, cuxo réxime de abstención e recusación é o previsto nos artigos 28 e 29 da Lei 30/1992, de réxime xurídico das administracións públicas e do procedemento administrativo común.
Contra o presente acto administrativo de iniciación non se admitirán accións interditais ou para a tutela sumaria da posesión das previstas na Lei de axuizamento civil.
E para que conste e sirva de notificación, e en cumprimento do disposto no artigo 59.4º da Lei 30/1992, do 26 de novembro, de réxime xurídico das administracións públicas e do procedemento administrativo común, expido, asino e selo a presente cédula.
Santiago de Compostela, 21 de outubro de 2013
José Juan Durán Hermida
Presidente de Portos de Galicia