O Pleno do Concello de Portas, en sesión ordinaria do 30 de agosto de 2013, conforme o disposto no artigo 85 da Lei 9/2002, do 30 de decembro, de ordenación urbanística e protección do medio rural de Galicia, e o disposto no artigo 11 do Real decreto lexislativo 2/2008, do 20 de xuño, polo que se aproba o texto refundido da Lei do solo, e o artigo 7 da vixente Lei 6/2007, de medidas urxentes en materia de ordenación do territorio e do litoral de Galicia, acordou por maioría absoluta:

1. Aprobar inicialmente o Plan xeral de ordenación municipal do Concello de Portas, elaborado por OAU Oficina de Arquitectura, Urbanismo y Planificación, SLP, no cal se inclúe o informe de sustentabilidade ambiental (ISA).

2. Someter o dito plan xeral a información pública, cos documentos integrantes do expediente administrativo tramitado, incluído o informe de sustentabilidade ambiental, por un prazo de dous meses, efectuando a publicación dos anuncios correspondentes no Diario Oficial de Galicia e en dous dos xornais de maior difusión da provincia (Diario de Pontevedra e Faro de Vigo). Para estes efectos, o período de información pública rematará transcorridos os dous meses desde o día seguinte ao da publicación do anuncio no Diario Oficial de Galicia. Durante este, todas as persoas interesadas poderán facer uso do seu dereito a consultar os documentos nas dependencias do Concello de Portas, de luns a venres, das 9.00 ás 14.00 horas, e presentar as alegacións escritas oportunas en horario de oficina.

Simultaneamente ao trámite de información pública, o concello solicitaralles ás administracións públicas competentes os informes sectoriais que resulten necesarios, que deberán ser emitidos no prazo máximo dun mes, agás que a lexislación sectorial sinale outro prazo.

Así mesmo, e durante o prazo de información pública, daráselles audiencia aos municipios limítrofes.

3. De conformidade co sinalado no artigo 77 da Lei 9/2002, do 30 de decembro, de ordenación urbanística e protección do medio rural de Galicia, o acordo de aprobación inicial determina por si só a suspensión do procedemento de outorgamento de licenzas, nos ámbitos que se relacionan nos parágrafos seguintes. Esta suspensión terá unha duración máxima de dous anos e extinguirase, en todo caso, coa aprobación definitiva do planeamento:

a) En todas as zonas afectadas por sistemas xerais ou locais de vías, infraestruturas, equipamentos ou espazos libres, en calquera clase de solo, agás naquelas zonas que sirvan para a propia execución destes.

b) Nos núcleos rurais suspenderase só naquelas zonas en que non se poidan cumprir as dúas ordenacións ou normativas simultaneamente (normas complementarias e subsidiarias de planeamento (NSP) da provincia de Pontevedra vixentes e PXOM).

c) No solo rústico só se suspenderán as licenzas no caso xeral da alínea a) anterior (zonas afectadas por sistemas xerais ou locais de vías, infraestruturas, equipamentos ou espazos libres) e naquelas zonas en que non se poidan cumprir as dúas ordenacións ou normativas simultaneamente (NSP vixentes e PXOM).

Portas, 6 de setembro de 2013

Roberto Vázquez Souto
Alcalde